26 Aug 2016, 21:31
ޔޫރަޕްގެ އެންމެ ވަރުގަދަ ހަތަރު ކްލަބުގެ ހަތަރު ޓީމަށް 2018 ވަނަ އަހަރުން ފެށިގެން ޗެމްޕިއަންސް ލީގުގެ އޮޓޮމެޓިކް ޖާގައެއް ދިނުމަށް ޔޫރަޕްގެ ފުޓްބޯޅައިގެ މައި އިދާރާ ޔޫއެފާ އިން ނިންމައިފި އެވެ.
ޔޫއެފާގެ އެންމެ ވަރުގަދަ ލީގުތަކުގެ ލިސްޓުގެ އެންމެ ކުރީގައި މިވަގުތު އޮތީ ސްޕެއިން އާއި، އިނގިރޭސިވިލާތާއި ޖަރުމަން އަދި އިޓަލީ ލީގެވެ. އެހެންކަމުން އެ ހަތަރު ގައުމުން ކޮންމެ ގައުމެއްގެ ހަތަރު ކްލަބަށް އޮޓޮމެޓިކް ޖާގައެއް 2018 އިން ފެށިގެން 2021ގެ ނިޔަލަށް ފުރުސަތު ލިބޭނެ އެވެ.
ޔޫއެފާގެ ލިސްޓުގެ ފަސް ވަނަ އާއި ހަ ވަނައިގައި އޮންނަ ލީގުގެ ދެ ޓީމަކަށް ގްރޫޕް ސްޓޭޖުގެ އޮޓަމެޓިކް ޖާގައެއް ދޭން ނިންމާފައިވާ އިރު، އެއް ޓީމަކަށް ޗެމްޕިއަންސް ލީގުގެ ގްރޫޕް ސްޓޭޖުން ޖާގަ ލިބޭނީ ޕްލޭ އޯފް ކުޅެގެންނެވެ.
އޭގެ އިތުރުން ޔޫރޮފާ ލީގުގެ ޗެމްޕިއަނުންނަށް ޗެމްޕިއަންސް ލީގުގެ ގްރޫޕް ސްޓޭޖުގެ އޮޓޮމެޓިކް ޖާގައެއް ދިނުމަށް ވެސް ޔޫއެފާ އިން ނިންމާފައިވެ އެވެ.