22 Aug 2016, 13:58
އެޖެންޑާ ކުރާނެ މަސައްކަތެއް ނެތުމުން ރައްޔިތުން މަޖިލީހުގެ ޖަލްސާތައް މި މަހު ނުބާއްވާނެ ކަމަށް ބައެއް މެމްބަރުން ވިދާޅުވެއްޖެއެވެ.
މަޖިލީހުގެ ބައެއް މެމްބަރުން "ސަން"އަށް މިއަދު ވިދާޅުވީ، މި މަހު މަޖިލީހުގެ ޖަލްސާތައް ބާއްވަން ދެން މާކަ ގިނަ ދުވަސްތަކެއްވެސް ނެތް ކަމަށެވެ.
"މިހާރު އެޖެންޑާކުރާނެ ކަމެއް ވެސް ނެތް. އަނެއްކާ ދެން ނެތް ދެއްތޯ މާ ގިނަ ދުވަހެއް މި މަސް ނިމެން. މި މަސް ނިމުނީމަ މަޖިލިސް ރިސެސްއަށް ދާނެ. އެހެންވީމަ ގަބޫލެއް ނުކުރެވޭ މި މަހު ދެން މަޖިލީހުގެ ޖަލްސާއެއް ބާއްވާނެ ކަމަކަށް،" މަޖިލިސް މެމްބަރަކު ވިދާޅުވި އެވެ.
މަޖިލީހުގެ ޖަލްސާއެއް އެންމެ ފަހުން ބާއްވާފައި ވަނީ މިދިޔަ ބުދަ ދުވަހުއެވެ. އެ ދުވަހުގެ ޖަލްސާ ނިންމަވައިލައްވަމުން މަޖިލީހުގެ ޖަލްސާއެއް ދެން އޮންނާނެ ވަކި ދުވަހެއް، ރިޔާސަތުގައި އިންނެވި މަޖިލިސް ރައީސް އަބްދުﷲ މަސީހު އިއުލާނެއް ނުކުރައްވައެވެ.
މަޖިލީހުގެ އަމީން އާއްމު މިއަދު ވިދާޅުވީ މަޖިލިސް ގަވާއިދުގައި ބުނާ ގޮތުން މަޖިލިސް ޗުއްޓީއަށް ދާނީ މި މަސް ނިމުމުން ކަމަށެވެ.
މަޖިލިސް ގަވާއިދުގެ 16 ވަނަ މާއްދާގައި ބުނެފައި ވަނީ މަޖިލީހުގެ ފުރަތަމަ ދައުރު ހިނގާނީ ފެބްރުއަރީ މަހުން ފެށިގެން އޭޕްރީލް މަހުގެ ނިޔަލަށް ކަމަށެވެ. ދެވަނަ ދައުރު ޖޫން މަހުގެ ފުރަތަމަ ދުވަހުން ފެށިގެން އޯގަސްޓު މަހުގެ ނިޔަލަށް ކުރިއަށްދާއިރު ތިންވަނަ ދައުރު އަދި އެންމެ ފަހު ދައުރު ހިނގާނީ އޮކްޓޯބަރު މަހުން ފެށިގެން ނޮވެމްބަރު މަހުގެ ނިޔަލަށް ކަމަށް ގަވާއިދުގައި ބުނެފައިވެއެވެ.
މި ދައުރުގައި މަޖިލީހުން ފާސްކުރި މުހިއްމު ބައެއް ބިލުތަކުގެ ތެރޭގައި އަބުރު ރައްކާތެރިކޮށްދިނުމާއި ހިޔާލުފާޅު ކުރުމުގެ މިނިވަންކަމުގެ ބިލާއި ޖިންސީ ތަފާތު ކުރުންތައް ނައްތާލުމުގެ ގޮތުން މަޖިލީހުން ފާސްކުރި ޖެންޑާ އީކުއަލިޓީ ބިލާއި ހުއްދަ ނަގައިގެން ނޫނީ މުޒާހަރާ ނުކުރެވޭ ގޮތަށް އެއްވެ އުޅުމުގެ ގާނޫނަށް ގެނެސްފައިވާ އިސްލާހު ހިމެނެއެވެ.