21 Aug 2016, 13:11
މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން އިންތިޒާމްކޮށްގެން ކުރިއަށްގެންދާ އެމްބީއޭ ޗެމްޕިއަންޝިޕްގެ ފިރިހެން ޑިވިޝަނުގެ ފައިނަލަށް މިދިޔަ އަހަރުގެ ފައިނަލުގައި ވެސް ވާދަކުރި ޗެމްޕިއަން ރެޑްލައިން ކްލަބާއި ރަނަރަޕް ޓީރެކްސް ބާސްކެޓްބޯލް ކްލަބު ދަތުރުކޮށްފިއެވެ.
ސޯޝަލް ސެންޓަރު އެތެރޭ ކޯޓުގައި ކުރިއަށްދާ އެ މުބާރާތުގެ ފައިނަލުން ޓީރެކްސް ޖާގަ ހޯދާފައިވަނީ އިއްޔެ ހަވީރު ކުޅުނު ސެމީ ފައިނަލުގެ ފުރަތަމަ މެޗުގައި ދަ ބައުސް ސްޕޯޓްސް ކްލަބު އަތުން މޮޅުވެގެންނެވެ.
އެމްބީއޭ ޗެމްޕިއަންޝިޕްގެ ސެމީ ފައިނަލުގެ ދެވަނަ މެޗުގައި ރެޑްލައިން ކްލަބާއި އެލްޓީ ސްޕޯޓްސް ކްލަބު ބައްދަލުކުރި މެޗުގެ ތެރެއިން: މިރޭ ކުޅޭ އެ މުބާރާތުގެ ފައިނަލުގައި ބައްދަލުކުރާނީ މިދިޔަ އަހަރުގެ ފައިނަލުގައި ވެސް ވާދަކުރި ޗެމްޕިއަން ރެޑްލައިނާއި ޓީރެކްސް --- ސަން ފޮޓޯ/ މުހައްމަދު އަފްރާހް
އެ މެޗުގައި ދަ ބައުސްގެ މައްޗަށް ޓީރެކްސް އިން ކުރި ހޯދާފައިވަނީ 67-58 ޕޮއިންޓުންނެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވިފައިވަނީ ޓީރެކްސް އަށް 23 ޕޮއިންޓް ހޯދައިދިން ޒަކަރިއްޔާ އަބްދުލް ލަތީފެވެ.
މިދިޔަ އަހަރުގެ ޗެމްޕިއަން ރެޑްލައިން ކްލަބުން ފައިނަލުން ޖާގަ ހޯދީ ރޭ ކުޅުނު ސެމީގެ ދެ ވަނަ މެޗުގައި އެލްޓީ ސްޕޯޓްސް ކްލަބު އަތުން މޮޅުވެގެންނެވެ.
އެމްބީއޭ ޗެމްޕިއަންޝިޕްގެ ސެމީ ފައިނަލުގެ ދެވަނަ މެޗުގައި ރެޑްލައިން ކްލަބާއި އެލްޓީ ސްޕޯޓްސް ކްލަބު ބައްދަލުކުރި މެޗުގެ ތެރެއިން: މިރޭ ކުޅޭ އެ މުބާރާތުގެ ފައިނަލުގައި ބައްދަލުކުރާނީ މިދިޔަ އަހަރުގެ ފައިނަލުގައި ވެސް ވާދަކުރި ޗެމްޕިއަން ރެޑްލައިނާއި ޓީރެކްސް --- ސަން ފޮޓޯ/ މުހައްމަދު އަފްރާހް
ރޭ ކުޅުނު އެ މެޗުގައި އެލްޓީގެ މައްޗަށް ރެޑްލައިނުން ކުރި ހޯދާފައިވަނީ 97-52 ޕޮއިންޓުންނެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވިފައިވަނީ ރެޑްލައިން ކްލަބަށް 20 ޕޮއިންޓް ހޯދައިދިން ހުސައިން ހަލީމެވެ.
ފިރިހެން ޑިވިޝަނުގެ ފައިނަލުގައި ރެޑްލައިން ކްލަބާއި ޓީރެކްސް ބައްދަލުކުރާ މެޗު ކުޅުމަށް ހަމަޖެހިފައިވަނީ މިރޭ 9:00 ގައެވެ. މިދިޔަ އަހަރުގެ ފައިނަލުގައި ރެޑްލައިނާއި ޓީރެކްސް ބައްދަލުކުރި މެޗު ވެސް ފާހަގަކޮށްލެވުނީ ވާދަވެރި މެޗެއްގެ ގޮތުގައެވެ.