20 Aug 2016, 20:10
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމްކޮށްގެން ކުރިއަށް ގެންދާ ސޮނީ ސްޕޯޓްސް އިންޓަ ރިސޯޓް ވޮލީބޯލް ޗެމްޕިއަންޝިޕްގެ ޒޯން ދޭއްގެ ފައިނަލުގައި ފަސޭހަކަމާއެކު އޮޅުވެލި ބީޗް އެންޑް ސްޕާ ބަލިކޮށް، ފިހާޅޮހި ރިސޯޓުން ޗެމްޕިއަންކަން ހޯދައިފި އެވެ.
ފިހާޅޮހި ރިސޯޓުގައި މިއަދު ހަވީރު ކުޅުނު ޒޯން ދޭއްގެ ފައިނަލް މެޗުގައި ފަސޭހަކަމާއެކު ސީދާ ތިން ސެޓުން އޮޅުވެލީ އަތުން ފިހާޅޮހި ވަނީ މޮޅުވެފަ އެވެ.
ޒޯން ދޭއްގެ ފައިނަލުގައި ކުޅުނު ފުރަތަމަ ސެޓު ފިހާޅޮހިން ގެންގޮސްފައިވަނީ 25-18 އިންނެވެ. ދެ ވަނަ ސެޓު 25-15 އިން ފިހާޅޮހި ގެންދިޔަ އިރު، ތިން ވަނަ ސެޓު އެ ޓީމުން ގެންގޮސްފައިވަނީ 25-19 އިންނެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވިފައިވަނީ ފިހާޅޮހީގެ ގައުމީ ޓީމު ކުޅުންތެރިޔާ އަޝްފާގު އާދަމް (އައްކަޅޭ) އެވެ.
ޒޯން ދޭއްގެ އެންމެ މޮޅު ހަ ކުޅުންތެރިންނަށް ހޮވިފައި ވަނީ ފިހާޅޮހީގެ އަޝްފާގު އާދަމާއި، އެ ޓީމުގެ އަހްމަދު ޝިމާއު އާއި، އެ ޓީމުގެ އާދަމް އާޒިމާއި، އޮޅުވެލީގެ އިލްޔާސް އަބްދުލް ހަކީމާއި، އެ ޓީމުގެ އަލީ އަބްދުﷲ އަދި ޖުމެއިރަށް ވިއްޓަވެލީގެ އިބްރާހިމް ޝާމިޒެވެ. ޒޯން ދޭއްގެ އެންމެ މޮޅު ކޯޗަކަށް ހޮވިފައި ވަނީ ފިހާޅޮހީގެ ކޯޗު އަހްމަދު މިހާދެވެ.
މުބާރާތުގެ ޒޯން ދޭއްގައި ތިން ޓީމެއް ވާދަ ކުރި އެވެ. އެއީ ފިހާޅޮހި އާއި، އޮޅުވެލި އަދި ޖެމެއިރަށް ވިއްޓަވެލި އެވެ. އޭގެ ތެރެއިން ޗެމްޕިއަންކަން ހޯދި ފިހާޅޮހިން ޒޯން ދޭއްގައި ކުޅުނު އެއްވެސް މެޗަކުން ބަލިވެފައެއް ނުވެ އެވެ.