16 Aug 2016, 17:06
މީގެ ކުރީގެ ކޯޗުން ކޮށްފައިވާ ކަންތައްތަކަށް ފާޑުކިޔުމުގެ ބަދަލުގައި އޭނާގެ މަގުސަދަކީ ޓީމަށް ކާމިޔާބީ ހޯދައިދިނުމަށް މަސަތްކަތް ކުރުން ކަމަށް، ދާދި ފަހުން ރާއްޖޭގެ ގައުމީ ފުޓްބޯޅަ ޓީމާ ހަވާލުވި އޮސްޓްރޭލިއާގެ ޑަރެން ސްޓެވާޓް ބުނެފިއެވެ.
މިދިޔަ މަހު ފަހުކޮޅު ގައުމީ ޓީމާ ހަވާލުވި ސްޓެވާޓް، އެފްއޭއެމް ހައުސްގައި މިއަދު ބޭއްވި ނޫސްވެރިންގެ ބައްދަލުވުމުއްގައި ބުނީ، އޭނާއަކީ އަބަދުވެސް ޕޮސިޓިވްކޮށް ވިސްނާ މީހެއް ކަމަށާއި އޭނާގެ މަސައްކަތަކީ ހަވާލުވެފައިވާ ޒިންމާ ފުރިހަމައަށް އަދާކުރުން ކަމަށެވެ.
"އަހަރެން ބަލާލައިފިން ލީގުގެ ބައެއް މެޗުތަށް ވެސް. ހުނަރުވެރި ރަނގަޅު ކުޅުންތެރިންތަކެއް އެބައުޅޭ. އަހަރެންގެ އަމާޒަކީ މި ޓީމާއެކު ކަނޑައަޅާފައިވާ ޓާގެޓަށް ވާސިލްވުން،" ގައުމީ ޓީމާ ހަވާލުވުމަށް ފަހު މީޑިއާތަކަށް ދިން ފުރަތަމަ އިންޓަވިއުގައި ސްޓެވާޓް ބުންޏެވެ.
ޕްރޮފެޝަނަލް ފުޓްބޯޅަ ކުޅުން 2001 ވަނަ އަހަރު ހުއްޓާލި ސްޓެވާޓް ވަނީ، 2009 ވަނަ އަހަރު މެލޭޝިއާގެ ގޮމްބެކް ޔުނައިޓެޑަށް ކޯޗު ކޮށްދީ 2012 ވަނަ އަހަރު ސިންގަޕޫރުގެ ބެލެސްޓިއާ ޚަލްސާއަށް ބަދަލުވެ ޖެހިގެން އައި އަހަރު އެ ޓީމަށް އެސްލީގް ވެސް ކާމިޔާބުކޮށްދީފައެވެ.
ގައުމީ ފުޓްބޯޅަ ޓީމްގެ ކޯޗު ސްޓެވާޓް މިއަދު ނޫސްވެރިންނާ ބައްދަލުކޮށް ވާހަކަ ދައްކަނީ --- ސަން ފޮޓޯ: ފަޔާޒް މޫސާ
ސްޓެވާޓް އެންމެ ފަހުން ކޯޗްކޮށްދީފައިވަނީ 2014 ވަނަ އަހަރު ސިންގަޕޫރުގެ ވުޑްލޭންޑް ވެލިންގްޓަނަށެވެ. އަދި މިއީ އޭނާ ގައުމީ ޓީމަކަށް ކޯޗުކަން ކޮށްދޭ ފުރަތަމަ ފަހަރެވެ.
"ކުލަބަކަށް ކޯޗުކަން ކޮށްދިނުމާއި ގައުމީ ޓީމަށް ކޯޗުކަން ކޮށްދިނުމާއި ވަރަށް ތަފާތު ވާނެ. މިއީ ވަރަށް ބޮޑު ޗެލެންޖެއް. ނަމަވެސް ކުލަބާއި އެއްގޮތަށް ގައުމީ ޓީމްގައި ވެސް ހަމަ ކުރާނީ އެއް މަސަތްކަތްތަކެއް،" ސްޓެވާޓް ބުންޏެވެ.
އޭނާ ބުނީ މިހާރުގެ ހުރިހާ ވެސް ވިސްނުމެއް ހުރީ އޭޝިއަން ކަޕް ކޮލިފައިންގެ ޕްލޭއޮފްގައި ލާއޯސްއާ ދެކޮޅަށް ސެޕްޓެމްބަރު މަހު ހަ ވަނަ ދުވަހު މާލޭގައި ކުޅޭ މެޗާއި އޭގެ ހަތަރު ދުވަސް ފަހުން ލާއޮސްގައި އެގައުމާ ދެކޮޅަށް ކުޅޭ މެޗަށް ކަމަށެވެ.
"އަހަރެންނަށް އިނގޭ ރާއްޖެއަށާއި މި ޓީމަށް އެ ދެމެޗުގެ މުހިންމު ކަން. މިހާރުގެ ހުރިހާ ވެސް ވިސްނުމެއް ހުރީ އެ މެޗުން ގައުމީ ޓީމަށް ރަނގަޅު ނަތީޖާއެއް ނެރެދިނުން،" ސްޓެވާޓް ބުންޏެވެ.
އޮސްޓްރޭލިއާގެ ގައުމީ ޓީމަށް 1992 ވަނަ އަހަރު ތިން މެޗު ކުޅެދީފައިވާ ސްޓެވާޓް ވަނީ އެ ގައުމުގެ އެއްވަނަ ޑިވިޝަންގެ ބައެއް ކްލަބުތަކުގެ އިތުރުން މެލޭޝިއާގެ ދެ ކުލަބަކަށް ވެސް ކުޅެފައެވެ.