16 Aug 2016, 11:37
ކަތަމަންޑޫ (އޮގަސްޓް 16): ނޭޕާލްގެ ފަރުބަދަމަތީ މަގަކުން ދަތުރު ކުރަމުން ދިޔަ ބަހެއް ފުރޮޅާލުމުގެ ސަބަބުން 33 މީހަކު މަރުވެ، 28 މީހަކަށް އަނިޔާވެއްޖެ އެވެ.
ރިޕޯޓުތަކުގައިވާ ގޮތުން އިއްޔެ ފުރޮޅާލި ބަހުގައި ގިނައިން ތިބީ މިދިޔަ އަހަރު ނޭޕާލަށް އައި ބިންހެލުމުގައި ހާލުގައި ޖެހުނު މީހުންނެވެ. އޭރު އެމީހުން ދަތުރު ކުރަމުން ދިޔައީ ބިންހެލުމުގައި ހާލުގައި ޖެހުނު މީހުންނަށް ސަރުކާރުން ފުރަތަމަ ފަހަރަށްދޭ ފައިސާގެ އެހީ ހޯދުމަށް ކަމަށް ރިޕޯޓުތަކުގައިވެ އެވެ.
ނޭޕާލްގެ ފުލުހުންނާއި އަސްކަރިއްޔާ އިން ދަނީ މީހުން ސަލާމަތް ކުރުމުގެ މަސައްކަތް ކުރަމުންނެވެ.
އެ ހާދިސާގައި އަނިޔާވި މީހެއް ކަމަށްވާ ކޮޕިލާ ގައުޓަމް ބުނި ގޮތުގައި ބަސް ފުރޮޅާލި އިރު އޭގައި 85 ފަސިންޖަރުންގެ އިތުރުން، ކާޑުގެ ބާވަތްތައްވެސް ހުއްޓެވެ. އަދި ބަސް ފުރޮޅާލި އިރު އޭގެ އިން ބައެއް މީހުން ވެއްޓުމުގެ ސަބަބުން މަރުވި މީހުންގެ އަދަދު އިތުރުވާނެ ކަމަށް އޭނާ ލަފާ ކުރެ އެވެ.
ވިއްސާރަ މޫސުމުގައި ނޭޕާލްގެ މަގުތަކުގައި އެކްސިޑެންޓުތައް ހިނގުމަކީ އާއްމު ކަމެކެވެ. (ގާޑިއަން)