15 Aug 2016, 12:11
އޮލިމްޕިކް ކުޅިވަރު އީދުގެ އެންމެ ފަހު ދެ ފަހަރު ވެސް 100 މީޓަރު ދުވުން ކާމިޔާބު ކޮށްފައިވާ ޖެމެއިކާގެ އުސައިން ބޯލްޓް މިފަހަރުގެ ދުވުން ވެސް ކާމިޔާބް ކޮށް އެއިވެންޓުން ޖެހިޖެހިގެން ތިން ވަނަ ފަހަރު ރަން މެޑަލް ހޯދައިފިއެވެ.
ބްރެޒިލްގެ ރިއޯ ޑި ޖެނީރޯގައި މިހާރު ކުރިއަށްދާ އޮލިމްޕިކް ކުޅިވަރު މުބާރާތުގެ 100 މީޓަރު ދުވުމުގެ ފައިނަލް ބޯލްޓް ކާމިޔާބު ކުރީ 9.81 ސިކުންތުން ރޭސް ނިންމައިގެންނެވެ. އޭނާ އާއި އެންމެ ގާތުން ވާދަކުރި އެމެރިކާގެ ޖަސްޓިން ގެޓްލިން އަށް ރޭސް ނިންމުނީ ބޯލްޓަށް ވުރެން 0.08 ސުކުންތު ލަހުންނެވެ.
"އަހަރެން އުންމީދު ކޮށްގެން ހުރީ މިއަށް ވުރެން ވެސް ބާރާށް ދުވެ އަވަހަށް ރޭސް ނިންމަން. ނަމަވެސް މި ނަތީޖާއާ މެދު ވެސް ހިތްހަމަ ޖެހޭ. އަހަރެންގެ މަގުސަދަކީ ރަން މެޑަލް ހޯދުން،" ދުނިޔޭގެ އެންމެ ބާރު ދުވުންތެރިޔާ ބޯލްޓް ބުންޏެވެ.
ބޯލްޓް އެންމެ ފުރަތަމަ އޮލިމްޕިކްސްގައި ފެނިގެން ދިޔައީ 2004 ވަނަ އަހަރު ގްރީސްގެ އެތެންސްގައި ބޭއްވި މުބާރާތުންނެވެ. ނަމަވެސް އެ އަހަރުގެ އޮލިމްޕިކްސްގައި އޭނާ 100 މީޓަރު ދުވުމުގައި ވާދަކޮށްފައި ނުވާއިރު 200 މީޓަރު ދުވުމުން ވަނީ ރަން މެޑަލް ހޯދާފައެވެ.
އެންމެ ފަހުން 2012 ވަނަ އަހަރު އިނގިރޭސި ވިލާތުގެ ލަންޑަންގައި ބޭއްވި އޮލިމްޕިކްގެ 100 މީޓަރު ދުވުން ބޯލްޓް ކާމިޔާބު ކޮށްފައި ވަނީ 9.63 ސިކުންތުންނެވެ. އޭގެ ކުރިން 2008 ވަނަ އަހަރު ޗައިނާގެ ބެއިޖިންގައި ބޭއްވި އޮލިމްޕިކްސްގެ 100 މީޓަރު ދުވުން ބޯލްޓް ކާމިޔާބް ކުރީ 9.69 ސިކުންތުންނެވެ.
މިފަހަރުގެ އޮލިމްޕިކްސް އަކީ އޭނާގެ ފަހު މުބާރާތް ކަން އިއުލާން ކޮށްފައިވާ ބޯލްޓް އަކީ 100 މީޓަރު ދުވުމުގެ ދުނިޔޭގެ ރިކޯޑް ވެސް އޮންނަ ދުވުންތެރިޔާ އެވެ. އެއީ 2009 ވަނަ އަހަރު ޖަރުމަނުގެ ބާލިންގައި ބޭއްވި ވޯލްޑް ޗެމްޕިއަންޝިޕް 9.58 ސިކުންތުން ނިންމައިގެންނެވެ.