10 Aug 2016, 08:54
އިސްލާމިކް ސްޓޭޓް (އައިއެސް)ގެ އިސްފަންތީގައި ހިމެނޭ ކަމަށް ބެލެވޭ މީހަކު ޖަރުމަނުގެ ސްޕެޝަލް ފޯސް އިން ހައްޔަރުކޮށްފި އެވެ.
ޖަރުމަނުގެ ހުޅުނގުގައި އޮންނަ ރައިންލޭންޑުގެ ދާހިލީ ވަޒީރުގެ ތަރުޖަމާން ވިދާޅުވީ، އޭނާ ހައްޔަރުކޮށްފައިވަނީ މިދިޔަ ހުކުރު ދުވަހު ޖަރުމަނުގެ ހުޅަނގުގައި އޮންނަ ސްޓޭޓެއްގެ ސިޓީއަކުން ކަމަށެވެ. ނަމަވެސް އޭނާއާ ގުޅޭއިތުރު މައުލޫމާތެއް ހާމަކޮށްފަ އެއްނުވެ އެވެ.
ޖަރުމަނުގެ ނޫސް އެޖެންސީއެއް ކަމަށްވާ ޑީޕީއޭ އިން ރިޕޯޓްކުރާ ގޮތުގައި، އެމީހާ ހައްޔަރުކޮށްފައިވަނީ ހުޅަނގުގައި އޮންނަ ގެލްސެންކާޗިން ނަމަކަށް ކިޔާ ސިޓީއެއްގައި ހުންނަ ޖަލުގެ ގައިދީއަކު ދިން މައުލޫމާތެއްގެ މައްޗަށް ކަމަށެވެ.
އައިއެސްއަށް ނިސްބަތްވާ މީހަކު ޖަރުމަނުން ހައްޔަރުކޮށްފައިމިވަނީ، ޖަރުމަނުގެ އެންމެ ބޮޑު ފުޓްބޯޅަ ލީގު، ބުންޑެސް ލީގާ ހުޅުވުމުގެ މެޗަށް އަމާޒުކޮށް ބަޔަކު ހަމަލާއެއް ދޭން އުޅޭކަމަށް އެގައުމުގެ ސިފައިންނަށް މައުލޫމާތުތަކެއް ލިބިފައިވާ ވަގުތެއްގައެވެ.
ބުންޑެސް ލީގާ ސީޒަން ފެށުމަށް ހަމަޖެހިފައިވަނީ މިމަހުގެ 26 ވަނަ ދުވަހު އެވެ.
ވޭތުވެދިޔަ މަސްތަކުގައި ދީފައިވާ ހަމަލާތަކުގެ ސަބަބުން އެލާޓްގައި އޮތް ޖަރުމަނުން ހިމާޔަތް ހޯދަން އައިސް އެގައުމުގައި އުޅޭ ބަޔަކު ވަނީ މިދިޔަ މަހުގެ ތެރޭގައި ބަވަރިއާގައި ދެ ހަމަލާއެއް ދީފައެވެ. އެ ހަމަލާތަކުގެ ޒިންމާ އައިއެސް އިން ފަހުން ވަނީ ނަގާފައެވެ.