09 Aug 2016, 15:51
ބާކޫ(އޮގަސްޓް 9): ރަޝިޔާއާއި އީރާނާ އަދި އަޒަރުބައިޖާންގެ ރައީސުން އަޒަރުބައިޖާންގެ ވެރިރަށް ބާކޫ ގައި އިއްޔެ ބޭއްވި ސަމިޓް ބައްދަލުވުމުގައި އެންމެ ބޮޑަށް މަޝްވަރާ ކުރެއްވީ ރަޝިޔާއާއި ޔޫރަޕްގެ އުތުރުގެ ގައުމުތަކުން ގެންނަ މުދާ އިންޑިޔާ އަށާއި އިންޑިޔާ ކަނޑުގެ ސަރަހައްދަށް ގެނެވޭނެ މަގެއް އެކަށައެޅުމާބެހޭގޮތުން ކަމަށް ޚަބަރު ލިބިއްޖެއެވެ.
7200 ކިލޯމީޓަރުގެ ދިގު މިމަގަކީ ރަޝިޔާއާއި ޔޫރަޕްގެ އުތުރުގެ ގައުމުތައް އަޒަރުބައިޖާންއާއި އީރާނާއި ގަލްފާއި އިންޑިޔާ ކަނޑު ގުޅުވައިދޭ (އެއްގަމާއި ކަނޑު ހިމެނޭ) ރޫޓެކެވެ. މިރޫޓުގެ އެއްގަމުބައިގައި ރޭލްވޭ އެޅުމަށާއި ކަނޑުގެ ބައިގައި ބަނދަރުތައް ގާއިމްކުރުމާބެހޭގޮތުން އެސަމިޓްގައި މަޝްވަރާކޮށްފައިއެވެ. މި މަގު ނުވަތަ ރޫޓް އުފައްދައިފިނަމަ މިއީ ސްވޭޒް ކެނެލްއާ މުޅިން އެއްވަރު ނުވިނަމަވެސް މުސްތަގްބަލްގައި އެ ކެނެލްއާ ވާދަކުރެވޭވަރުގެ ރޫޓަކަށް ވެގެންދާނެ ކަމަށް ރިޕޯޓްތައް ބުނެއެވެ.
އުތުުރު ޔޫރަޕާއި އިންޑިޔާ ކަނޑު ގުޅުވައިދޭ ރޫޓުގެ ކުރެހުމެއް
މިރޫޓު މެދުވެރިކޮށް އުތުރު ޔޫރަޕްގެ ގައުމުތަކުން ގެންނަ މުދާ 14 ދުވަހުގެ ތެރޭގައި އިންޑިޔާކަނޑުގެ ސަރަހައްދަށް (އީރާން ޕާކިސްތާން އިންޑިޔާ) ފޯރާއިރު ސްވޭޒް ކެނެލް މެދުވެރިކޮށް އުތުރު ޔޫރަޕްގެ ގައުމުތަކުން މި ސަރަހައްދަށް މުދާގެންދިޔުމަށް 40 ދުވަސް ނަގާކަމަށްވެއެވެ. އަދި ޓްރާންސްޕޯޓް އަގުވެސް 45 އިންސައްތަ ކުޑަވާކަމަށް މިކަމާބެހޭގޮތުންކުރި ދިރާސާތައް ބުނާކަމަށްވެއެވެ. މި ރޫޓް އުތުރުން ދެކުނަށް ބޭނުންކުރެވޭއިރު (އުތުރު ޔޫރަޕުން އިންޑިޔާ ކަނޑުގެ ސަރަހައްދަށް) ބޭނުން ކުރެވޭއިރު ދެކުނުން އުތުރަށް (އިންޑިޔާ ކަނޑުގެ ސަރަހައްދުން އުތުރު ޔޫރަޕަށްވެސް) ބޭނުންކުރެވޭނެއެވެ.
ރަޝިޔާއާއި ޔޫރަޕްގެ އުތުރުގެ ގައުމުތައް އަޒަރުބައިޖާންއާއި އީރާނާއި ގަލްފާއި އިންޑިޔާ ކަނޑު ގުޅުވައިދޭ ވިޔަފާރީގެ ރޫޓަކީ 2000 ވަނަ އަހަރު އީރާނާއި ރަޝިޔާ ގުޅިގެން ކުރަހާފައިވާ ރޫޓެކެވެ. އެރޫޓް ތަރައްގީ ކުރުމާމެދު ގޮތެއް ނުނިންމިފައިވަނީ އީރާނާދެކޮޅަށް ހުޅަނގުން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުންނެވެ. މިފިޔަވަޅުތައް މިހާރު އުވާލައި އީރާނަށް ވިޔަފާރީގައި ބޮޑެތި ފުރްސަތުތަކެއް ލިބުމުން މިހާރު މިތިން ގައުމުންވަނީ މިރޫޓް ތަރައްގީ ކުރުމަށް އުސޫލެއްގެ ގޮތުން އެއްބަސްވެފައެވެ.
ރަޝިޔާގެ ރައީސް ވްލަޑިމިއަރ ޕޫޓިން އާއި އީރާނުގެ ރައީސް ހަސަން ރޫހާނީ އާއި އަޒަރުބައިޖާންގެ ރައީސް އިލްހާމް އަލިއޭވް ބޭއްވި ސަމިޓްގައި މައިގަނޑު ގޮތެއްގައި މަޝަވަރާ ކުރެއްވީ އިގްތިސާދީ މައްސަލަތަކާއި ސަރަހައްދީ ވިޔަފާރި ކުރިއެރުވުމާބެހޭގޮތުންނެވެ. (ނޫސްއެޖެންސީތައް)