08 Aug 2016, 12:07
ގައުމީ އެއާލައިން، މޯލްޑިވިއަން އިން އަވައްޓެރި އިންޑިއާގެ ނިއުދިއްލީއަށް ދަތުރުތައް ފެށުމަށް ތައްޔާރުވަމުން އަންނަ ކަމަށް ޓޫރިޒަމް މިނިސްޓަރު މޫސާ ޒަމީރު ވިދާޅުވެއްޖެ އެވެ.
ރާއްޖެއަށް މިއަހަރު ޒިޔާރަތްކުރި ފަތުރުވެރިންގެ ތެރެއިން 750000 ވަނަ ފަތުރުވެރިޔާ އަށް މަރުހަބާ ކިޔުމަށް އިއްޔެ އިބްރާހިމް ނާސިރު އިންޓަނޭޝަނަލް އެއާޕޯޓް (އައިއެންއައިއޭ)ގެ ވީއައިޕީ ލައުންޖުގައި ބޭއްވި ރަސްމިއްޔާތަށްފަހު ނޫސްވެރިންނާ ވާހަކަފުޅު ދައްކަވަމުން މިނިސްޓަރު ވިދާޅުވީ، އިންޑިއާ އަކީ ވެސް މިހާރު ރާއްޖޭގައި ކުރިއަރަމުން އަންނަ މާކެޓެއް ކަމަށެވެ.
އެހެންކަމުން ރާއްޖެއަށް ފަތުރުވެރިން އަންނަ އަދަދު އިތުރުކުރުމަށް ކުރިއަރަމުން އަންނަ މާކެޓްތަކަށް އިސްކަން ދޭންޖެހޭ ކަމަށާއި އެގޮތުން އިންޑިއާގެ ނިއުދިއްލީއަށް ދަތުރުތައް ފެށުމަށް އައިލެންޑް އޭވިއޭޝަނާއެކު މަސައްކަތް ކުރައްވަމުން އަންނަ ކަމަށް މިނިސްޓަރު ވިދާޅުވި އެވެ.
"އެކި ތަންތާގައި އަޅުގަނޑުމެން މިދަނީ ޓޫރިސްޓުން އަންނަ އަދަދު އިތުރުކުރުމަށް މަސައްކަތްތަކެއް ކުރަމުން. އެގޮތުން އިންޑިއާގެ ނިއުދިއްލީއާ މާލެއާ ކަނެކްޓް ކުރެވޭނެ ގޮތެއްވޭތޯ އައިލެންޑް އޭވިއޭޝަނުން އެ މަސައްކަތްކުރޭ. އެއީ އިންޑިއާއަކީ ވެސް ވަރަށް ބޮޑަށް ކުރިއަރަމުން އަންނަ މާކެޓެއް،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، މިއަހަރަކީ ރާއްޖެއަށް ޒިޔާރަތްކުރާ އަހަރުގެ ގޮތުގައި ފާހަގަކޮށް 1.5 މިލިއަން ޓޫރިސްޓުން ގެނައުމުގެ އަމާޒުގައި މަސައްކަތްތަކެއް ކުރަމުން އަންނަ އިރު، އެ އަދަދަށް ވާސިލްވުމަށް ބުރަ މަސައްކަތްތަކެއް މިހާރުވެސް ކުރައްވަމުން އަންނަ ކަމަށެވެ.