07 Aug 2016, 20:36
ފީނައިގެން ފާނަ މަސްވެރިކަން ކުރަން ތިއްބައި ދޯނީގެ ހުންގާނު ފެއިލްވުމުން ތިން ގަޑިއިރުވަރު ފަތަފަތާ އޮންނަން ޖެހުނު ކަމަށް އެ ދޯނި މަހަށް ދިޔަ މަސްވެރިން ބުނެފި އެވެ.
ފ. ނިލަންދޫއިން ފާނަ މަސްވެރިކަމަށް ގޮސް އުޅުނު މީހުންގެ ތެރެއިން އަށް މީހުން މަސް ބާނަށް މޫދުގައި ތިބެނީ އެކިމީހުން އެކި ދިމާލުގައެވެ. ދޯނީގައި ތިބެނީ ކެޔޮޅާއި ކައްކާއެވެ. ކެޔޮ ދޭތެރެ ދޭތެރެއިން އެކި މީހުން ކައިރިއަށް ދޯނި ދުއްވައެވެ.
ފާނަ އަދި ކަންނެލީގެ މަސްވެރިން ކުރާ އެ ދޯނީގެ އަށް މީހުން މިއަދު ކަނޑުވެފައިވާއިރު އޭގެ ތެރޭގައި ހިމެނޭ އަބްދުﷲ މާނިއު "ސަން"އަށް ބުނީ އެ މީހުން ކަނޑުވީ ދޯނީގެ ހުންގާނު ޖެކްފެއިލް ވުމުން ކަމަށެވެ. އެހެންވުމުގެ ސަބަބުން ތިން ގަޑިއިރުވަރު އެއަށް މީހުން ފަތަފަތާ އޮންނަންޖެހުނު ކަމަށާއި ނަމަވެސް އެއްވެސް އަނިޔާއެއް ނުވާ ކަމަށް އޭނާ ބުންޏެވެ.
"ހުންގާނު ޖެކް ހަލާކުވުމަކުން ނުވެއް ދުއްވޭނު، އެހެންވެ ދޯނި އެޅި އެތާގައި ފަރަށް އަރާފާނެތީ، އޭރު އަހަރެމެން ތިބީ ވަރަށް ދުރުގައި،" މާނިއު ބުންޏެވެ.
ދޯނި އެ މީހުން ތިބި ހިސާބަށް ނައުމުން މޫދުގައި ތިބި އެންމެން އެއްވެފައި ދެ މެއިލް އެއްހާ ދުރުގައި އޮތް ދޯންޏާއި ދިމާލަށް ފަތައިގަތީ ކަމަށާއި ނިލަންދޫއިން އައި ޑިންގީއަކަށް ވަކި ހިސާބަކުން އެމީހުން ނެގީ އެގޮތަށް ފަތާފައިދަނިކޮށް ކަމަށް މާނިއު ބުންޏެވެ.
ކެޔޮޅު އެމްއެންޑީއެފަށް ގުޅިއިރު އެބޭފުޅުން އައީ ދޯންޏަށް ވެސް އެރިފަހުންކަމަށް ވެސް މާނިއު ވިދާޅުވިއެވެ.