06 Aug 2016, 13:42
ޕެރިސް (އޮގަސްޓް 6) : ފްރާންސްގެ ހުޅަނގު އުތުރުގެ ސަރަހައްދެއް ކަމަށްވާ ނޯމަންޑީގެ ސިޓީއެއްކަމަށްވާ ރަވާން ގެ ބަނގުރާ ވިއްކާ ތަނެއްގައި ހިނގި އަލިފާނުގެ ހާދިސާއެއްގައި 13 މީހުން މަރުވެ އެތައްބަޔަކު ފިހިއްޖެއެވެ.
ފްރާންސްގެ މީޑިއާ ރިޕޯޓުތައް ބުނާގޮތުގައި ބާ ގައި އަލިފާން ރޯވީ މީހެއްގެ އުފަންދުވަސް ފާހަގަ ކުރުމުގެ ގޮތުން ބަނގުރަލުގެ ހަފްލާއެއް އެތަނުގައި ކުރިޔަށްދަނިކޮށެވެ. މިހާގިނައަދަދެއްގެ މީހުން މަރުވީ ބާ ގައި މީހުން ތޮއްޖެހިފައި ވުމުގެ ސަބަބުންނާއި މަސްތުވާ ހާލަތުގައި ބައެއްމީހުން ތިބުމުގެ ސަބަބުންކަމަށް ރިޕޯޓްތައް ބުނެއެވެ.
އެ ހާދިސާގައި ފިހުނު މީހުންގެ ތެރެއިން ބައެއް މީހުންގެ ހަށިގަނޑުގެ ބޮޑުބައެއް ފިހިފައިވާތީ އެމީހުންގެ ފުރާނަ ސަލާމަތް ކުރެވޭނެކަމުގެ އުންމީދު ކުޑަކަމަށް އެމީހުން އެނދުމަތިކޮށްފައިވާ ހޮސްޕިޓަލުން ބުނެއެވެ. ފްރާންސްގެ ދާޚިލީ ވަޒީރު ބާނާޑް ކަޒްނޯވް ވަނީ މިއީ ޓެރަރިސްޓް ހަމަލާއެއްކަން ނުވަތަ ނޫންކަން އަދި ސާފުނުވާކަމަށާ މިޙާދިސާ ތަހްގީގް ކުރަން ފަށާފައިވާކަމަށް ވިދާޅުވެފައެވެ.
އިސްލާމީ ގައުމުތަކުގައި ހިނގާ ހަމަނުޖެހުންތަކުގެ ތެރެއަށް ފްރާންސް ވަދެ ހަރުކަށި އަމަލުތައް ހިންގަމުންދާތީ އެގައުމަށްވެސްދަނީ ބޮންގޮއްވުންފަދަ ހަމަލާތައް އަމާޒުވަމުންނެވެ. މިހާތަނަށް ފްރާންސަށް ދީފައިވާ މިފަދަ ހަމަލާތަކުގެ ތެރެއިން ގިނަ ހަމަލާތަކުގެ ފަހަތުގައިވަނީ އެގައުމުގެ މުސްލިމުންނެވެ. ފްރާންސްގައި ހިންގާ ހަރުކަށި އަމަލުތަކުގެ ފަހަތުގައިވާ ކަމުގެ ޒިންމާ އުފުލަނީ އިސްލާމީ ދުނިޔެއަށްވެސް އެންމެ ނުރައްކާތެރި ޖަމާއަތް ކަމަށްވާ އައިއެސް ޖަމާއަތެވެ. ނަމަވެސް އެ ހަމަލާތަކަކީ އައިއެސްއިން ދިން ހަމަލާތަކެއްކަން ސާބިތު ކުރެވިފައެއް ނުވެއެވެ.
އައިއެސްގެ ނުރައްކާ ފްރާންސަށްވުރެ ބޮޑީ އިސްލާމީ ގައުމުތަކަށެވެ. އެޖަމާއަތުގެ ޝިކާރައަކަށް އެންމެ ބޮޑަށް ވެގެންދަނީ ސޫރިޔާއާއި އިރާގާއި ލީބިޔާގެ ރައްޔިތުންނެވެ. (އަލްޖަޒީރާ)