04 Aug 2016, 01:40
އިސްލާމިކް މިނިސްޓްރީގެ މިސްކިތު ފަންޑަށް ފައިސާ ހޯދުމުގެ ގޮތުން އެމްޓީސީސީއާ ހަވާލުކޮށްގެން މާފަންނުގެ ހުޅަނގު ކޮޅުގައި އެޅި "ދާރުލް އީމާން" ވަގުފު އިމާރާތުން ފިނޭންސް މިނިސްޓްރީއަށް ދޭން ނިންމި ތިން ފަންގިފިލާއަކަށް ބަދަލު ގެނައީ އިސްލާމިކް މިނިސްޓްރީން މަޝްވަރާކޮށް، އެންމެ ފައިދާ ހުރި ގޮތެއް ބަލާފައި ކަމަށް ފިނޭންސް މިނިސްޓްރީން ބުނެފިއެވެ.
ވަގުފު އިމާރާތް "ދާރުލް އީމާން" އަޅާފައި ވަނީ މަޖީދީ މަގުގައި، މާފަންނު މަދަރުސާއާއި، އައިލެންޑް އޭވިއޭޝަންގެ ހެޑް އޮފީސް މިހާރު ހިންގާ މ. ރައިވެރިގެއާ ދެމެދު އޮންނަ ބިމުގައެވެ. މި އިމާރާތުގެ ބިންގާ އެޅީ 27 މާޗު 2014 ގައެވެ. އިމާރާތުގެ މަސައްކަތް ކޮށްފައި ވަނީ ީންނެވެ.
ވަގުފު އިމާރާތުން ފިނޭންސް މިނިސްޓްރީއަށް ދިނުމަށް އިސްލާމިކް މިނިސްޓްރީން ނިންމި އެ އިމާރާތުގެ އެންމެ މަތީގައި ހުންނަ ތިން ފަންގިފިލާ ދިނުމަށް ފަހު ވަގުތު އިސްލާމިކް މިނިސްޓްރީން ދެކޮޅު ހެދި ކަމަށް ފިނޭންސް މިނިސްޓްރީގެ އޮފިޝަލަކާ ހަވާލައިދީ އިއްޔެ މީޑިއާގައި ރިޕޯޓު ކުރެވުމާ ގުޅިގެން ފިނޭންސް މިނިސްޓްރީން ނެރުނު ބަޔާނެއްގައި ބުނީ، ފިނޭންސް މިނިސްޓްރީ އާއި ހަވާލުކުރުމަށް މަޝްވަރާ ކުރެވުނު ފަންގިފިލާތަކަށް ބަދަލު ގެނައުމަށް ނިންމީ ދެމިނިސްޓްރީގެ އިސްވެރިން މަޝްވަރާ ކޮށްގެން ކަމަށެވެ.
ދާރުލް އިމާން ވަގުފު އިމާރާތަށް ބަދަލު ކުރުމަށް ނިންމާފައި ވަނީ ފިނޭންސް މިނިސްޓްރީގެ ދަށުން ހިންގާ ނޭޝަނަލް ބިއުރޯ އޮފް ސްޓެޓިސްޓިކްސްގެ އޮފީހެވެ.
ފިނޭންސް މިނިސްޓްރީން ވަނީ، ވަގުފު އިމާރާތުގެ ފަންގިފިލާތަކުގެ "މައްސަލަ ޖެހި"، ސްޓެޓިސްޓިކްސްގެ އޮފީސް އެތަނަށް ބަދަލު ކުރުން ލަސް ވާތީ، އަލަށް އިމާރާތް ކުރުމަށް ހަމަޖެހިފައިވާ ފިނޭންސް މިނިސްޓްރީގެ 25 ބުރީގެ އޮފީސް އިމާރާތުގެ މަސައްކަތް ފެށުން ލަސްވަމުންދާ ކަމަށް ދެކެވޭ ވާހަކަތައް ދޮގު ކޮށްފައެވެ.
ފިނޭންސުން ބުނީ ދާރުލް އީމާނަށް ސްޓެޓިސްޓިކްސް ބިއުރޯ ބަދަލު ކުރުން ލަސް ވި ނަމަވެސް، އެއީ 25 ބުރީގެ ފިނޭންސް އިމާރާތުގެ މަސައްކަތަށް އެއްވެސް ލަސްކަމެއް އަންނަނެ ކަމެއް ނޫން ކަމަށެވެ.
އަދި 25 ބުރީގެ އިމާރާތް އެޅުމުގެ މަސައްކަތް ފެށުމަށް ކުރަންޖެހޭ ކަންކަން މިހާރުވެސް ކުރިޔަށް ދާ ކަމަށް ފިނޭންސް މިނިސްޓްރީން ބުނެއެވެ.
"އެހެންކަމުން، އިސްވެދެންނެވުނު ސުރުޚީގެ ދަށުން ލިޔެފައިވާ މަޢުލޫމާތު ތަކަކީ މިކަމުގެ މަޢުލޫމާތު ނޭނގޭ ކަމާ ގުޅުން ނެތްފަރާތަކުން ދީފައިވާ މަޢުލޫމާތު ތަކެއްކަމުގައި ދެންނެވީމެވެ،" ފިނޭންސް މިނިސްޓްރީން ބުންޏެވެ.