03 Aug 2016, 10:50
އާޖެންޓީނާ އަށް އަލުން ލިއޮނެލް މެސީ ބޭނުންވާ ކަމަށް އެ ގައުމުގެ ފުޓްބޯޅަ ލެޖެންޑް ޖޯޖް ވަލްޑާނޯ ބުނެފި އެވެ.
މި އަހަރު އެމެރިކާގައި ކުރިއަށްދިޔަ ކޮޕާ އެމެރިކާގެ ފައިނަލުގައި ޗިލީ އަތުން އާޖެންޓީނާ ބަލިވި މެޗަށްފަހު، ގައުމީ ޓީމަށް ކުޅުން ހުއްޓާލިކަން މެސީ އިއުލާންކުރުމާ ގުޅިގެން ގިނަ ބަޔަކަށް ހައިރާންކަން ލިބިގެން ގޮސްފައިވެ އެވެ.
މެސީއާ ވާހަކަދެއްކުމުގެ ވިސްނުމެއް އާޖެންޓީނާ ގައުމީ ޓީމާ އަލަށް ހަވާލުވި ކޯޗު އެޑްގާޑޯ ބޫޒާ ގެންގުޅޭ އިރު، މެސީގެ ރިޓަޔާމަންޓް އަލުން އަނބުރާ ގެންދަން ޖެހޭ ކަމަށް ވޯލްޑް ކަޕް 1986 ވަނަ އަހަރު އާޖެންޓީނާއާ އެކު ވޯލްޑް ކަޕް ކާމިޔާބުކުރި ވަލްޑާނޯ ވެސް ގަބޫލުކުރެ އެވެ.
"އެކަހަލަ ކަންތައްތަކުން އެނބުރި އައުމަށް ރަނގަޅު ވަގުތު ބޭނުންވާނެ. އެކަމަކު ވީހާ ވެސް އަވަހަކަށް މެސީ އެނބުރި ގެންނަން ޖެހޭނެ،"ފޮކްސް ސްޕޯޓްސްއަށް ދިން އިންޓަވިއުއެއްގައި އުމުރުން 60 އަހަރުގެ ވަލްޑާނޯ ބުންޏެވެ.
އޭނާ ބުނީ، މެސީ އަށް ބޮޑު ޕްރެޝަރުތަކަކާ ކުރިމަތިވެފައިވާ ކަމަށާއި މެސީ އަކީ ޓީމަށް ވަރަށް މުހިއްމު ކުޅުންތެރިއެއް ކަމަށެވެ. އަދި މެސީ އަކީ ދުނިޔޭގެ އެންމެ މޮޅު ކުޅުންތެރިޔާ ކަމަށް ވެސް ވަލްޑާނޯ ގަބޫލުކުރެ އެވެ.