31 Jul 2016, 12:44
ފާތިރު މަރާލިތާ މިއަދަށް 57 ދުވަސް ވެފައިވާ އިރު އެކަމުގެ ތުހުމަތުގައި ހޯދަމުންދާ ދެމީހުންގެ ތެރޭގައި ހިމެނޭ މ. ކުރިރުއްގޭ އިރުފާން ރުޝްދީ،21، އަދިވެސް ނުފެންނަ ކަމަށް ފުލުހުން ބުނެފި އެވެ.
ފުލުހުންގެ މީޑިއާ އޮފިޝަލް މިއަދު 'ސަން' އަށް ވިދާޅުވީ، އަދިވެސް އިރުފާން ހޯދިފައި ނުވާ ކަމަށާއި އޭނާ ހޯދުމުގެ މަސައްކަތް ފުލުހުން އަދިވެސް ކުރަމުންދާ ކަމަށެވެ.
މިދިޔަ ޖޫން މަހުގެ ތިން ވަނަ ދުވަހުގެ ރޭ ފާތިރު މަރާލި ކަމުގެ ތުހުމަތުގައި ހައްޔަރު ކޮށްފައިވަނީ، ގދ. ތިނަދޫ، ލަވްނެސްޓް، އުމުރުން 15 އަހަރުގެ އިބާދަތު ލަތީފު އެވެ. އޭނާ ހައްޔަރުކޮށްފައިވަނީ ފުލުހުން ހިންގި ޚާއްސަ އޮޕަރޭޝަނެއްގައި މިދިޔަ ޖޫން މަހުގެ 24 ވަނަދުވަހު ހުޅުމާލެއިންނެވެ.
އޭނާ އަދިވެސް ހުރީ ފުލުހުންގެ ތަހުގީގަށް ހައްޔަރުުކޮށްފައި ކަމަށް ފުލުހުން ބުންޏެވެ.
ޖޫން ތިންވަނަ ދުވަހު މާލޭގައި 14 އަހަރުގެ ދެ ކުޑަކުދިން މަރާލާފައި ވެ އެވެ. ފާތިރުގެ އިތުރުން އެދުވަހު މަރާލާފައި ވަނީ ކ. ކާށިދޫ، ރަންފަރު، އަހުމަދު އިރުޝާން ހިލްމީ އެވެ. އޭނާގެ މަރާ ގުޅިގެން ފުލުހުން ވަނީ ހަތް މީހަކު ހައްޔަރު ކޮށްފަ އެވެ. އެ ހަތް މީހުންގެ ތެރެއިން ހަ މީހަކީ 18 އަހަރުން ދަށުގެ ކުޑަކުދިންނެވެ.