29 Jul 2016, 13:57
ސްޕެއިންގެ ވެލެންސިއާއަށް ކުޅޭ ޖަރުމަނު ޑިފެންޑަރު ޝޮރްދާން މުސްތަފީ ގަންނަން އިނގިރޭސި ކްލަބް އާސެނަލުން މަސައްކަތްކުރަމުން ދާކަމަށް ރިޕޯޓްތައް ބުނެފިއެވެ.
ސްކައި ޖާމަނީން ބުނާގޮތުން، އާސެނަލުން މުސްތަފީއަށް ޝައުގުވެރިކަން ފާޅުކޮށްފައިވަނީ، އެ ކްލަބުގެ ޖަރުމަން ޑިފެންޑަރު ޕާ މަޓަސެކަރއަށް ލިބިފައިވާ އަނިޔާގެ ސަބަބުން ކުޅުމާ ދުރުގައި ހުންނަން ޖެހިފައިވާތީ އޭނާ ނެތްތަން ފޫބެއްދުމުގެ ގޮތުންނެވެ.
އުމުރުން 24 އަހަރުގެ ޑިފެންޑަރުގެ އެއްބަސްވުމުގައި، އޭނާއަށް އެހެން ކްލަބަކަށް ދެވޭނީ 42.1 މިލިއަން ޕައުންޑުގެ ފީއެއް ވެލެންސިއާއަށް ދިނުމަށް ފަހުއެވެ. އެހެން ނަމަވެސް، އާސެނަލުން ބޭނުންނަމަ، 25.3 މިލިއަން ޕައުންޑާއި އިތުރު 8.4 މިލިއަން ޕައުންޑުގެ ފީއެއް ދައްކައިގެން އެ ވިޔަފާރި ނިންމާލުމުގެ ފުރުސަތު އޮތްކަމަށްވެސް ރިޕޯޓްތައް ބުނެއެވެ.
ޖަރުމަނުގެ ކްލަބު ހެމަބާގުން އިނގިރޭސި ކްލަބު އެވަޓަންއަށް 2009 ވަނަ އަހަރު މުސްތަފީ ބަދަލުވީ ނަމަވެސް ޑޭވިޑް މޮއެސްގެ އިރުޝާދުގެ ދަށުން އޭނާ އެ ކްލަބުގައި ހޭދަކުރި ތިން އަހަރު ދުވަހުގެ ތެރޭގައި ޕްރިމިއަ ލީގު މެޗެއް ކުޅުމުގެ ފުރުސަތު ލިބިފައެއް ނުވެއެވެ. ދެން އޭނާ ބަދަލުވީ ހިލޭ ޓްރާންސްފަރ އެއްގައި އިޓަލީގެ ސަމްޕޯޑިއާ އަށެވެ.
މަޓަސެކާރގެ ކަކުލަށް ލިބުނު އަނިޔާއާ ގުޅިގެން އޭނާއަށް މިސީޒަންގެ ކުރީކޮޅުގައި ނުކުޅެވޭތީ އާސެނަލްގެ ކޯޗު އާސެން ވެންގާ ދަނީ، އެ ކްލަބަށް ސެންޓްރަލް ޑިފެންޑަރެއް ހޯދުމަށް ވަރަށް ބޮޑަށް މަސައްކަތްކުރަމުންނެވެ.