29 Jul 2016, 01:26
ކޮންމެ ދުވަހަކު ވެސް ތަފާތު ހޯދުންތައް ސައިންސްވެރިން ހޯދަމުން އަންނަ އިރު، މި ހަފްތާގައި ހޯދާފައި ވަނީ ވަރަށް ތަފާތު ކަމެކެވެ.
ބެންގަލޫރުގެ އިންސްޓިޓިއުޓް ފޯރ ސްޓެމް ސެލް ބަޔޮލޮޖީ އެންޑް ރީޖެނެރޭޓިވް މެޑިސިންގެ ބަޔޯކެމިސްޓް ސުބްރަމާނިއަން ރާމަސުވާމީ ބުނި ގޮތުގައި، ކުރަފީގެ ވައްތަރަކުން އޭނާއަށް ހޯދިފައި ވަނީ ވަރަށް އާދަޔާ ޚިލާފު ކަމެކެވެ.
ކުރަތްޕަކީ އިންސެކްޓެއް ނުވަތަ ސޫތްޕަކަށް ވާ އިރު، އެއީ ބިސް އަޅައިގެން ދަރިމައިވާ އެއްޗެކެވެ.
ޕެސިފިކް ބީޓަލް ކޮކްރޯޗުގެ ދަރީން ހެދިބޮޑުވަމުން އަންނަ އިރު ބޮނީ، އޭތީގެ މަންމަ ކުރަފީގެ ހަށިގަނޑުން އުފައްދާ ދިޔާ އެއްޗެއް --
ނަމަވެސްޕެސިފިކް ބީޓަލް ކޮކްރޯޗްނަމަކަށް ކިޔާ ކުރަތްޕަކީ ބިސް އަޅައިގެން ދަރިމައިވާ ކުރަތްޕެއް ނޫނެވެ. އޭތި ދަރިމައިވަނީ އިންސާނުންނާއި އެހެނިހެން "މެމަލް" ޖަނަވާރުން ފަދައިން، ވިހައިގެންނެވެ. އަދި މި ކުރަތްޕަކީ މެމަލް ޖަނަވާރުން ފަދައިން، ދަރީންނަށް ކާން ދިނުމަށް ހަށިގަނޑުން ކާނާ އުފައްދާ ޖަނަވާރެކެވެ.
ޕެސިފިކް ބީޓަލް ކޮކްރޯޗުގެ ދަރީން ހެދިބޮޑުވަމުން އަންނަ އިރު ބޮނީ، އޭތީގެ މަންމަ ކުރަފީގެ ހަށިގަނޑުން އުފައްދާ ދިޔާ އެއްޗެކެވެ. އިންސާނުންގެ ހަށިގަނޑުން ކިރު އުފައްދައި، ދަރިފުޅަށް ގާތުން ދޭ މިސާލުންނެވެ.
މިކަން ސައިންސްވެރިންނަށް ކުރިން އެނގެ އެވެ. ނަމަވެސް އޭރު ސައިންސްވެރިން ތިބީ އެކަން އެނގުނީމާ ނިމުނީ ކަމަށް ވަރިހަމަ ކޮށްލައިގެންނެވެ. އެ އެއްޗެއް ކުރަފިތައް ބުއިމުން ދެން ވާ ގޮތެއް ނުބަލައި، އަތް އުރާލައިގެން ތިބީ އެވެ. ނަމަވެސް ޔުނިވާސިޓީ އޮފް އަޔޯވާގެ ޒޫއޮލޮޖިސްޓު ބާބަރާ ސްޓޭ، މިކަމުގެ ތެރެއަށް ބެލުމުން އެނގުނީ، ކުރަފީގެ ގާތުން ދޭ އެ "ދިޔާ" އެއްޗެއްގައި ޕްރޮޓީން ހިމެނޭ ކްރިސްޓަލްތަކެއް ހިމެނޭ ކަމެވެ. ކުރިން ހީކޮށްގެން ތިބީ އެ އެއްޗެއް ކުރަފީގެ ހަޖަމުކުރާ ނިޒާމުން ހަޖަމުކޮށްލައި، ބޭރުކޮށްލަނީ ކަމަށެވެ.
އިންޓަނޭޝަނަލް ޔޫނިއަން އޮފް ކްރިސްޓަލޯގްރަފީގެ ޖާނަލްގައި ޝާއިއުކުރި ރީސާޗަކުން ދައްކާ ގޮތުގައި، ކުރަފީގެ އެ ދިޔާ "ބުއިމަކީ" ނުވަތަ "ކުރަފި ކިރަކީ" މުޅި ދުނިޔޭގައި ވެސް މިހާތަނަށް ހޯދިފައި ނުވާ ވަރުގެ، ސިއްހަތަށް ފައިދާ ހުރި ނިއުޓްރިޝަސް އެއްޗަކަށެވެ.
ޔުނިވާސިޓީ އޮފް އަޔޯވާގެ ޒޫއޮލޮޖިސްޓު ބާބަރާ ސްޓޭ، ބެލި ބެލުމުން އެނގުނީ، ކުރަފީގެ ގާތުން ދޭ "ދިޔާ" އެއްޗެއްގައި ޕްރޮޓީން ހިމެނޭ ކްރިސްޓަލްތަކެއް ހިމެނޭ ކަން --
ބެންގަލޫރުގެ ބަޔޯކެމިސްޓް ރާމަސުވާމީ ބުނާ ގޮތުގައި ކުރަފި ކިރުގައި ހިމެނޭ ޕްރޮޓީން ކްރިސްޓަލްތަކުގައި، މީގޮނުގެ ކިރުގައި ހިމެނޭ ހަކަތައަށް ވުރެ ތިން ގުނަ އިތުރަށް ހަކަތަ ހުރެ އެވެ. މީގެ ކުރިން ބެލެވިފައި އޮތް ގޮތުގައި، ނިސްބަތުން ޕްރޮޓީން އެންމެ މަތީ މީގޮނު ކިރުގަ އެވެ.
ރާމަސުވާމީ ބުނާ ގޮތުގައި، މިއީ ހަމަ "ކާނާ" އެވެ.
"ޕްރޮޓީން ޝޭކްތަކުގައި މި ހިމެނޭ ދުވަސް ވެސް ހަމަ ފެނިދާނެ،"
އެހެން ނަމަވެސް ގޮންޖެހުންތަކެއް އެބަ ހުއްޓެވެ. "ފަކުރު" އެއްޗެއްގެ ގޮތުގައި ގިނަ ބަޔަކު ބަލައިގަންނަ ކުރަތްޕަކީ ބަލައިލަން ހިތްފަސޭހަ އެއްޗެއް ވެސް ނޫނެވެ. ގިނަ ބަޔަކު އެއާ މެދު ޖެހިލުން ވެ އެވެ. އެހެންކަމުން ކުރަފި އެކުލެވޭ އެއްޗެއް ބުއިމަށް މީހަކު ހިތް އެދޭނެ ހެން ވަރަށް ހީ ނުވެ އެވެ. ބައެއް ގައުމުތަކުގެ ސަގާފީ ކާނާއެއްގެ ގޮތުގައި ކުރަފި ތެލުލައިގެން ކައި އުޅުނަސް ކޮންމެ ކޮންމެ މީހަކަށް އެކަން ކުރާކަށް ވެސް ނުކެރޭނެ އެވެ.
"މި އެއްޗެއްގައި ކުރަފިން ނަގާފައިވާ މާއްދާއެއް ހިމެނެއޭ، މީހެއް ކައިރީ ބުނެފިއްޔާ އެހިސާބުން އެ ނިމުނީ،" ރާމަސުވާމީ ބުންޏެވެ.
މިއީ ކުރެވިދާނެ ކަމެކެވެ. ގިނައިން ހަކަަތަ ބޭނުންވާ މީހުން ކުރަފީގެ ކިރުގައި ހިމެނޭ ޕްރޮޓީން ކްރިސްޓަލްތައް ހިމެނޭ އެއްޗެހި ބޭނުން ކޮށްފާނެ އެވެ.
އެހެން ނަމަވެސް މިއީ އިންސާނާގެ ހަށިގަނޑުގެ އެތެރެއަށް ފޮނުވަން ހެޔޮވާ ވަރުގެ އެއްޗެއްތޯ ވެސް ބަލަން ޖެހެ އެވެ. އެކަން ބެލުމަށްޓަކައި ކުރަންޖެހޭ ގިނަ ތަހުލީލުތަކެއް ވެ އެވެ. އެހެންކަމުން ކައިރި މުސްތަގުބަލެއްގައި ކުރަފި ކިރު ލިބެން ހުންނާނެ ކަމަކަށް ނުބެލެވެ އެވެ.