21 Jul 2016, 12:58
ކްރިމިނަލް ކޯޓުގައި ބާއްވާ ޝަރީޢަތްތަކުގެ އަޑު އެހުންތައް ކަވަރު ކުރާ ރާއްޖެ ޓީވީގެ ނޫސްވެރިޔާ މުރުޝިދު އަބްދުލްހަކީމް އެ ކޯޓަށް ވަނުން މަނާކޮށްފައި އޮތުމަށް ފަހު، އޭނާ ކޯޓުގެ އަޑުއެހުންތަކަށް ވަނުމުގެ ހުއްދަ އަލުން ދީފި އެވެ.
ރާއްޖެ ޓީވީގައި މަސައްކަތްކުރާ ނޫސްވެރިޔާ މުރުޝިދަށް ކްރިމިނަލް ކޯޓުގެ އަޑުއެހުންތަކަށް ވަނުމުގެ ހުއްދަ ނުދީ، ތިން ފަހަރެއްގެ މަތިން ވަނީ ކްރިމިނަލް ކޯޓުން މަނާ ކޮށްފަ އެވެ.
"ސަން" އާ ވާހަކަ ދައްކަމުން މުރުޝިދު މިއަދު ބުނީ އިއްޔެ ކޯޓުތަކުގެ އިސް ގާޒީން ނޫސްވެރިންނާ އެކު ބޭއްވި ބައްދަލުކުމެއްގައި، އޭނާ އަށް ކޯޓަށް ނުވަދެވޭ މައްސަލަ ނަގައި، އެކަމުގެ ސަބަބު އޮޅުންފިލުވަން ކްރިމިނަލް ކޯޓުގެ އިސް ގާޒީ އަބްދުލްބާރީ ޔޫސުފްއާ އޭނާ ސުވާލު ކުރި ކަމަށެވެ.
"ސަބަބު އޮޅުންފިލުވަން ސުވާލު ކުރީމާ ގާޒީ ބާރީ އިއްޔެ ވިދާޅުވީ ކޮންމެ ކަމެއްގެ ސަބަބު އެނގޭކަށް ނުޖެހޭ،" މުރުޝިދު ބުންޏެވެ.
ނަމަވެސް މިއަދު ކްރިމިނަލް ކޯޓުން އޭނާއަށް ގުޅައި، އެ ކޯޓުގެ ޝަރީއަތްތަކަށް އަނެއްކާ ވެސް ވަދެވޭނެކަން މިއަދު އެންގި ކަމަށް މުރުޝިދު ބުންޏެވެ.
މީގެ ކުރިން އެކި ފަހަރު މަތިން ކޯޓުގެ އަޑުއެހުންތަކަށް މުރުޝިދާއި އެހެން ނޫސްވެރިން ވަނުން ކްރިމިނަލް ކޯޓުން ވަނީ މަނާ ކޮށްފަ އެވެ.
މުރުޝިދު ބުނި ގޮތުގައި މި އަހަރު އޮތް، އަދާލަތު ޕާޓީގެ ރައީސް ޝައިޚް އިމްރާން އަބްދުﷲގެ ޝަރީއަތަކަށް ވަނުން ކޯޓުން އޭނާ އަށް މަނާ ކުރި ކަމަށެވެ. އޭގެ ފަހުން ރާއްޖެ ޓީވީގެ ހުރިހާ ނޫސްވެރިންނަށް ކްރިމިނަލް ކޯޓަށް ވަނުން މަނާ ކުރި ކަމަށާއި ނަމަވެސް ފަހުން މުރުޝިދު ފިޔަވައި އެ ޓީވީގެ އެހެން ހުރިހާ ނޫސްވެރިންނަށް ކޯޓަށް ވަނުމުގެ ހުއްދަ ދިން ކަމަށެވެ.
އެ މައްސަލާގައި އެކަމުގެ ސަބަބު ހޯދުމަށް މުރުޝިދު ކްރިމިނަލް ކޯޓަށް ސިޓީ ފޮނުވައި، އެ ކޯޓުގެ ރަޖިސްޓްރާއާ ބައްދަލުކުރުމަށް މަސައްކަތް ކުރި ނަމަވެސް އެކަން ކާމިޔާބުވާ ގޮތް އޭރު ވެފައެއް ނުވެ އެވެ.