20 Jul 2016, 00:06
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ޕީޕީއެމްގެ ކައުންސިލް މެމްބަރު އައިމިނަތު ނާދިރާ އެ ޕާޓީގެ މެންބަރުކަމުން ވަކިކުރަން ސުލޫކީ ކޮމިޓީން ނިންމީ އުސޫލުތަކުގެ މަތިން ކަމަށް އެކޮމެޓީގެ މުގައްރިރު އަދި އިސްލާމިކް މިނިސްޓްރީގެ ސްޓޭޓް މިނިސްޓަރު އަލީ ވަހީދު ވިދާޅުވެއްޖެއެވެ.
މިރޭ ނޫސްވެރިންނާ ބައްދަލުކުރައްވައި ޕީޕީއެމްގެ ރައީސް މައުމޫން އަބްދުލް ގައްޔޫމް ވިދާޅުވީ ފާރިސާއި ނާދިރާ ޕާޓީން ވަކިކުރީ ސައްހަ ބައްދަލުވުމަކުން ނޫން ކަމަށާއި އެބައްދަލުވުމުގެ ކޯރަމް ހަމަނުވާ ކަމަށެވެ.
އެކަމާ ގުޅިގެން "ސަން"އިން ކުރި ސުވާލަކަށް ޖަވާބުދެއްވަމުން އަލީ ވަހީދު މިރޭ ވިދާޅުވީ، އެކޮންމެޓީގައި ތިއްބަވަނީ ފަސް މެމްބަރުން ކަމަށްވާއިރު އެދެ ބޭފުޅުން ވަކިކުރަން ނިންމީ ތިން މެމްބަރުންގެ ވޯޓްލިބިގެން ކަމަށެވެ. އިތުރަށް ވިދާޅުވާ ދެ މެމްބަރުންނަކީ މައްސަލަ ރައްދުވާ ފަރާތުން ހުށަހަޅަންޖެހޭ ދެ މެބްބަރުން ކަމަށް އަލީ ވަހީދު ވިދާޅުވިއެވެ.
"މިއީ ސައްހަ ނިންމުމެއް. ނިންމުމާއި ދޭތެރޭ ހިތްހަމަ ޖެހި ވަޑައިނުގަންނަވާނަމަ އިސްތިއުނާފު ކުރައްވާ،" އަލީ ވަހީދު ވިދާޅުވިއެވެ.
މީގެ ކުރިންވެސް ތިން މެމްބަރުން ތިއްބަވައިގެން މައްސަލަތައް ބަލައިފައިވާ ކަމަށާއި އޭރު މައްސަލަ ނުޖައްސާ ކަމަށް ވެސް އަލީ ވަހީދު ވިދާޅުވިއެވެ.
ފާރިސް އަދި ނާދިރާއާއެކު މިރޭ ޕީޕީއެމް ކައުންސިލްގެ ކުއްލި ބައްދަލުވުން ފަށައި، ކުރިއަށް ގެންދަވަން އުޅުމުން ރައީސް ޔާމީނަށް ތާއީދު ކުރައްވާ ފަރާތްތަކުން ވަނީ ބައްދަލުވުން ދޫކުރައްވައި ވަޑައިގެންފައެވެ. އެބައްދަލުވުމަށް 30 މެމްބަރުން ވަޑައިގެންއިރު 18 މެމްބަރުން ވަނީ ބައްދަލުވުން ދޫކުރައްވައި ވަޑައިގެންފައެވެ. އެއާއެކު ބައްދަލުވުމުގެ ކޯރަމް ގެއްލި ކައުންސިލް ބައްދަލުވުން މިރެއަށް ނިންމާލަން ޖެހުނީއެވެ.