Last Updated: 9 year 4 month ago
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ކައުންސިލްގެ ކުއްލި ބައްދަލުވުން ފެށިތާ ކުޑަ އިރުކޮޅެއްގެ ތެރޭގައި ޚިޔާލުތަފާތުވުންތައް އުފެދި އެ ބައްދަލުވުން ކުރިއަށް ނުގެންދެވިގެން ހުއްޓާލައިފިއެވެ.
ޕީޕީއެމްގެ އޮފީހުގައި މިރޭ 9:00ގައި ފެށި އެ ބައްދަލުވުމުގެ ރިޔާސަތު ބެލެހެއްޓެވީ، އެ ޕާޓީގެ ރައީސް އަލްއުސްތާޛް މައުމޫން އަބްދުލް ގައްޔޫމެވެ.
ޕީޕީއެމްގެ ތެރޭގައި ޚިޔާލު ތަފާތުވުންތަކެއް އުފެދުނު ފަހުން ފުރަތަމަ ފަހަރަށް އެޕާޓީގެ ކައުންސިލް ބައްދަލުވުމުގައި ޕީޕީއެމްގެ މުސްތަޝާރު އަދި ރައީސުލްޖުމްހޫރިއްޔާ އަބްދުﷲ ޔާމީން ބައިވެރިވެވަޑައިގަންނަވާނޭ ކަމުގެ އަޑުތަކެއްވެސް ފެތުރިފައިވީ ނަމަވެސް އެމަނިކުފާނު އެ ބައްދަލުވުމުގައި ބައިވެރިވެވަޑައެއް ނުގަންނަވައެވެ.
ޕީޕީއެމްގެ ނައިބުރައީސް އަބްދުއްރާހީމް އަބްދުﷲ އާއި އަދި ޕާޓީގެ ކައުންސިލްގައި ހިމެނިވަޑައިގަންނަވާ ގިނަ އަދަދެއްގެ މެންބަރުން ބައިވެރިވެވަޑައިގެންނެވި އެ ބައްދަލުވުން ހުއްޓާލަން ޖެހުނީ، އެ ޕާޓީގެ މެންބަރުކަމުން ވަކިކުރުމަށް، ޕާޓީގެ ސުލޫކީ ކޮމެޓީން ނިންމާފައިވާ ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ކައުންސިލް މެމްބަރު އައިމިނަތު ނާދިރާ އެ ބައްދަލުވުމުގައި ބައިވެރިވެވަޑައިގަތުމުންނެވެ.
ފާރިސްއާއި ނާދިރާ އެ ބައްދަލުވުމުގައި ބައިވެރިވެވަޑައިގެންފައިވާތީ، ކައުންސިލްގައި ހިމެނިވަޑައިގަންނަވާ ރައީސް ޔާމީނަށް ތާއީދުކުރަށްވާ މެންބަރުން ވަނީ، އެ ދެބޭފުޅުން ހިމަނައިގެން އެ ބައްދަލުވުން ކުރިއަށް ނުގެންދެވޭނޭ ކަމަށް ވިދާޅުވެ، ބައްދަލުވުން ދޫކުރައްވައި ބޭރަށް ނުކުމެވަޑައިގެންފައެވެ.
ޕީޕީއެމްގެ ކައުންސިލްގައި ހިމެނިވަޑައިގަންނަވާ ރައީސް ޔާމީނަށް ތާއީދުކުރައްވާ މެންބަރުން ބައްދަލުވުން ދޫކުރައްވައި ބޭރަށް ނުކުމެ ވަޑައިގަތުމުން އެ ބައްދަލުވުމުގެ ކޯރަމް ގެލުމާއެކު ބައްދަލުވުން ވަނީ ނިންމާލައިފައެވެ.
ރައީސް މައުމޫނަކީ ޕާޓީގެ ރައީސް. ރައީސް ޔާމީނަކީ ގައުމުގެ ރައީސް. ޕާޓީގެ ޓިކެޓްގައި ނުކުމެ ވަޑައިގެން ހުންނެވި ރައީސް. އެހެންވީމަ އަޅުގަނޑު ގަބޫލެއް ނުކުރަން ރައީސް ޔާމީނަށް ތާއީދު ކުރައްވާ މެންބަރުން ތަކަކާ ރައީސް މައުމޫނަށް ތާއީދު ކުރައްވާ ފެކްޝަނެއް އޮންނާނެ ކަމަކަށް.