18 Jul 2016, 19:18
"ސާފު ރާއްޖެ 2016"ގެ ނަމުގައި ކުނި މެނޭޖްކުރުމަށް މީހުން ތަމްރީނު ކުރުމާއި ކުނި މެނޭޖްކުރުމާ ބެހޭ މައުލޫމާތު ދިނުމަށް އެންވަޔަރަންމެންޓް މިނިސްޓްރީން ފަށައިގެން ކުރިއަށްގެންދާ މަހާސިންތާއަށް ތިން މިލިއަން ރުފިޔާ ހަރަދުވާނެ ކަމަށް އެ މިނިސްޓްރީން ލަފާކޮށްފި އެވެ.
އާދިއްތަ ދުވަހުގެރޭ ފެށިގެން ދަރުބާރުގޭގައި ކުރިއަށް ގެންދާ އެ މަހާސިންތާގައި ރަށްރަށުގެ ކައުންސިލަރުންނާއި ރިސޯޓުތަކުންނާއި ސްކޫލުތަކުންވެސް ބައިވެރިވާކަމަށް އެންވަޔަރަންމެންޓް މިނިސްޓްރީން ވަނީ ބުނެފަ އެވެ. މަހާސިންތާ ކުރިއަށްދާ ގޮތާ ބެހޭގޮތުން މީޑިއާއަށް މައުލޫމާތު ހިއްސާ ކުރަށްވަމުން އެންވަޔަރަންމެންޓް މިނިސްޓްރީގެ ޑެޕިއުޓީ މިނިސްޓަރު އަލީ އާމިރު ވިދާޅުވީ، އެ މަހާސިންތާއަށް 2.8 ނުވަތަ ތިން މިލިއަން ހަރަދުވާނެ ކަމަށް ލަފާކުރެވޭ ކަމަށެވެ.
ޖުމްލަ އެހާވަރު ހަރަދުވާނެ ކަމަށް ލަފާކުރި ނަމަވެސް ސީދާ އަދަދު ދަންނަވަން އެނގޭނީ މަހާސިންތާ ނިމުމުން ކަމަށް އާމިރު ވިދާޅުވި އެވެ. މަހާސިންތާ ނިންމުމަށް ހަމަޖެހިފައިވަނީ މާދަމާ އެވެ.
ތިން ދުވަހުގެ މުއްދަތަށް ކުރިއަށް ގެންދާ އެ މަހާސިންތާގައި ރާއްޖޭގެ ރަށްރަށުންނާއި ރިސޯޓުތަކާއި ސުކޫލުތަކާއެކު ޖުމްލަ 500 އަހަށްވުރެ ގިނަ ބައިވެރިން ބައިވެރިވާ ކަމަށް މިނިސްޓްރީން ބުންޏެވެ.
މާލެ ސަރަހައްދުގެ ކުނި މެނޭޖް ކުރުމަށް ވޯލްޑް ބޭންކުގެ އެހީގައި 100 މިލިއަން ޑޮލަރުގެ ބޮޑު މަޝްރޫއެއް ފެށުމަށް ސަރުކާރުން ދަނީ ތައްޔާރުވަމުންނެވެ. މިހާރު ކުރިއަށްދާ މަހާސިންތާގައި އެ މަޝްރޫއާ ބެހޭގޮތުންވެސް މަޝްވަރާތައް ކުރެވެމުންދާ ކަމަށް އެންވަޔަރަންމެންޓް މިނިސްޓްރީން ބުނެއެވެ.