18 Jul 2016, 13:58
މައުލޫމާތު ހާމަކުރުމުގެ ރަން ވަނަ އަށް ކުރިމަތިލުމުގެ ފުރުސަތު އިންފޮމޭޝަން ކޮމިޝަނަރުގެ އޮފީސް (އައިކޮމް) އިން ހުޅުވާލައިފި އެވެ.
"މައުލޫމާތު ހާމަކުރުމުގެ ރަން ވަނަ" އަކީ މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ 37 ވަނަ މާއްދާގައިވާ ގޮތުންގެ މަތީން ވީހާ ވެސް ގިނަ މައުލޫމާތު އާއްމުކުރުމަށް ހިއްވަރު ދިނުމަށާއި އެ ގާނޫނުގެ 39 ވަނަ މާއްދާގައިވާ ގޮތުގެ މަތީން ފަސޭހަކަމާ އެކު މައުލޫމާތު ލިބޭނޭ ގޮތަށް ބެލެހެއްޓުމަށް ބާރުއެޅުމުގެ ގޮތުން އައިކޮމް އިން ތައާރަފް ކޮށްފައިވާ އެންމެ ޝަރަފުވެރި ވަނަ އެވެ.
އެ ޝަރަފު ދިނުމަށް މިއަދު ހުޅުވާލާފައިވާ އިރު، މައުލޫމާތު ހާމަ ކުރުމުގެ ރަންވަނަ ހޮވުމާއި ދައުލަތުގެ އިދާރާތައް ދަރަޖަ ކުރާނެ ގޮތުގެ އުސޫލެއް މިދިޔަ ޑިސެމްބަރު މަހުގެ ތެރޭގައި އައިކޮމް އިން ވަނީ ހާމަކޮށްފަ އެވެ.
އެ އުސޫލުގައިވާ ގޮތުން، މައުލޫމާތު ހާމަ ކުރުމުގެ ރަންވަނަ" އަށް އިދާރާއެއް ހޮވުމަށް ހަމަޖެހިފައި ވަނީ އެކަމަށް އެދި ހުށައަޅާ އިދާރާތަކުގެ ތެރެއިންނެވެ.
މައުލޫމާތު ހާމަކުރުމުގެ ރަން ވަނަ އަށް ކުރިމަތިލުމުގެ ފުރުސަތު ހުޅުވާލާފައި ވަނީ އަންނަ މަހުގެ 15 ވަނަ ދުވަހާ ހަމައަށެވެ.
އައިކޮމްގައި މިއަދު ބޭއްވި މައުލޫމާތު ދިނުމުގެ ބައްދަލުވުމެއްގައި މީޑިއާ އަށް މައުލޫމާތު ދެއްވަމުން، އިންފޮމޭޝަން ކޮމިޝަނާ އަބްދުލް އަޒީރު އަބޫބަކުރު ވިދާޅުވީ، "ރަންވަނަ" ހާސިލްކުރާ އިދާރާއެއް އިއުލާނުކުރުން ފުރަތަމަ އޮންނާނީ އަންނަ ސެޕްޓެމްބަރު މަހުގެ 28 ވަނަ ދުވަހު ފާހަގަކުރާ "މައުލޫމާތު ހޯދައި ލިބިގަތުމުގެ ހައްގުގެ ބައިނަލްއަގްވާމީ ދުވަހުގެ" މުނާސަބަތުގައި ބާއްވާ ހަފުލާގައި ކަމަށެވެ.
އައިކޮމް އިން ހާމަކޮށްފައިވާ ރަންވަނަ ހޮވުމުގައި ބަލާނެ މިންގަނޑުތަކުގެ ތެރޭގައި އިދާރާގެ ރަސްމީ ވެބްސައިޓުގައި ހުންނަ މައުލޫމާތަށާއި އިދާރާއަށް ރައްޔިތުން ހިޔާލު ހުށަހެޅުމުގެ ފަސޭހަ ނިޒާމެއް ގާއިމްކުރެވިފައިވާ ނަމަ އެކަމަކާއި މައުލޫމާތު ހޯދާން އެދި އިދާރާއަށް ރައްޔިތުން ފޯމް ހުށަހެޅި އަދަދަށް ބަލާނެ އެވެ.
މީގެ އިތުރުން މައުލޫމާތު ހާމަކުރުމުގައި ދިވެހިބަހަށް އިސްކަންދީފައިވާ މިންވަރާއި އިދާރާގެ އަމިއްލަ އިސްނެގުމުގެ މަތީން މައުލޫމާތު ހާމަކުރަމުން ގެންދިއުމަށް އިސްކަންދޭ މިންވަރުގެ ފަދަ ކަންކަމަށް ބަލަން ވަނީ ނިންމައިފަ އެވެ.
ރަންވަނަ ދޭ ހަފުލާގައި މައުލޫމާތު ހާމަ ކުރުމުގެ މިންވަރަށް ބަލައި އިދާރާތައް ގިންތި ކޮށްފައިވާ ގޮތް ހާމަކުރަން ވެސް ވަނީ ނިންމާފަ އެވެ. މައުލޫމާތު ހާމަ ކުރުމުގެ މިންވަރަށް ބަލައި އިދާރާތައް ގިންތި ކުރަން އެކުލަވާލާފައިވާ އުސޫލުގައި ވާ ގޮތުން، ދައުލަތުގެ އިދާރާތައް ގިންތި ކުރެވޭނީ، އައިކޮމް އިން އިދާރާތަކުން މައުލޫމާތު ހާމަ ކުރުމަށް އިސްކަންދޭ މިންވަރަށް ބެލުމަށް ފަހުގަ އެވެ.
އިންފޮމޭޝަން ކޮމިޝަނާ އަޒީޒު ވިދާޅުވީ، މިއަހަރު އެކަން ފަށައިގަތުމުގެ ގޮތުން ދަރަޖަކުރާނީ މައިގަނޑު ފަސް ބަޔަކަށް ބަހާލައިގެން މައިގަނޑު މުއައްސަސާތައް އެކަނި ކަމަށެވެ.
އެގޮތުން ބަހާލާފައިވާ މައިގަނޑު ފަސް ގުރޫޕަކީ ރައީސުލްޖުމްހޫރިއްޔާގެ އޮފީހާއި ސަރުކާރުގެ ވުޒާރާތަކާއި މެޖިސްޓްރޭޓް ކޯޓްތައް ނުލައި މަތީ ތިންތީގެ ކޯޓްތަކާއި ރައްޔިތުންގެ މަޖިލީހާއި ދައުލަތުގެ މިނިވަން މުއައްސަސާތަކުގެ އިތުރުން ސިޓީ ކައުންސިލްތަކާއި އަތޮޅު ކައުންސިލްތައް އަދި ޔުނީފޯމް ހާއްސަކުރެވިފައިވާ އިދާރާތަކެވެ.