16 Jul 2016, 12:05
ދިވެހި ސިނަމާތަކުގައި ދިވެހިން ރޮއްވަން އެންމެ މޮޅު އެއް ފިލްމު ޕްރޮޑިއުސަރަކީ ފާތުމަތު ނަހުލާ ކަމާމެދު ގިނަ ބަޔަކު ދެބަހެއް ނުވާނެ އެވެ. އެއީ އޭނާގެ ހުނަރެކެވެ. މިހާތަނަށް ނަހުލާ ނެރެފައި ވެސް ވަނީ ފުން އަސަރުކުރުވަނިވި ފިލްމުތަކެވެ.
އަހަރުތަކެއްގެ މެދުކެނޑުމަކަށް ފަހު އަނެއްކާ ވެސް ނަހުލާގެ ފިލްމެއް ދިވެހި ސިނަމާތަކަށް އަންނަން މިވަނީ ތައްޔާރުވެފަ އެވެ. މިފަހަރު ނަހުލާ ނެރޭ ފިލްމު ތަފާތު ވާނެ އެވެ. މިފަހަރުގެ ފިލުމު ބަލައިގެން ވެސް ރޯންޖެހިދާނެ އެވެ. ނަމަވެސް ބޮޑަށް ގަންނާނީ ބިރެވެ.
އަންނަ އޮކްޓޯބަރު 18 ވަނަ ދުވަހު ރިލީޒްކުރަން ހަމަޖެހިފައިވާ ނަހުލާގެ ކްރިސްޓަލް އެންޓަޓައިންމަންޓްގެ ފުރަތަމަ ބިރުވެރި ފިލްމު "4426" (ފޯފޯޓޫސިކްސް)ގެ ފުރަތަމަ ޓްރެއިލާ ރޭ ވަނީ ދައްކާލައިފަ އެވެ. ޓްރެއިލާ ވަރަށް ވެސް ފުރިހަމަ އެވެ. އެހާމެ ބިރުވެރި އެވެ. ފިލްމުގައި އައްޒަގެ ހުނަރުވެރިކަން ފާހަގަކޮށްލަން ޖެހެ އެވެ.
ފިލްމު "4426"ގެ މަންޒަރެއްގައި ޒުވާން އެކްޓްރެސް އައްޒަ: ފިލްމު ހަދާފައިވަނީ ހަގީގީ ހާދިސާއެއްގެ މައްޗަށް ވަރަށް ބޮޑު ދިރާސާއެއް ހެދުމަށް ފަހު ކަމަށް ނަހުލާ ބުނޭ --- ފޮޓޯ/ "4426" ގެ ފޭސްބުކް ޕޭޖް
ހަގީގީ ހާދިސާ އަކަށް ބިނާކޮށް ތައްޔާރު ކުރާ އެ ފިލްމުގައި ނަހުލާގެ އިތުރުން އަހުމަދު ޝިނާން ވެސް ޑައިރެކްޝަން ހަދާފައިވާ އިރު، ފިލްމު ލޯންޗު ކުރުމަށް މާޗް މަހު ބޭއްވި ރަސްމިއްޔާތުގައި ނަހުލާ ވަނީ އެއީ އޭނާގެ ފިލްމު ކެރިއަރުގައި ކުރާ އެންމެ ބުރަ މަސައްކަތް ކަމަށް ބުނެފަ އެވެ.
ފިލްމުގައި ރާއްޖޭގެ ތަޖުރިބާކާރު ފިލްމީ ތަރިންގެ ތެރޭގައި ހިމެނޭ ޔޫސުފް ޝަފީއު (ޔޫއްޕެ) އާއި ޝީލާ ނަޖީބުގެ އިތުރުން ޒުވާން އަދި ކުރިއަރަމުން އަންނަ ތަރިންގެ ތެރޭގައި ހިމެނޭ ޖުމައްޔިލް ނިމާލް އާއި މަރިޔަމް އައްޒަ އަދި އަހްމަދު ޖުމައިހް (ޖުމާ) ފެނިގެންދާނެ އެވެ.
ފިލްމު، "4426"ގެ މަންޒަރުތައް ނެގުމަށް ހާއްސަކޮށް ޑިޒައިންކޮށްފައިވާ ސެޓުގެ ތެރޭގައި ނަހުލާ އާއި ފިލްމުގެ ބައެއް ތަރިން: އެ ފިލްމު ހަދާފައިވަނީ އޯޕަން ބަޖެޓަކުން --- ފޮޓޯ/ "4426" ގެ ފޭސްބުކް ޕޭޖް
މީގެ އިތުރުން، އިބްރާހިމް ޖިހާދު (ޖިމީ) އާއި އަލީ ފާރޫގް އާއި އަހުމަދު ސައީދު އަދި މުހައްމަދު ފައިލް ފަދަ ހުނަރުވެރި ތަރިން ވެސް ފެނިގެންދާނެ އެވެ.
މީގެ އަށް އަހަރު ކުރިން ގިނަ ބައެއްގެ ހިތްތައް ރޮއްވާލާފައިވާ ފިލްމު "ޔޫސުފް" އަށް ފަހު ނަހުލާ އުފައްދާ ފުރަތަމަ ފިލްމު، "4426"ގެ މަންޒަރުތައް މާލެ އާއި މާލެ ކައިރި ދެ ރަށެއްގައި ވަނީ ނަގާފަ އެވެ. އަދި އޯޕަން ބަޖެޓަކާ އެކު ހަދާ އެ ފިލްމުގެ މަންޒަރުތައް ނަގާފައި ވަނީ ހާއްސަކޮށް ޑިޒައިންކޮށްފައިވާ ސެޓެއްގަ އެވެ.