14 Jul 2016, 09:40
ވޮޝިންޓަން(ޖުލައި 14): ޕެންޓަގަންއިން އިސްލާމިކް ސްޓޭޓް (އައިއެސް)ގެ "ހަނގުރާމައިގެ މިނިސްޓަރު"ގެ ނަން ދީފައިވާ އުމަރު ޝިޝާނީ މަރާލާފައިވާކަން އައިއެސްއާ ގުޅުން އޮންނަ އަމާގް ނޫސް އޭޖެންސީން ބުނެފި އެވެ.
އަމާގްގެ ވެބްސައިޓްގައިވާ ގޮތުން ޝިޝާނީ މަރުވެފައި ވަނީ އިރާގުގެ މޫސަލް ހިފަން މަސައްކަތް ކުރަމުން ދިޔަ ފައުޖުތަކާ ހަނގުރާމަ ކުރަމުން ދަނިކޮށް މޫސަލްއިން ދެކުނަށްވާ ގޮތަށް އޮންނަ ޝިރުގަތުގަ އެވެ.
އަމާގް އިން އިއްޔެ އެފަދައިން ރިޕޯޓުކޮށްފައިވަނީ އެމެރިކާއިން މިދިޔަ މާރިޗް މަހު ދިން ވައިގެ ހަމަލާއެއްގައި ޝިޝާނީ މަރާލާފައިވާ ކަމަށް ޕެންޓަގަން އިން އެމަހު ބުނެފައި ވަނިކޮށެވެ. ޕެންޓަގަން އިން ބުނި ގޮތުގައި ޝިޝާނީ މަރާލާފައި ވަނީ ސީރިއާގެ އިރުއުތުރުގައި އޮންނަ ޝައްދާދީގަ އެވެ. ނަމަވެސް އަމާގް އިން ވަނީ އޭރު އެކަން ދޮގުކޮށްފަ އެވެ.
އެމެރިކާއިން ދިން ވައިގެ ހަމަލާއެއްގައި ޝިޝާނީ މަރުވެފައިވާ ކަމަށް އެގައުމުން ބުނެފައި ވަނީ މިދިޔަ އަހަރު ޝިޝާނީގެ ބޮލަށް ފަސް މިލިއަން ޑޮލަރު ހުށަހެޅުމަށްފަހު އެވެ.
ޝިޝާނީ އަކީ އައިއެސްގެ ލީޑަރު އަބޫ ބަކުރު އަލް ބަޣުދާދީގެ އަރިސް އެޑްވައިޒަރެއް ކަމަށްވެ އެވެ. (ބީބީސީ)