13 Jul 2016, 11:01
އިންޑިއާގައި ފުޓްބޯޅައިގެ އިތުރުން ފުޓްސަލްގެ ފޯރިވެސް މިހާރު ދަނީ ގަދަވަމުންނެވެ. ކުރީގެ ނަން މަޝްހޫރު ފުޓްބޯޅަ ކުޅުންތެރީން ކްލަބްތަކަށް ގެނެސްގެން އިންޑިއަން ސުޕަރ ލީގު ކުރިއަށް ގެންދާއިރު، އަންނަ ހުކުރު ދުވަހު ޗެންނާއީ އާއި ގޯއާގައި ފެށުމަށް ތައްޔާރުވަމުންދާ އިންޑިއަން ޕްރިމިއަަރ ފުޓްސަލް ލީގަކީ މިހާރު ގިނަބައެއްގެ ލޯތައް އަމާޒުވެފައިވާ އެއް މުބާރާތެވެ.
ބާސެލޯނާ އަދި ރެއާލް މެޑްރިޑްގެ ކުރީގެ ތަރި ލުއިސް ފީގޯ --
ވޯލްޑް ފުޓްސަލް އެސޯސިއޭޝަނުން އެކްރެޑިޓް ކޮށްގެން އިންޑިއާގެ ޕްރިމިއަރ ފުޓްސަލް މެނޭޖްމަންޓް ޕްރައިވެޓް ލިމިޓެޑާއި ފުޓްސަލް އެސޯސިއޭޝަން އޮފް އިންޑިއާ ގުޅިގެން ކުރިއަށް ގެންދާ މި މުބާރާތަށް ގިނަބައެއްގެ ޝައުގުވެރިކަން ހުއްޓުނީ މުބާރާތުގެ ޓީމުތަކަށް ގެންނަ މަޝްހޫރު ކުޅުންތެރީންގެ ސަބަބުންނެވެ. އެގޮތުން އިންޑިއަން ފުޓްސަލް ލީގުގައި ކުޅުމަށް މެންޗެސްޓަރ ޔުނައިޓެޑްގެ ލެޖެންޑް ރަޔާން ގިގްސް މިހާރު ވަނީ އެއްބަސްވެފައެވެ.
ރަޔާން ގިގްސްއާއި އޭނާގެ ކުރީގެ ޓީމްމޭޓް ޕައުލް ސްކޯލްސްވެ އިންޑިއަން ޕްރިމިއަރ ފުޓްސަލް ލީގަށް ކުޅޭނެ -- ފޮޓޯ: މިރަރ
ކުރިއަށް އޮތްތާ ކޯޗެއްގެ ގޮތުގައި ފެނިގެންދާނޭ ކަމަށް ގިނަ ބަޔަކު ގަބޫލުކުރި، ގިގްސް ފުޓްސަލް ލީގާ ގުޅިފައިވާއިރު، އޭގެ ކުރިން ޔުނައިޓެޑްގެ ކުރީގެ ތަރި ޕައުލް ސްކޯލްސް ވެސް ވަނީ ލީގަށް ސޮއިކޮށްފައެވެ.
ޕައުލް ސްކޯލްސްވެ އިންޑިއަން ޕްރިމިއަރ ފުޓްސަލް ލީގަށް ކުޅޭނެ -- ފޮޓޯ: މިރަރ
މީގެ އިތުރުން އެ ލީގާ ގުޅޭނެ ބޮޑެތި ނަންތަކުގެ ތެރޭގައި ބްރެޒިލްގެ ލެޖެންޑް ރޮނާލްޑީނިއޯ އާއި، ޗެލްސީ އަދި އޭސީ މިލާންގެ ލެޖެންޑް ހަނާން ކްރެސްޕޯއާއި ޗެލްސީގެ ކުރީގެ ތަރި ޑެކޯ އަދި ރެއާލް މެޑްރިޑާއި ސްޕެއިންގެ ކުރީގެ ޑިފެންޑަރު މިޝޭލް ސަލްގާޑޯ ފަދަ ނަން މަޝްހޫރު ކުޅުންތެރީން ހިމެނެއެވެ.
ޗެލްސީ އަދި އިންޓަމިލާންގެ ލެޖެންޑް ހަނާން ކްރެސްޕޯ -- ފޮޓޯ: މިރަރ
މި ނަންތަކާއެކު އިންޑިއާގެ ފުޓްސަލް ކުޅުންތެރީންގެ އިތުރުން ދުނިޔޭގެ ނަންމަޝްހޫރު ފުޓްސަލް ކުޅުންތެރީންވެސް މި މުބާރާތުގައި ފެނިގެންދާނެ އެވެ. އޭގެ ތެރޭގައި ޖެއިރޯ މެނޮއެލް ޑޮސް ސަންޓޯސް، ފްރަންސިސްކޯ ރުއިޒް ސެރާޓޯ، ލީންޑްރޯ ސިމީ، ގަބްރިއެލް ޑަސިލްވާ ޑިއާޒް، ލުއިސް އަމަޑޯ ޓަރޯޑޯގެ އިތުރުން "ފުޓްސަލްގެ ޕެލޭ"ގެ ނަމުން މަޝްހޫރުވެފައިވާ އެލެސަންޑްރޯ ރޮސާ ވިއޭރާވެސް އެ ލިސްޓްގައި ހިމެނެއެވެ.
ބްރެޒިލްގެ ފުޓްބޯޅަ ލެޖެންޑް ރޮނާލްޑީނިއޯ -- ފޮޓޯ: މިރަރ
ޖުމުލަ އަށް ޓީމާއެކު ޖުލައި 15 އިން 24 އަށް ކުރިއަށް ގެންދާ އިންޑިއަން ޕްރިމިއަަރ ފުޓްސަލް ލީގު އިންތިޒާމްކުރާ ޕްރިމިއަރ ފުޓްސަލްގެ ރައީސަކީ ބާސެލޯނާ އަދި ރެއާލް މެޑްރިޑްގެ ކުރީގެ ތަރި ލުއިސް ފީގޯއެވެ.