12 Jul 2016, 15:37
ފުލުހުންގެ މުއައްސަސާ އިން ކުރާ ޣައިރު ގާނޫނީ އަމުރަށް ތަބާވާ ވަކި ވަކި ފުލުހުން އެކަމުގެ ޒިންމާ ނަގަންޖެހޭނެ ކަމަށް އެމްޑީޕީން ބުނެފި އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ތަރުޖަމާނު އަދި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) ވިދާޅުވީ ޣައިރު ގާނޫނީ އަމުރު ކުރާ ފަރާތާއި އެ އަމުރަށް ތަބާވާ ފުލުހުން ވެސް ފަރުދީ ގޮތުން އެކަމުގެ ޒިންމާ ނަގަންޖެހޭނެ ކަމަށެވެ. އެއީ ގާނޫނު އަސާސީ އާއި ފުލުހުންގެ ގާނޫނުގައި ބަޔާންކޮށްފައިވާ ގޮތް ކަމަށާއި އެކަން އޮޅުވާލުމަށް ފުލުހުންގެ މުއައްސަސާ އިން މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.
ގާނޫނު އަސާސީގެ 245 ވަނަ މާއްދާގައި ބަޔާންކޮށްފައި ވަނީ ޣައިރު ގާނޫނީ އަމުރެއް ކުރާ މީހާ އާއި އެ އަމުރަށް ތަބާވާމީހާ އެކުރަނީ ކުށެކޭ. މާނައަކީ އެ އަމުރު ކުރާ މީހާ އަށް ވެސް ދައުވާ ކުރެވެން ޖެހޭނެއޭ. އެ އަމުރަށް ތަބާވި މީހާ އަށް ވެސް ދައުވާ ކުރެވެން ޖެހޭނެއޭ. ކިހިނެތްތޯ ފުލުހުންގެ މުއައްސަސާ ޖަލަށްލާނީ. ކޮންމެވެސް މީހެއްގެ މައްޗަށް ހުކުމް އަންނާނީއިމްތިޔާޒު ފަހުމީ
ނޫސްވެރިންނަށް މައުލޫމާތު ދެއްވަމުން އެމްޑީޕީގެ ނައިބު ރައީސް މުހައްމަދު ޝިފާޒު ވިދާޅުވީ ރޭ އޭނާ ފުލުސް އޮފީހަށް ހާޒިރުކުރީ ފުލުހުންނަކީ ކޮރަޕްޓު ބައެއް ކަމަށް މީޑިއާގައި ވިދާޅުވެފައިވާތީ ކަމަށެވެ.
އެކަމާ ގުޅޭ ގޮތުން ފުލުހުން ކުރި ސުވާލުގެ ޖަވާބުގައި އެކަން އެނގިވަޑައިގަތީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް އެހެން ވިދާޅުވުމުން ކަމަށް ދަންނަވާފައިވާނެ ކަމަށް އޭނާ ވިދާޅުވި އެވެ.
"އެބޭފުޅުން ސުވާލު ކުރެއްވީ ފުލުސް އޮފީސްތެރޭގައި ކޮރަޕްޓުވެފައި ތިބި މީހުން ތިބި ކަމާއި ސިޔާސީ ނުފޫޒު ވަދެފައިވާ ކަމަށް އަޅުގަނޑު ޓީވީގައި ދެއްކި ވާހަކައަކާ ބެހޭގޮތުން. އަޅުގަނޑު ދެންނެވިން އަޅުގަނޑު އުފާވެއްޖެއޭ ތިޔަބޭފުޅުން ތިވާހަކަ ފެއްޓެވީމާ ވެސް ދިވެހިރާއްޖޭގެ ރައީސުލްޖުމްހޫރިއްޔާ ދިވެހި ގައުމާ މުޚާތަބުކޮށް ވިދާޅުވި ވާހަކައެކޭ އެއީ. ދިވެހި ފުލުހުންގެ ތެރޭގައި ސިޔާސީ ނުފޫޒު އޮތް ވާހަކަ،" ޝިފާޒު ވިދާޅުވި އެވެ.
އެމްޑީޕީގެ ސެކްރެޓަރީ ޖެނެރަލް އަނަސް އަބްދުއްސައްތާރު ވިދާޅުވީ މައުލޫމާތު ސާފުކުރުމަށް ކަމަށް ބުނެ ރޭ ޝިފާޒު ފުލުސް އޮފީހަށް ހާޒިރުކޮށް ގިނަ ވަގުތު ބަހައްޓާފައި ވަނީ ގާނޫނު އަސާސީއާ ކަނޑައެޅިގެން ޚިލާފަށް ކަމަށެވެ.
އޭނާ ވިދާޅުވީ ޝިފާޒު ގެންދިޔައީ ކުށެއްގެ ތުހުމަތުގައި ކަމަށް ވެސް ފުލުހުން ނުބުނާ ކަމަށެވެ. ހަމައެހެންމެ އޭނާ ގެންދިޔައީ ތަހުގީގު ކުރާ މައްސަލައަކާ ގުޅިގެން ކަމެއް ވެސް ފުލުހުން ނުބުނާ ކަމަށް އަނަސް ވިދާޅުވި އެވެ.
ޝިފާޒު ރޭ ފުލުސް އޮފީހަށް ހާޒިރުކުރީ ރޭ އެމްޑީޕީން ބާއްވަން އުޅުނު ސުލްހަވެރި ހިނގާލުމަށް ހުރަސްއެޅުމުގެ ގޮތުން ކަމަށް ވެސް އޭނާ ވިދާޅުވި އެވެ.