10 Jul 2016, 12:40
އެންމެ ގިނަ ބައެއްގެ މެދުގައި މަގުބޫލު ސޯޝަލް ނެޓްވޯކަކީ ފޭސްބުކް ކަމުގައިވާ އިރު، އެތައް ކުންފުންޏަކުން ވަނީ ފޭސްބުކްއާ ވާދަ ކުރުމަށް މަސައްކަތް ކޮށްފަ އެވެ. ނަމަވެސް އެ މަގްސަދުގައި ތައާރަފުކުރި ގިނަ ނެޓްވޯކުތައް ވަނީ ފޭލުވެފަ އެވެ. ގޫގްލް ޕްލަސްއަކީ އެކަމުގެ ހެއްކެކެވެ.
ޔާހޫއަކީ ވެސް ފޭސްބުކްއާ ނުހަނު ބޮޑަށް ވާދަ ކުރާ ކުންފުންޏެކެވެ. އެހެން ނަމަވެސް ގޫގްލް ފަދަ އިން އާ ސޯޝަލް ނެޓްވޯކެއް މި ކުންފުނިން ތައާރަފެއް ނުކުރެ އެވެ.
ޔާހޫ އިން ހަދާފައިވާ ގޮތަކީ، ފޭސްބުކްގެ މެސެންޖާ އެޕްގެ ތެރެއަށް ޔާހޫގެ ހަތަރު "ބޮޓް"އެއް އިންޓަގްރޭޓު ކޮށްލީ އެވެ. ޔާހޫ ނިއުސް، ޔާހޫ ވެދާ އަދި ޔާހޫ ފައިނޭންސެވެ. ޔާހޫގެ މި ތިން ފީޗާ، ފޭސްބުކްގެ މެސެންޖާ ބޭނުންކޮށްގެން އެކްސެސް ކުރެވޭނެ އެވެ. ފޭސްބުކް މެސެންޖާ އެޕްގެ ސާޗް ބާގައި @YahooFinance، @YahooNews ނުވަތަ @YahooWeather ޖެހުމުން އިންޓެރެކްޓިވް ޗެޓް އެކައުންޓެއްގެ ގޮތުގައި އެ މައުލޫމާތުތައް ހޯދައިދެ އެވެ.
މީގެ އިތުރުން ޔާހޫ އިން ތައާރަފު ކުރި ހަތަރުވަނަ ބޮޓްއަކީ ރާމާމަކުނެކެވެ. ފޫހިވެފައި ހުންނަ ވަގުތެއްގައި ވާހަކަ ދައްކާލައި، މުނިފޫހިފިލުވައިދޭ މި ޗެޓު ބޮޓަކީ މަޖާ ކެރެކްޓާ އެކެވެ. މެސެންޖާ ސާޗްގައި @MonkeyPet ޖެހުމުން މި ބޮޓް ފެންނާނެ އެވެ. އަދި މި ރާމާމަކުނަށް ބޭނުން ނަމެއް ކިޔުމުގެ ފުރުސަތު ޔޫޒާ އަށް ލިބޭ އިރު، އެކި މީހުންނާ ވާހަކަ ދައްކާ ރާމާމަކުނު ނިސްބަތްވަނީ ތަފާތު ގައުމުތަކަށެވެ.
އެގޮތުން ރާއްޖެ އަށް ނިސްބަތްވާ ކަމަށް ވެސް ބައެއް ފަހަރު އެ ރާމާމަކުނު ބުނެ އެވެ.
ކޮންމެއަކަސް ޔާހޫ އިން ކޮށްފައި މި ވަނީ ތަފާތު ކަމެކެވެ. ވާދަވެރިޔާއާ ވާދަ ކުރުމުގެ ބަދަލުގައި، އަމިއްލަ ޕްރޮޑަކްޓް ޕްރޮމޯޓު ކުރުމަށް ޓަކައި ވާދަވެރިޔާއާ ބައިވެރިވީ އެވެ.