Last Updated: 9 year 5 month ago
އުފާވެރި ފިޠުރު ޢީދުގެ ތަހްނިޔާއާއި މުބާރަކްބާދީ ސަން އޮންލައިންގެ އެންމެހާ ކިޔުންތެރީންނަށް އަރިސްކުރަން.
1437 ވަނަ އަހަރުގެ ފިޠުރު ޢީދާ ގުޅިގެން ރާއްޖޭގެ އެކި ކަންކޮޅުތަކުގައި ކުރިއަށްދާ ހަރަކާތްތަކާ ގުޅޭ އެންމެ ފަހުގެ ޚަބަރުތަކާއި ފޮޓޯތަށް ސަންގެ ކިޔުންތެރީންނާ ހަމައަށް ގެނެސްދިނުމަށް ކުރިއަށް ގެންދާ ޚާއްސަ ލައިވް ކަވަރޭޖަށް މަރުހަބާ!
ޢީދާ ގުޅޭ ޚަބަރާއި ފޮޓޯތައް، ވައިބާ މެދުވެރިކޮށް ސަން އޮންލައިންގެ ހޮޓްލައިން، އަށް ފޮނުވޭނެ. އަދި ސަން އޮންލައިންގެފޭސްބުކް ޕޭޖަށްފޮނުއްވުމުން ވެސް އަޅުގަނޑުމެން އެ މައުލޫމާތާއި ފޮޓޯތައް މި ބްލޮގްގައި ހިމަނައިދޭނަން.
މީގެ އިތުރުން މިރޭ ފީވަކުގައި ވަނީ ބޮޑުމާލި ނެރެފައި، އަދި މިރޭ ބޮޑުބެރު ޝޯވއެއް ކުރިއަށް ގެންދާނެ.
ފީވަކުގައި ޢީދު ފާހަގަކުރުމުގެ ގޮތުން މިއަދު ހެނދުނު ވަނީ މަސްރޭހެއް ބާއްވާފައި، އަދި މިއަދު ހަވީރު އަންހެނުންގެ ވާދެމުމުގެ މުބާރާތެއް ކުރިއަށް ގެންގޮސްފައި. އަދި ރައްޔިތުން އެއްވެ ބާބަކިއު ހެދުންވެސް އޮތް.
ށ. ފީވަކުގައި މިއަދުގެ ޢީދު ނަމާދުކޮށްފައި ވަނީ އެރަށު ފުޓްބޯޅަ ދަނޑުގައި ބޮޑު ޖަމާއަތެއްގައި.
ހުޅުމާލޭ ސެންޓްރަލް ޕާކް ސަރަހައްދުގައި މިއަދު ހަވީރު ވަނީ، ސްޓްރީޓް އާޓް ފެސްޓިވަލެއް ބާއްވާފައި.
މާލޭގައި މިއަދު ކުރިއަށް ގެންދިޔަ އީދޫ ކުޅިވަރުތަކުގެ ތެރޭގައި ބޮޑުމަސް ނެރުން، މާލި، ކޯޑި ކެނޑުން، ބޮޑުބެރު، ދަނޑިޖެހުން އަދި ބަނޑީޔާވެސް ހިމެނޭ.
ޔޫތު މިނިސްޓްރީއާއި އެޗްޑީއެފްސީ އަދި ވިލިމާލެއާއި ހުޅުމާލެއާއި މާލޭގައި ދިރިއުޅޭ ޒުވާނުން ގުޅިގެން މިއަދު މާލޭގައި ބޭއްވި އީދު ކުޅިވަރުތައް ބަލައިލުމަށް ގިނަ ބަޔަކު މަގުތަކަށް ޖަމާވި.
ސްރީ ލަންކާގައި ހުންނަ މޯލްޑިވިއަން އެޑިއުކޭޝަނަލް އެންޑް ކަލްޗަރަލް ސެންޓަރު (އެމްއީސީސީ) އިން އިންތިޒާމްކޮށްގެން އެގައުމުގައި ދިރިއުޅޭ ދިވެހީން ބޮޑު ޖަމާޢަތުގައި 1437 ވަނަ އަހަރުގެ ފިޠުރު ޢީދު ނަމާދު ކޮށްފިއެވެ.
ސްރީ ލަންކާގައި ހުންނަ ދިވެހިރާއްޖޭގެ ހައިކޮމިޝަންގެ ތާޑް ސެކްރެޓަރީ އަދި ސޯސަންވިލާ ހިންގެވުމާ ހަވާލު ހުންނެވި އަބްދުއްރަޝީދު (އަދުރޭ) މިއަދު ސަން އަށް ވިދާޅުވީ، އެމްއީސީސީގެ ފުޓްސަލް ދަނޑުގައި މިއަދު ކުރި ޢީދު ނަމާދުގައި ގިނަ އަދަދެއްގެ ދިވެހީން ބައިވެރިވެފައިވާ ކަމަށެވެ.
މިއީ ރާއްޖޭން ބޭރުގެ ގައުމެއްގައި ދިވެހިބަހުން ޢީދު ޚުތުބާ އިވިގެންދިޔަ ފުރަތަމަ ފަހަރެވެ. އިމާމުވެ ޢީދު ނަމާދުކުރެއްވީ، އައްޝައިޚް ޢަލީ ޝަރީފްއެވެ.
ކޮޅުމަޑުލު ދިޔަމިގިލީގައި މިއަދުގެ ފިޠުރު ޢީދު ނަމާދަށް ފަހު ވަނީ، ޒަމާނުއްސުރެން އެރަށުގައި ޢީދުގެ ފެށުން ފާހަގަކުރަމުން އަންނަ ގޮތަށް އީދުގެ ހަރަކާތްތައް ކުރިއަށް ގެންގޮސްފައި.
މާލޭގެ އިތުރުން އީދު ނަމާދަށްފަހު ދެން ހަދިޔާ ބެހުން ކުރިޔަށް ގެންގޮސްފައިވަނީ އައްޑުއާއި ފުވައްމުލަކުގައި. އަދި މިއަދު ހަވީރު، ލ. ފޮނަދޫ ބަނދަރު ސަރަހައްދާއި، ލ. ގަން މުކުރިމަގު ބަނދަރު ސަރަހައްދު، ގަން މަތިމަރަދޫ ޤުރުއާނާއި ބެހޭ މަރުކަޒު ހުންނަ ސަރަހައްދު، އަދި ލ. ތުނޑި އިހައްދޫ ސްކޫލް ސްޓޭޖް ސަރަހައްދުގައިވެސް މިއަދު ހަވީރު ވަނީ ހަދިޔާ ބެހުމަށް ހަމަޖައްސާފައި. ހަމަ އެއާއެކު، ތިނަދޫ ކުޑަކުދިންގެ ޕާކު ސަރަހައްދުގަޔާއި، ޑރ. އަބްދުލް ސަމަދު މެމޯރިއަލް ހޮސްޕިޓަލް ސަރަހައްދުގައިވެސް މި ހަރަކާތް ދިރާގުން ކުރިޔަށް ގެންދާނެ. މިއަދު ހަވީރު 4:30 ން ފެށިގެން ކުޅުދުއްފުށީ ބޮޑު މަގާއި ގއ. ގައްދޫ މައިމަގުގައި، 'ޢީދު އުފާ' ހަރަކާތްތައް ކުރިޔަށް ގެންދިޔުމަށް ހަމަޖެހިފައިވާ ސަރަހައްދުގެ އިތުރުން ބ. އޭދަފުށީ 'ހިއްކި ބިން' ސަރަހައްދުތަކުގައިވެސް ދިރާގުގެ މުވައްޒަފުން އީދު ހަދިޔާ ބެހުމުގައި ހަރަކާތްތެރި ވާނެ.
ދިވެހިރައްޔިތުންނާއެކު ބަރަކާތްތެރި ފިޠުރު އީދު ފާހަގަކުރުމުގެ ގޮތުން މުއާސަލާތީ ކުންފުނި ދިރާގުން މާލެއާއި ރާއްޖޭގެ އެކި ސަރަހައްދުތަކުގައި އީދުގެ ހަދިޔާ ބެހުމުގެ ހަރަކާތްތަކެއް ކުރިޔަށްގެންގޮސްފި.
"މައި އުރީދޫ" އިން ޑޭޓާ ޕެކޭޖެއް އެކްޓިވޭޓު ކުރާ ކޮންމެ ފަރާތަކަށް މި އީދުގައި، އެކްޓިވޭޓު ކުރާ ޕެކޭޖުގެ ދެ ގުނަ ހިލޭ އުރީދޫއިން ދެނީ.
"އެޕްމެދުވެރިކޮށް މިސާލަކަށް 2ޖީބީ ޑޭޓާ ނަގައިފިނަމަ 4ޖީބީ ލިބޭނެ، 100 ޕަސެންޓް ލިބޭނެ އިތުރަށް،"
ޢީދު ބާރިކް.އުފާވެރި ފިޠުރު ޢީދުގެ ތަހްނިޔާއާއި މުބާރަކްބާދީ ސަން އޮންލައިންގެ އެންމެހާ ކިޔުންތެރީންނަށް އަރިސްކުރަން.
މޫސުން ގޯސް ނޫންނަމަ، މާދަމާ ހަވީރު 4:30ގައި ޒުވާނުންގެ މަރުކަޒު ސަރަހައްދުން ކުޅިވަރުތައް ފަށައިގެން ފަސް ސަރަހައްދެއްގައި މަޑުކުރަން ވަނީ ހަމަޖެހިފައި. އެގޮތުން މަޖީދީ މަގުން ނަލަހިޔާ ކައިރީގައާއި، އޮލިމްޕަސް ކައިރި، ސޯސަންމަގުން ވީޓީވީ ކައިރި، އަދި ޖުމްހޫރީ މައިދާނާއި، ފަރީދީމަގުން ނޮވެލްޓީ ކައިރީ މަޑުކުރުމަށްފަހު ކުޅިވަރުތައް ނިންމައިލާނީ ޒުވާނުންގެ މަރުކަޒު ކައިރިން.
ކުޅިވަރުތަކުގެ ތެރޭގައި ބޮޑުމަސް ނެރުން، މާލި، ކޯޑި ކެނޑުން، ބޮޑުބެރު، ދަނޑިޖެހުން އަދި ބަނޑީޔާވެސް ހިމެނޭ.
ޢީދު ދުވަހުގެ ފުރަތަމަ ދުވަހު 4:30 އިން 6:00 އަށް މާލޭގައި ޢީދު ކުޅިވަރުތައް ކުރިއަށް ގެންދިއުމަށް ހަމަޖެހިފައި ވާއިރު، ހުޅުމާލޭގައި ޢީދު ކުޅިވަރުތައް ކުރިއަށް ގެންދާނީ ވަޅުޢީދު ދުވަހު.