05 Jul 2016, 15:32
ގއ. ގެމަނަފުށީގައި ހިންގާ ދައްމަރު ޖަމިއްޔާއިން މިއަދު އެރަށުގައި "ކޮކާކޯލާ މަސްފޯރި"ގެ ނަމުގައި ބާއްވާ މަސް ރޭސް ފެށުމަށް ތައްޔާރު ވެއްޖެ އެވެ.
މިއީ ފިތުރު ޢީދު ދުވަހުގެ މުނާސަބަތުގައި އެޖަމިއްޔާއިން ބާއްވާ މަސް ރޭހެކެވެ.
މިއަދު ހަވީރު 4:00ގައި ފަށައި، މިރޭ 10:00 އާ ހަމައަށް ކުރިޔަށްދާ މަސް ރޭހުގައި 16 ޓީމަކުން ބައިވެރިވެ އެވެ. މުބާރާތުގެ މަގްސަދަކީ އެންމެ ގިނަ މަސް ބޭނޭ ޓީމެއް ހޮދުމެވެ.
އެއްވަނައަށް އަންނަ ޓީމަކަށް 5،000 ރުފިޔާގެ އިނާމެއް ހުށަހަޅާފައިވާ އިރު ދެވަނައަށް އަންނަ ފަރާތަކަށް 2،000 ރުފިޔާގެ އިނާމެއް ހުށަހަޅާފައިވެ އެވެ. އަދި ތިންވަނައަށްދާ ފަރާތަކަށް 1،000 ރުޔުފިޔާގެ ފައިސާގެ އިނާމު ހުށަހަޅާފައިވެ އެވެ. މީގެ އިތުރުން އެންމެ ގިނަ މަސް ބޭނި ކެޔޮޅާއި، އެންމެ ބޮޑު މަސް ބޭނި ކެޔޮޅާއި އެންމެ ހިންގުންތެރި ކެޔޮޅު ވެސް ހޮވައި، އެ ފަރާތްތަކަށް އިނާމު ހުށަހަޅާފައިވެ އެވެ.
ޖުމްލަ 16 ޓީމެއް ބައިވެރިވާ މި ރޭހުގެ މެއިން ސްޕޮންސާއަކީ ކޮކާކޯލާ އެވެ. އަދި ކޯ ސްޕޮންސަރުގެ ގޮތުގައި އައިޓެމްސް ހަމަޖައްސާފައިވާ އިރު ޕްރިންޓިންގް ސްޕޮންސާއަކީ އެމް ސެވަން އެވެ.
މި މުބާރާތުގެ އޮންލައިން މީޑިއާ ޕާޓްނަރަކީ ސަން އޮންލައިނެވެ.