05 Jul 2016, 11:50
ޓޮމް ކްރޫޒްގެ ކުރިއަށް އޮތް ފިލްމު، "ދަ މަމީ" އިން ދީޕިކާ އަށް ފުރުސަތު ގެއްލިއްޖެ އެވެ.
ހަބަރުތައް ބުނާ ގޮތުން ދީޕިކާ ވަނީ އެ ފިލްމަށް އޮޑިޝަން ދީފަ އެވެ. އަދި ދީޕިކާ ހުރީ ޖަވާބަކަށް ކެތްމަދު ވެފައި ކަމަށްވެ އެވެ.
ނަމަވެސް ދީޕިކާގެ ގާތް ފަރާތަކާ ހަވާލާދީ ރިޕޯޓުތައް ބުނާ ގޮތުން، އެ ރޯލުން ފެންނާނީ ދީޕިކާ އެއް ނޫނެވެ.
ދީޕިކާ އޮޑިޝަން ދީފައި ވަނީ އޭޝިޔާގެ ޕްރިންސަސް އެއްގެ ރޯލަށެވެ. އެއީ މާ ބޮޑު ރޯލެއް ނޫނެވެ. ހަމައެކަނި ޓޮމް ކްރޫޒްގެ ހިޔާލަށް އަންނަ މަންޒަރެއްގައި އުޅޭ ކެރެކްޓާ އެކެވެ.
ދީޕިކާ --
"ރޯލު ކިތަންމެ ކުޑަ ނަމަވެސް ދީޕިކާ ހުރީ ޓޮމް ކްރޫޒް އާއެކު މަސައްކަތް ކޮށްލަން ވަރަށް ބޮޑަށް ބޭނުންވެފައި. އެކަމަކު އެ ރޯލަށް ދީޕިކާ ނުހޮވޭކަން މިހާރު ވަނީ އެނގިފައި،" ދީޕިކާގެ ގާތް ފަރާތަކުން ބުނެފައިވެ އެވެ.
ދީޕިކާގެ އިތުރުން ހުމާ ގުރޭޝީ ވެސް ވަނީ އެ ރޯލަށް އޮޑިޝަން ދީފަ އެވެ. ހުމާ އަށް ވެސް އަދި ޖަވާބެއް ލިބިފައި ނުވާކަމަށްވެ އެވެ.
ހުމާ ގުރޭޝީ --
އެ ފިލްމުން ފުރުސަތު ނުލިބުނު ނަމަވެސް ދީޕިކާ މިހާރު ކުރަމުން އަންނަނީ އޭނާގެ ފުރަތަމަ ހޮލީވުޑް ފިލްމު "ޓްރިޕަލް އެކްސް: ދަ ރިޓާން އޮފް ޒެންޑާ ކޭޖު"ގެ މަސައްކަތްތަކެވެ. އެ ފިލްމުގައި ދީޕިކާ އާއެކު ފެނިގެންދާނީ ވިން ޑީސަލް އެވެ.