ސައުދީ އަރަބިއްޔާގެ މަދީނާގައި ހުންނަ މަސްޖިދުއްނަބަވީ ކައިރީގައި ބޮމެއް ގޮއްވާލައިފި އެވެ.

މަސްޖިދުލް ނަބަވީގެ ކައިރީގައި މިރޭ ދީފައިވަނީ ޖާނުން ފިދާވުމުގެ ހަމަލާއެކެވެ. މި ހަމަލާ ދީފައިވަނީ މަސްޖިދުލް ނަބަވީ ކައިރީގައި ޕާކު ކޮށްފައި އޮތް ކާރެއްގައި ބޮމެއް ގޮއްވާލައިގެންނެވެ.

ހާދިސާގެ ވީޑިއޯތައް ސޯޝަލް މީޑިއާގައި އާންމުވެފައިވާ އިރު، މަރުވެފައިވާ މީހުންގެ ހަށިތައް އެ ކާރުގެ ކައިރީގައި މަގުމަތީގައި ހުރި މަންޒަރު ފެނެ އެވެ.

މި ހާދިސާއާ ގުޅޭ ގޮތުން ފޮރިން މިނިސްޓްރީން ކުރި ޓްވީޓެއްގައި ބުނީ، ސައުދީގައި ހިނގި ހާދިސާގެ ޚަބަރުތައް އެ މިނިސްޓްރީން ބަލަމުންދާ ކަމަށާއި އެ ހާދިސާގައި އެއްވެސް ދިވެއްސަކަށް ގެއްލުމެއް ލިބުނުކަމުގެ ރިޕޯޓެއް އަދި މިހާތަނަށް ލިބިފައި ނުވާ ކަމަށެވެ.

ހައްޖު ކޯޕަރޭޝަންނުން ބުނީ، އެ ކޯޕަރޭޝަންގެ ބެލުމުގެ ދަށުން އުމްރާއަށް ދިޔަ ހުރިހާ ދިވެހީންވެސް މިވަގުތު ތިބީ މައްކާގައި ކަމަށެވެ.

"ހައްޖު ކޯޕަރޭޝަނުގެ ހުރިހާ އުމްރާވެރިން މިވަގުތު ތިބީ މައްކާގައި. މިހާރު މަދީނާގައި ހިނގައިގެން އުޅޭ ހާދިސާގައި އެއްވެސް ގެއްލުމެއް ހައްޖު ކޯޕަރޭޝަންގެ އުމްރާވެރިންނަކަށް ނުލިބޭ،" ހައްޖު ކޯޕަރޭޝަންގެ މެނޭޖިން ޑިރެކްޓަރ ޔާމިން އިދުރީސް ވިދާޅުވިއެވެ.

ބޮން ގޮއްވާލާފައި ވަނީ މަސްޖިދުލް ނަބަވީ ކައިރީގައި އޮންނަ ޖަންނަތުލް ބާޤީ ޤަބުރުސްތާނުގެ ކައިރީގައެވެ. މި ޤަބުރުސްތާނަކީ ކީރިތި ރަސޫލާ މުހައްމަދު ޞައްލަﷲ ޢަލައިހި ވަސައްލަމާގެ ކިރުމައިކަމަނާ ހަލީމަތުގެފާނާއި، ޚަދީޖަތުގެފާނުން ފިޔަވައި ކީރިތި ރަސޫލާގެ ހުރިހާ އަނބިކަނބަލުންނާއި، ކީރިތި ރަސޫލާގެ ދަރިކަލުން އިބްރާހީމާއި ދަރިދަރިކަނބަލުން ރުޤިއްޔާ، އުއްމު ކުލްސޫމް، ޒައިނަބު އަދި ފާތިމަތުގެފާނު ފަސްދާނުލާފައިވާ ޤަބުރުސްތާނެވެ. މީގެ އިތުރުން ޚަލީފާ އުސްމާން ބިން އައްފާން ވެސް ފަސްދާނުލާފައި ވަނީ ޖަންނަތުލް ބާޤީ ޤަބުރުސްތާނުގައެވެ.

ކީރިތި ރަސޫލާއާއި އަބޫބަކުރުގެފާނާއި އުމަރުގެފާނު ފަސްދާނުލާފައި ވަނީ މަސްޖިދުލް ނަބަވީގައެވެ.