03 Jul 2016, 10:45
ސްކޫލެއް ނެތް ބ. ފެހެންދޫއިން ތައުލީމް ހާސިލް ކުރުމަށް ބ.ގޮއިދޫއަށް ދާ 13 ކުދިން ގެންދިއުމަށް އެޑިއުކޭޝަން މިނިސްޓްރީ އިން ޑިންގީއެއް ހަމަޖައްސައި ދަތުރުތައް ފަށައިފި އެވެ.
މިދިޔަ ބުރާސްފަތި ދުވަހުން ފެށިގެން ފެހެންދޫ ކައުންސިލުން ހިންގަމުންދިޔަ ޑިންގީ ދަތުރުތައް ހުއްޓާލީ ގެއްލުންވާތީ އާއި އެއީ ކިޔަވާ ކުދިންނަށް ރައްކާތެރި ގޮތެއް ނޫން ކަމަށް ބުނެ އެވެ.
ގޮއިދޫ ސްކޫލުގެ ޕްރިންސިޕަލް މުހައްމަދު ނިޒާމް މިއަދު ސަން އަށް ވިދާޅުވީ މިއަދު އެ ދަތުރުތައް އެޑިއުކޭޝަން އިން ހަމަޖެއްސި ޑިންގީއެއްގައި ދަތުރުތައް ފަށާފައިވާ ކަމަށެވެ. އެކަންކުރަނީ އެކުދިންނަށް ދޭ 1000 ރުފިޔާގެ އެލަވަންސްގެ ތެރެއިން ކަމަށް ވެސް ނިޒާމް ވިދާޅުވި އެވެ.
އެޑިއުކޭޝަން މިނިސްޓަރީއާއި ފެހެންދޫ ކައުންސިލްއިން ބައްދަލު ކުރަނީ--
ކުދިން ސުކޫލަށް އައުމާއި އިންޓަވަލް ގަޑީގައި ބެލެނިވެރިން އައުމުގެ އިތުރުން ސްކޫލް ނިމިގެން ކުދިން ފެހެންދު އަށް ގެންދިއުމުގެ ހިދުމަތް އެޑިންގީ އިން ލިބިގެންދާނެ ކަމަށް ނިޒާމް ވިދާޅުވި އެވެ.
މިފަހަރު ވެސް ބޭނުންކުރަނީ ހިޔާކޮށްފައިވާ ޑިންގީއެއް ނޫނެވެ. ނިޒާމް ބުނީ ފެހެންދޫ އާއި ގޮއިދޫއާއި ދޭތެރޭ ދުއްވުމަށް ހިޔާކޮށްފައިވާ އުޅަނދެއް ނެތް ކަމަށެވެ.
"ކުރީގެ ޑިންގީ އަށް ވުރެ އުސްވާނެ، ކުރީގައި ދުއްވީ 30 ހޯސްޕަވަރުގެ ޑިންގީއެއް މިފަހަރު މިއީ 60 ހޯސްޕަވަރުގެ ޑިންގީއެއް އެހެންވީމަ ދަތުރު ވެސް އަވަސްވާންޖެހޭނެ،" ނިޒާމް ވިދާޅުވި އެވެ.
މީގެ އަށް އަހަރު ކުރިން 2008 ވަނަ އަހަރު ފެހެންދޫ ސްކޫލުގެ ކިޔެވުން ވަނީ ހުއްޓާލައިފަ އެވެ. އޭރު އެ ސްކޫލުގައި ކިޔަވަމުންދިޔައީ ހަ ކުދިންނެވެ. އެހެންކަމުން ސަރުކާރުން ހަމަޖެއްސީ އެ ސްކޫލު ބަންދުކޮށް ބ. އަތޮޅުގައި ތައުލީމް ހާސިލްކުރާ އެރަށުގެ ކޮންމެ ކުއްޖަކަށް 1000 ރުފިޔާގެ އެލަވެންސެއް ދިނުމަށެވެ. ބައެއް ކުދިން އެހެން ރަށްރަށަށް ކިޔަވަން ދިޔަ އިރު ރަށުގައި ކިޔަވަން މަޑުކުރި ކުދިން އިހުތިޔާރުކުރީ ޑިންގީއެއްގައި ގޮއިދޫއަށް ދިއުމަށެވެ.