02 Jul 2016, 21:31
ރައީސުލްޖުމްހޫރިއްޔާ ޢަބުދުﷲ ޔާމީނު އަވަހާރަކޮށްލަން މަސައްކަތް ކުރިކަމުގެ ތުހުމަތަށް ރާއްޖޭގައި ހައްޔަރުކޮށްފައިވާ ސްރީ ލަންކާގެ ސްނައިޕަރެއް ކަމަށް ބުނާ މީހާގެ ބަންދަށް އަނެއްކާ ވެސް 15 ދުވަސް ކްރިމިނަލް ކޯޓުން ޖަހައިފި އެވެ.
ދިވެހީންގެ ބަޔަކު ގިނަ އަދަދަކަށް ފައިސާދީގެން ރައީސް ޔާމީން އަވަހާރަކޮށްލަން އުޅޭ ކަމުގެ ތުހުމަތެއްގައި އުމުރުން 27 އަހަރުގެ ލަހިރޫ މަދުޝަންކާ ނަމަކަށް ކިޔާ އެ މީހާ ހައްޔަރުކުރީ މިދިޔަ އަހަރުގެ އޮކްޓޯބަރު މަހުގެ 24 ވަނަ ދުވަހު، ފުރަން ގޮސް އެއާޕޯޓުގައި ހުއްޓައެވެ.
ފުލުހުންގެ މީޑިއާ އޮފިޝަލު ވިދާޅުވީ، އޭނާގެ ބަންދުގެ މުއްދަތު އިތުރުކޮށްފައިވަނީ މިދިޔަ ބުރާސްފަތި ދުވަހު ކަމަށެވެ. އޭނާގެ މައްސަލަ ތަހުގީގު ކުރަމުންދާތާ މިހާރު އަށް މަހަށްވުރެ ގިނަ ދުވަސްވެފައިވާއިރު، މިއީ އޭނާގެ ބަންދުގެ މުއްދަތު އިތުރުކުރި 22 ވަނަ ފަހަރެވެ.
ލަންކާގެ ސްނައިޕަރެއް ކަމަށް ބުނާ އެ މީހާ ރާއްޖެ ގެނައި މައްސަލާގައި ފުލުހުން ވަނީ މިދިޔަ ޑިސެމްބަރު މަހުގެ ތެރޭގައި ތިން ދިވެހިން ވެސް ހައްޔަރުކޮށްފައެވެ. ނަމަވެސް އެ ތިން މީހުން ވެސް ބަންދުގައި ބެހެއްޓުމަށް ނުފެންނާތީ ކަމަށް ބުނެ ކޯޓު އަމުރެއްގެ ދަށުން މިހާރު ވަނީ ދޫކޮށްލާފައެވެ.
ހިކިމަސް ގަންނަން ރާއްޖެއައި ކަމަށް ބުނާ ލަންކާ ސްނައިޕަރުގެ މައްސަލާގައި އޭނާ އަކީ ކުށެއް ނެތް މީހެއް ކަމަށް ލަންކާއިން ބުނާއިރު، އެގައުމުގެ ސަރުކާރުން ވަނީ އޭނާ އަކީ އެއްވެސް އަސްކަރީ ތަމްރީނެއް ލިބިފައިނުވާ މީހެއް ކަމަށް ބުނެފައެވެ.
އަދި ހައްޔަރުކޮށްފައިވާ ސްނައިޕަރުގެ މަންމަ ބުނާގޮތުން، އޭނާގެ ދަރިފުޅު ރާއްޖެއަށް އައީ ވަޒީފާއެއް ހަމަޖައްސައިދޭނެ ކަމަށް ބަޔަކު ބުނުމުންނެވެ.
ނަމަވެސް، ކުރީގެ ހޯމް މިނިސްޓަރު އުމަރު ނަސީރު ވިދާޅުވެފައިވަނީ، ސުނައިޕަރެއް ކަމަށް ބުނެ ފުލުހުން ހައްޔަރުކުރީ ހިކިމަސް ގަންނަން ރާއްޖެ އައި މީހެއް ނޫން ކަމަށެވެ. އަދި އެ މައްސަލައަކީ ވަރަށް ވަރުގަދަ މައްސަލައެއް ކަމަށް ވެސް ވިދާޅުވި އެވެ.