29 Jun 2016, 15:34
ކުނި އުކާލުމަށް ރިޒާވޮއާ މޯލްޑިވްސް ޕްރައިވެޓް ލިމިޓެޑުގެ ދޯންޏަކުން ކުރި ދަތުރުތަކުގެ އަގަށްވާ ފައިސާއާ ޖޫރިމަނާއާ އެކު 2.5 މިލިއަން ޑޮލަރު ދެއްކުމަށް ޖުމެއިރާ ދެވަނަފުށީގެ މައްޗަށް ސިވިލް ކޯޓުން މިއަދު ހުކުމް ކޮށްފި އެެވެ.
ރިޒާވޮއާ މޯލްޑިވްސް ޕްރައިވެޓް ލިމިޓެޑާ އެކު ޖުމެއިރާ ދެވަނަފުށިން އެއްބަސްވުމެއް ހަދާފައިވަނީ އެރިސޯޓުގެ ބައެއްތަކެތި ސަޕްލައިކުރުމަށެވެ. ނަމަވެސް އެ އެއްބަސްވުމުގެ ބޭރުން ކުނި އުކާލާފައިވީ ނަމަވެސް ފައިސާ ނުދައްކައިގެން ފައިސާ ހޯދުމަށް ރިޒާވޮއާ މޯލްޑިވްސް ޕްރައިވެޓް ލިމިޓެޑުން ދައުވާ ކުރީ މިދިއަ އަހަރު އެވެ.
މިއަދު ސިވިލް ކޯޓުން ކުރި ހުކުމުގައި ބުނެފައި ވަނީ ކުނި އުކާލުމަށް ރިޒާވޮއާ މޯލްޑިވްސް ޕްރައިވެޓް ލިމިޓެޑުގެ ދޯންނެއް ދަތުރުތަކެއްކޮށް ފައިސާ ނުދައްކައިވާކަން ޝަރީއަތަށް ހުށަހެޅި ލިޔެކިޔުންތަކުން ސާބިތުވާ ކަމަށެވެ. އޭގެ ތެރޭގައި އިންވޮއިސްއާއި ތިލަފުއްޓަށް ކުނި އުކާލިކަން އަންގައިދޭ ލިޔުންތައް ހިމެނޭކަމަށް ހުކުމުގައިވެ އެވެ.
އެހެންކަމުން ނުދައްކާވާ ޕްރިންސިޕަލް އެމައުންޓް 2،730،000 ޑޮލަރާއި، އެމައްސަލަ ކޯޓަށް ހުށަހެޅި ދުވަހާއި ހަމައަށް ޖޫރިމަނާގެ ގޮތުގައި އަރާފައިވާ 2،293،،200 ޑޮލަރާއި އެކު ޖުމްލަ 2،566،200 ޑޮލަރު ދެއްކުމަށް ޖުމެއިރާ ދެވަނަފުށީގެ މައްޗަށް ވަނީ ހުކުމްކޮށްފަ އެވެ.
އެފައިސާ މިއަދުންފެށިގެން ހަމަސްދުވަހުގެ ތެރޭގައި ރިޒާވޮއާ މޯލްޑިވްސް ޕްރައިވެޓް ލިމިޓެޑަށް ދެއްކުމަށް ކޯޓުން ވަނީ އަންގައިފަ އެވެ.