29 Jun 2016, 14:37
އުރީދޫގެ ފަރާތުން ހުޅުމާލޭ ސެންޓްރަލް ޕާކަށް ހިލޭ ވައިފައި ދޭން ފަށައިފިއެވެ.
އުރީދޫގެ ސީނިއާ އެގްޒެކްޓިވް ޕަބްލިކްރިލޭޝަންސް، ނޫރާ އިބްރާހިމް ޒާހިރު ވިދާޅުވީ އިއްޔެއިން ފެށިގެން ހުޅުމާލޭ ސެންޓްރަލްޕާކަށް އުރީދޫގެ ފަރާތުން ހިލޭ ވައިފައި ހިދުމަތް ދޭން ފަށާފައިވާ ކަމަށެވެ.
އުރީދޫން ހިލޭ ވައިފައި ދެނީ ކޮންމެ ދުވަހަކަށް ކޮންމެ ޑިވައިސްއަކަށް 15 މިނެޓުގެ ރޭޓުންނެވެ. އިތުރަށް ބޭނުންނަމަ ގަނެލެވޭނެއެވެ.
އުރީދޫ މޯލްޑިވްސްގެ ހެޑް އޮފް ސޭލްސް ހުސައިން ނިޔާޒް ވިދާޅުވީ، އެ ކުންފުނީގެ އަމާޒަކީ މުޅި ހުޅުމާލެ އާއި މާލޭގެ ހިތްފަސޭހަ މައިދާންތަކާއި އާންމުކޮށް މީހުން އެއްވާ ތަންތަން ކަވަރުވާގޮތަށް ހިލޭ ވައިފައިގެ ހިދުމަތް ދިނުން ކަމަށެވެ.
ޒުވާނުންނާއި އާއިލާތަކަށް ހާއްސަކޮށްގެން ޒަމާނީގޮތަކަށް ހަދައި މިދިޔަ މަހުގެ 22 ވަނަ ދުވަހު ހުޅުވި އެ ޕާކަކީ ވަރަށް ހިތްގައިމު ފެހި ޕާކެކެވެ. އެ ޕާކުގައި ބްރިޖަކާއި ފެން ގަނޑެއްގެ އިތުރުން މީހުން އިށީނދެ ތިބެވޭގޮތަށް ގޮނޑިތައް ބަހައްޓާފައިވެއެވެ.
އެކި އުމުރުގެ ގިނަ އަދަދެއްގެ ބަޔަކު ކޮންމެ ދުވަހުވެސް އެތަނަށްގޮސް އުފާކުރެއެވެ.