23 Jun 2016, 23:14
ސޫރިޔާގެ ރައީސް ބައްޝާރުލްއަސަދުގެ ވެރިކަން ވައްޓާލުމަށްޓަކައި ސޫރިޔާ ސިފައިންނާ ހަނގުރާމަ ކުރަން ގަސްދު ނުކުރާ ކަމަށާއި އެކަމަށް ބޮޑެތި ހުރަސްތަކެއް އެބަހުރި ކަމަށް ވައިޓް ހައުސް އިން ބުނެފިއެވެ.
ވައިޓް ހައުސްގެ ތަރްޖަމާން ޖޯޝް އާނެސްޓް ވިދާޅުވީ ރައީސް ބައްޝާރުލްއަސަދުގެ ވެރިކަން ވައްޓާލުމަށްޓަކައި ސޫރިޔާއާ ދެކޮޅަށް ހަނގުރާމަ ފެށުމަކީ ހުރިހާ ގޮތަކުން ބެލި ނަމަވެސް ކުރެވޭނެ ކަމެއް ނޫން ކަމުގައެވެ.
ސޫރިޔާ ސިފައިން
ސޫރިޔާއާ ދެކޮޅަށް ހަނގުރާމަ ފަށާނަމަ އދ. ގެ ހުއްދަ އެކަމަށް ހޯދަންޖެހެ އެވެ. ރަޝިޔާއިން ވީޓޯކު ރާނެ ކަމަށް ބެލެވޭތީ އެ ހުއްދަ ހޯދުމަކީ ކުރެވޭނެ ކަމެއް ނޫންކަން އޭނާ ފާހަގަ ކުރެއްވި އެވެ. ދެ ވަނަ ކަމަކީ ސޫރިޔާ ސިފައިންގެ ލަޝްކަރުތަކުގެ ވަރުގަދަ ކަމާއި އެ ލަޝްކަރުތަކަށް ރަޝިޔާ އާއި އީރާނުގެ އަސްކަރީ މަދަދު ލިބެމުންދިޔުމެވެ. ރަޝިޔާއަކީ އެމެރިކާއާ އެއްފެންވަރަށް ބަރުހަތިޔާރު އުފައްދާ ގައުމަކަށްވެފައި ރަޝިޔާއިން ޒަމާނީ ހަތިޔާރު ސޫރިޔާ ސިފައިންނަށް ފޯރުކޮށްދޭނެ ކަމަށް ބެލެވޭތީ ސޫރިޔާ ސިފައިންނާ ދެކޮޅަށް ހަނގުރާމަ ފެށުމަކީ އެމެރިކާ ސިފައިންގެ އެތަށްހާސް ބަޔަކު މަރުވެ އެމެރިކާގެ އަސްކަރީ ޚަރަދުތައް އިންތިހާއަށް ބޮޑުވެގެންދާނެ ކަމެކެވެ. އެހެންކަމުން މިއީ ވެސް ބައްޝާރުގެ ސަރުކާރު ވައްޓާލުމަށް ޓަކައި ހަނގުރާމަ ކުރުމަށް އެމެރިކާއަށް ހުރަހެއްކަން އާނެސްޓް ފާހަގަ ކުރެއްވިއެވެ.
ތިން ވަނަ ކަމަކީ އެމެރިކާއިން ސޫރިޔާއާ ދެކޮޅަށް ހަނގުރާމަ ފަށައި ބައްޝާރުގެ ސަރުކާރު ގަދަބާރުން ވައްޓާލައިފިނަމަ ސޫރިޔާ ބައިބައިވެގެން ގޮސް ސޫރިޔާގެ އަވަށްޓެރި ތުރުކީއަށް މިކަމުގެ ނުރައްކާތެރިކަން ފޯރައިގެން ދިޔުމެވެ. ތުރުކީއަށް ނުރައްކާތެރި ވަނީ މިފަދަ ހާލަތެއްގައި ސޫރިޔާގެ އުތުރުގައި ކުރުދީންގެ ދައުލަތެއް އުފެދިގެން ދާނެތީއެވެ. ތުރުކީއަކީ ނޭޓޯގެ ގައުމެއް ކަމަށްވެފައި ތުރުކީއަކީ އެމެރިކާއަށް މުހިއްމު ގައުމެއް ކަމުން މިއީ ވެސް ބައްޝާރުގެ ވެރިކަން ވައްޓާލުމަށް އެމެރިކާއަށް އޮތް ހުރަހެއްކަން ޖޯޝް އާނެސްޓް ފާހަގަ ކުރެއްވި އެވެ. މީގެ އިތުރުން އިރާގަށް އެމެރިކާ ގަދަބާރުން އަރައި ސައްދާމް ހުސައިންގެ ސަރުކާރު ވައްޓާލުމުން ކުރިމަތިވި މައްސަލަތަކުން އަދިވެސް ސަލާމަތް ނުވެގެންއުޅޭއިރު ސޫރިޔާއަށް އެމެރިކާ އަރައިގެންފި ނަމަވެސް ލަފާވެސް ކުރަން ނޭންގޭގޮތަށް ކަންތައްތައް ވެގެން ހިނގައިދާނެކަމުގެ ބިރު އެމެރިކާ އިހްސާސް ކުރެއެވެ.
އެމެރިކާގެ ރައީސް ބަރަކް އޮބާމާ
ސޫރިޔާގެ ރައީސް ބައްޝާރުލްއަސަދުގެ ވެރިކަން ވައްޓާލުމަށްޓަކައި އެމެރިކާ ސިފައިން އެއްގަމު މަގުން ސޫރިޔާއަށް އަރައިގަނެ ހަނގުރާމަ ކުރުމަށް ބާރުއަޅަމުން ގެންދާ މައިގަނޑު ދެ ގައުމަކީ ސައޫދީ އަރަބިޔާއާއި ގަތަރެވެ. ސޫރިޔާގައި ދާޚިލީ ހަނގުރާމަ ފެށުމަށް މެދުވެރިވި މައިގަނޑު ސަބަބަކީ އެ ގައުމުގެ އިދިކޮޅު ފަރާތްތަކުން ހަތިޔާރުގައި ހިފައި ސޫރިޔާ ސިފައިންނާ ދެކޮޅަށް ހަނގުރާމަ އިޢްލާން ކުރުމެވެ. ސޫރިޔާގެ އިދިކޮޅު ޖަމާއަތްތަކަށް ފައިސާ އާއި ހަތިޔާރާއި ތަމްރީން ފޯރުކޮށްދޭ ގައުމުތަކުގެ ލިސްޓުގެ ކުރީގައި އުޅެނީ ސައޫދީ އަރަބިޔާއާއި ގަތަރެވެ. ދެން ހުޅަނގުގެ ބޮޑެތި ބާރުތަކެވެ.
އެމެރިކާގެ ޚާރިޖީ ވުޒާރާގައި ކުރިން މަސައްކަތް ކުރެއްވި ބައެއް ފަރާތްތަކުން މިހަފްތާގައި ވަނީ ރައީސް ބައްޝާރުލްއަސަދުގެ ވެރިކަން ވައްޓާލުމަށްޓަކައި އެމެރިކާ ސިފައިން ސޫރިޔާއަށް ވަދެގަތުމަށް ގޮވާލައި ބަޔާނެއްގައި ސޮއިކޮށް އެބަޔާން އެމެރިކާގެ ޚާރިޖީ ވުޒާރާއަށް ހުށަހަޅާފައެވެ. މި ބަޔާނުގައި މިފަރާތްތަކުން ސޮއިކޮށްފައި ވަނީ ސައޫދީ ވަލިއުލްއަހްދު މުހައްމަދު ބިން ސަލްމާން ދާދިފަހުން ވޮޝިންޓަނަށް ކުރެއްވި ދަތުރުފުޅުގެ ތެރޭގައެވެ. އެހެންކަމުން މިއީ އެމެރިކާގެ ޚާރިޖީ ވުޒާރާގައި ކުރިން މަސައްކަތް ކުރެއްވި ބައެއް ފަރާތްތަކަށް ފައިސާ ދީގެން ސައޫދީ ސަރުކާރު އަޑީގައި އޮވެގެން ހުށަހެޅި ބަޔާނެއް ކަމަށް މީޑިޔާ ރިޕޯޓްތައް ބުނެއެވެ.
ބައްޝާރުގެ ވެރިކަން ވައްޓާލުމަށް ސައޫދީ ބޭނުންވަނީ އެ ސަރުކާރަކީ އީރާނަށް ތާއީދުކުރާ އަދި ސިޔާސީ ގޮތުން އީރާނުގެ ފަޅީގައިވާ ސަރުކާރަކަށް ވާތީ ކަމަށް ވަނީ ބެލެވިފައެވެ. ބައްޝާރުގެ ވެރިކަމާ ދެކޮޅަށް 2011 ވަނަ އަހަރު ސޫރިޔާގެ ރައްޔިތުންގެ ބަޔަކު ޑިމޮކްރަސީއަށް ގޮވާލައި ތެދުވިއެވެ.
ސައޫދީ ރަސްގެފާނު ސަލްމާން ބިން އަބްދުލްއަޒީޒު
ސޫރިޔާގެ ރައްޔިތުންގެ މި ތެދުވުމަށް ސައޫދީ ސަރުކާރުން ތާއީދުކުރިއިރު މިސްރުގެ ރައްޔިތުން މިސްރުގެ ކުރީގެ ރައީސް ހުސްނީ މުބާރަކްގެ ސަރުކާރާ ދެކޮޅަށް ޑިމޮކްރަސީއަށް ގޮވާލައި ތެދުވި ތެދުވުމަށް ސައޫދީން ތާއީދުކޮށްފައެއް ނުވެއެވެ. އަދި މުބާރަކުގެ ވެރިކަމަށްފަހު މިސްރުގައި ރައްޔިތުންގެ ވޯޓާއެކު ދިމުގްރާތީ އުސޫލުތަކުގެ މަތިން އިންތިޚާބުކޮށްގެން އުފެއްދި ޑރ. މުހައްމަދު މުރުސީގެ ސަރުކާރު ވައްޓާލުމަށް ޖެނެރަލް އަބްދުލްފައްތާޙް އައްސީސީ އިސްކޮށް ހުންނަވައިގެން ގެނައި އަސްކަރީ އިންތގިލާބަށް ސައޫދީން ފާޅުގައި ތާއީދުކޮށްފައިވެ އެވެ.
އެހެންކަމުން ސޫރިޔާގެ ރައީސް ބައްޝާރުގެ ސަރުކާރު ވައްޓާލަން ސައޫދީ އާއި ގަތަރުފަދަ ގަލްފުގެ ބައެއް ގައުމުތަކުން ބޭނުންވަނީ ޑިމޮކްރަސީއާއި އިންސާނީ ހައްގުތަކާ ގުޅުން ހުރި މައްސަލައެއްގައި ނޫނެވެ. މިކަން ގުޅިފައި ވަނީ އީރާނާއި ސައޫދީއާ ދެމެދު ހިނގާ ސިޔާސީ ވާދަވެރިކަމުގެ ތެރެއިންނެވެ. މިއަރާރުމަކީ ހަގީގަތުގައި ސުންނީ ޝިޔައީ މަޛްހަބީ އަރާރުމެއްވެސް ނޫނެވެ. ނަމަވެސް ސިޔާސީ މަގްސަދުތައް ހާސިލް ކުރުމަށްޓަކައި މިފަރާތްތަކުންވަނީ މިއަރާރުމުގައި ސުންނީ ޝިޔައީ ކުލަވެސް ޖައްސާފައެވެ.
އަނެއްކޮޅުން އިރާގާއި ސޫރިޔާގެ ސަރުކާރުތަކުގެ އެދުމުގެ މަތިން އެދެގައުމަށް އީރާން އަސްކަރީ ގޮތުން ވަދެފައިވާއިރު ސައޫދީންވެސްވަނީ ޔަމަންގެ ރައީސް އަބްދު ރައްބު މަންސޫރު ހާދީގެ ސަރުކާރުގެ އެދުމުގެ މަތިން އަރަބި ކޯލިޝަނެއް ހަދައިގެން ޔަމަންގެ ދާޚިލީ ހަނގުރާމައިގެ ތެރެއަށް ވަދެފައެވެ. ޔަމަންގެ އިދިކޮޅު ހޫޘީންނަށް އީރާނުގެ ތާއީދު ލިބޭއިރު ސޫރިޔާގެ އިދިކޮޅު ޖަމާއަތްތަކަށް ސައޫދީގެ ތާއީދު ލިބެމުން ދެއެވެ. އެހެންކަމުން މިދެފަރާތުން ކުރެ އެއް ފަރާތަކީވެސް އަނެއް ފަރާތުގެ ވާހަކަ ދެއްކެން އޮތްބައެއް ނޫނެވެ. (ނޫސްއެޖެންސީތައް)