23 Jun 2016, 14:36
އާންމުކޮށް އިއުލާނު ކުރުމަކާ ނުލައި ފަތުރުވެރިކަމާ ގުޅޭ ކަންކަމަށް ރަށް، ނުވަތަ ބިން ނުވަތަ ފަޅު ކުއްޔަށް ދެވޭ ގޮތަށް ބަދަލު ގެނައި ނަމަވެސް އެތަންތަން ދޫކުރާނީ ދެފުށް ފެންނަ ގޮތަށް ކަމަށް ޓޫރިޒަމް މިނިސްޓަރު މޫސާ ޒަމީރު ވިދާޅުވެއްޖެ އެވެ.
ރައްޔިތުން މަޖިލީހުގެ އިގްތިސާދީ ކޮމެޓީގައި މިއަދު ވާހަކަ ދައްކަވަމުން ޒަމީރު ވިދާޅުވީ އެއިސްލާހާ އެކު އެންމެންނަށް ހީވެފައި ވަނީ ބިޑްނުކޮށް ރަށް ދޫކުރަނީ ކަމަށް ކަމަށާއި ނަމަވެސް އެއިސްލާހާ އެކު ރަށްތައް ދޫކުރާނީ ޓްރާންސްޕޭރެންޓުކޮށް ކަމަށެވެ.
"ކުރީގައި ވިއްޔާ ޖެހޭނީ ރަށެއް ބޭނުން ވީމާ މިނިސްޓަރަށް ގުޅައިގެން ނޫނިއްޔާ އެމްއެމްޕީއާރުސީގެ އިސްވެރިއަކަށް ގުޅައިގެން، އޭގެ ބަދަލުގައި މިގާނޫނަށް އިސްލާހު އައީމާ ދަފްތަރު ނެރުނީމާ އިއްޒތްތެރި މެމްބަރު ވެސް ދަފްތަރުގައި އޮތް ރަށަށް ޝައުގުވެރިކަން ހުރެގެން ސިޓީއެއް ފޮނުވީމަ އަޅުގަނޑުމެންގެ އެކަމާ ބެހޭ ޑިޕާޓްމެންޓަކުން ޖަވާބް ދެއްވާނެ." މިނިސްޓަރު ވިދާޅުވި އެވެ.
ދަފްތަރުގައި ކަނޑައަޅާނެ އުސޫލުތަކެއްގެ މަތިން ރަށް ލިބޭ ފަރާތްތަކަށް ރަށްދޫކުރާއިރު ފައިސާ ދައްކާނީ މީރާ މެދުވެރިކޮށް ކަމަށް ވެސް މިނިސްޓަރު ވިދާޅުވި އެވެ.
ބިޑަކަށް ހުށައެޅުމުން އެހެން މީހުންނާ ވާދަކޮށް ރަށްނެގުމުގެ ބަދަލުގައި އެމީހަކު ބޭނުންވާ ގޮތަކަށް ތަރައްގީކުރަން ރަށްތައް މި ނިޒާމުގެ ތެރެއިން ލިބޭނެ ކަމަށް މިނިސްޓަރު ވިދާޅުވި އެވެ.
ކުރިން ރަށެއް ތަރައްގީ ކުރަން 36 މަސް ދިން ނަމަވެސް މިހާރު ގެންގުޅޭ އުސޫލަކީ 24 މަސް ދުވަހުގެ މުއްދަތެއް ދިނުން ކަމަށް ވެސް މިނިސްޓަރު ވިދާޅުވި އެވެ.
އިއުލާން ކުރުމެއްނެތި ރަށް ދޫކުރެވޭ ގޮތަށް ޓޫރިޒަމާ ބެހޭ ގާނޫނަށް މަޖިލީހުގެ މެޖޯރިޓީ ލީޑަރު އަދި ވިލިމާލެ ދާއިރާގެ މެމްބަރު އަހުމަދު ނިހާން ހުސައިން މަނިކު މިހާރު ވަނީ އިސްލާހެއް ހުށައަޅުއްވައިފަ އެވެ.
ޓޫރިޒަމާ ބެހޭ ގާނޫނުގައި މިހާރު ބުނެފައިވާ ގޮތުން ޓޫރިސްޓް ރިސޯޓު ހެދުމަށް ރަށްރަށާއި ބިން ކުއްޔަށް ދޫކުރަން ވާނީ، މިނިސްޓްރީ އޮފް ޓޫރިޒަމުން އާންމުކޮށް އިއުލާންނުކޮށްގެން، ކަނޑައެޅިފައިވާ އުސޫލެއްގެ މަތިން، އެކަށީގެންވާ އެންމެ ރަނގަޅު ހުށަހެޅުމެއް ހުށަހަޅާ ފަރާތަކަށެވެ.
އިދިކޮޅު ފަރާތްތަކުން ބުނަނީ ބީލަމަށް ހުޅުވާ ނުލައި ރަށްތައް ދޫކުރާ ނަމަ ކޮރަޕްޝަނަށް އިތުރަށް މަގުފަހިވާނެ ކަމަށެވެ.