19 Jun 2016, 15:10
އެސްޓީއޯ އިން ރޯދަ މަހަށް ހާއްސަކޮށް ގެންނަ ފިޔާ، ބިސް އަދި އަލުވީގެ ތިން ވަނަ ޝިޕްމަންޓް ބާޒާރަށް ނެރެފި އެވެ.
އެސްޓީއޯ އިން ބުނީ އެތަކެތި މިއަދު ބާޒާރަށް ނެރެފައިވާ އިރު އަލުވީގެ އަގު ހެޔޮކޮށްފައިވާ ކަމަށެވެ. އެގޮތުން ކުރިން 250 ރުފިޔާ އަށް ވިއްކަމުން ދިޔަ އަލުވި ބަސްތާ މިހާރު ވިއްކަނީ 210 ރުފިޔާ އަށެވެ.
ފިޔާ އަދި ބިސް ވިއްކަމުންދަނީ ކުރީގެ ވެސް އަގުތައް ކަމަށްވާ، ފިޔާ ބަސްތާއެއް 160 ރުފިޔާ އަދި ބިސް ކޭހެއް 275 ރުފިޔާ އަށެވެެ.
އެސްޓީއޯ އިން ގެނައި ޝިޕްމެންޓުން ތަކެތި ވިއްކުން، އެސްޓީއޯގެ ހަ ނަމްބަރު ކޮށިން ކުރިޔަށް ދާނެ ކަމަށް އެސްޓީއޯ އިން ބުނެ އެވެ. އެތަނުން ތަކެތި ވިއްކާނީ ކޮންމެ ދުވަހަކު ހެނދުނު 9:00 އިން މެންދުރު 12:00 އަށް، އަދި މެންދުރު 1:30 އިން 3:00 އަށް ކަމަށެވެ.
އަދި ރަމަޟާން މަހު އެސްޓީއޯ ކޮށިން ތަކެތި ވިއްކާނީ ހެނދުނު 10:00 އިން މެންދުރު 2:00 އަށް ކަމަށް ވެސް އެސްޓީއޯ އިން ބުނެ އެވެ.
މީގެ އިތުރުން، އެތަކެތި އެސްޓީއޯ ސުޕަމާޓުން ވެސް، އެސްޓީއޯ އިން ކަނޑައަޅާފައިވާ ހެޔޮ އަގުގައި ލިބެން ހުންނާނެ ކަމަށް ވެސް އެ ކުންފުނިން ބުނެ އެވެ.
އެސްޓީއޯ އިން ބުނީ ރޯދަ މަހު ފިޔާ ބިސް އަދި އަލުވި ހުސްވިޔަ ނުދިނުމަށް ޓަކައި ކޮންމެ 15 ދުވަހަކުން އާ ޝިޕްމަންޓެއް ގެނައުމަށް ނިންމާފައިވާ އިރު މާލެއާއި އެއް އަގެއްގައި އެސްޓީއޯގެ ރީޖަނަލް އައުޓްލެޓްތަކުން ވެސް އެތަކެތި ލިބޭނެ ކަމަށެވެ.