18 Jun 2016, 11:57
ރ. މަޑުއްވަރީގައި ފަޅުގައި އޮޑިދޯނި ފަހަރު ގިނަވެ، ދޯންޏެއް ފަޅަށް ވަންނާނެ ޖާގަ ނެތިގެން ފަޅުން ބޭރުގައި ދޯނި ބާއްވައިގެން ޑިންގީއަކަށް މީހުން އަރުވައިގެން ރަށަށް މީހުން ބާލަން ޖެހި، ދަތިތަކާ ކުރިމަތިލާން ޖެހިފައިވާ ކަމަށް ބުނެ ރަށު މީހުން ކަންބޮޑުވުންފާޅުކޮށްފި އެވެ.
އެ ރަށު މީހުން ބުނާ ގޮތުން ރޯދަ މަހަށް ދޯނި ފަހަރު ފަޅުގައި އެޅުމުން އިތުރު ދޯންޏަކަށް ފަޅަށް ވަންނާނެ ޖާގަ ނުލިބި ފަޅުވަނީ ފުރިފަ އެވެ. އަދި ކޮންމެ ދުވަހަކު "އަތޮޅު ފެރީން މީހުން ބާލަން ޖެހެނީ ފަޅު ބޭރުން ޑިންގީއަކަށް" ކަމަށް މަޑުއްވަރީން ވާހަކަ ދެއްކި މީހަކު ބުންޏެވެ.
މަޑުއްވަރީ ކައުންސިލުގެ ރައީސް ހަސަން އަބްދުއްރަހީމް (ހައްޕޭ) 'ސަން' އަށް ވިދާޅުވީ ފަޅު ފުރުމުގެ ސަބަބުން ފަޅު ބޭރުން މީހުން ބާލަންޖެހުމަކީ ވަރަށް ބޮޑު ދަތިތަކާ ރައްޔިތުންނަށް ކުރިމަތިލާން ޖެހޭ ކަމެއް ކަމަށެވެ. އަދި ހައްޕޭ ފާހަގަކުރެއްވި ގޮތުން މަޑުއްވަރީގެ ފަޅުގެ ހާލަތު މިހާރު ވަނީ 30 އަހަރު ފަހަތަށް ޖެހިފަ އެވެ.
މަޑުއްވަރީ ފަޅުގައި ދޯނި ފަހަރު އަޅައި ފަޅުފުރިފައި -- ފޮޓޯ// އަހުމަދު އަހުޝަމް
"މިއީ ހަމަ ވަރަށް ދަތިތަކާ ރައްޔިތުން ކުރިމަތިލާން ޖެހޭ ކަމެއް. މިސާލަކަށް އަތޮޅު ފެރީގައި ރަށަކަށް ދަންޏާ ފަތިހު ހޭލައިގެން މިޖެހެނީ އެހެން ކުޑަ ދޯންޏެއްގައި ގޮސް ފަޅު ބޭރުން ފެރީއަށް އަރަން. ރައްޔިތުންނަށް ހަމަ ވަރަށް ދަތިވޭ،" ހައްޕޭ ވިދާޅުވި އެވެ.
ފަޅުގެ ދަތިކަން ބޮޑުވެ، އެކަމަށް ހައްލެއް ހޯދުމަށް ސަރުކާރުގެ މުއައްސަސާތަކާ މަޝްވަރާކުރައްވަމުންދާ ކަމަށް ހައްޕޭ ވިދާޅުވި އެވެ. ނަމަވެސް އަދި އެކަށީގެންވާ ޖަވާބެއް ލިބިފައިނުވާ ކަމަށް ވިދާޅުވި އެވެ.
މަޑުއްވަރީގައި އިތުރު ފަޅެއް ކޮނުމަށް 2015 ވަނަ އަހަރުގެ ބަޖެޓުގައި ހިމެނި ނަމަވެސް އަހަރު ނިމިގެން ދިޔަ އިރު ވެސް އެ މަސައްކަތް ވަނީ ނުފެށިފަ އެވެ. އޭގެ ފަހުން 2016 ވަނަ އަހަރު ހުށަހެޅި ބަޖެޓުގައި މަޑުއްވަރީ ފަޅުކޮނުމުގެ މަސައްކަތް ހިމަނާފައެއް ނުވެ އެވެ. މަޑުއްވަރީ ދާއިރާގެ މަޖިލިސް މެމްބަރު މުހައްމަދު އަމީތުއާ ހަވާލާދީ ކައުންސިލުގެ ރައީސް ވިދާޅުވީ މި އަހަރު ހުށަހެޅުމަށް ހަމަޖެހިފައިވާ ސަޕްލިމެންޓްރީ ބަޖެޓުގައި މަޑުއްވަރީ ފަޅުކޮނުމުގެ މަސައްކަތް ހިމެނުމަށް މަސައްކަތް ކުރަމުންދާ ކަމަށެވެ.