16 Jun 2016, 21:56
ކަރެކްޝަނަލް ސާވިސް އިން މާފުށީ ޖަލުގެ ގައިދީންނަށް ފަހަން ދަސްކޮށްދޭން ކޯހެއް ފަށައިފި އެވެ.
ފަސް ހަފްތާގެ މުއްދަތަށް ދެ މޮޑިއުލް އަކަށް ހިންގާ "ސެޓްފިކެޓް 1 އިން ސްވިންގް" ކޯހަކީ މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގައި ރަޖިސްޓްރީ ކޮށްގެން ހިންގާ ކޯހެކެވެ. އަދި މިއީ އެ ކޯހުގެ ތިން ވަނަ ބެޗް ކަމަށް ކަރެކްޝަނަލް ސާވިސް އިން ބުނެ އެވެ.
ކަރެކްޝަނަލް ސާވިސް އިން ބުނީ، އެ ކޯހުގައި ޖުމްލަ 20 ގައިދީން ބައިވެރިވާ އިރު ކުލާސްތައް ކުރިއަށް ގެންދަން ހަމަޖެހިފައި ވަނީ ދެބަޔަކަށް ބަހާލައިގެން ކުލާހެއްގައި 10 ގައިދީން ހިމެނޭ ގޮތަށް ކަމަށެވެ.
ކޯސް ފުރިހަމަކުރާ ގައިދީންނަށް ކޯސް ފުރިހަމަ ކޮށް ނިމުމުން ބާލީހާއި ބާލީސްއުރަ އާއި ބެޓްޝީޓާއި ރަބަރުލެއްވި ހަރުވާޅާއި ސޯޓު އަދި ކުޝަންގެ އިތުރުން މިންނަގާ ކަނޑާ ފަހަން އެނގޭނެ އެވެ.
މޯލްޑިވްސް ކަރެކްޝަނަލް ސާވިސްގެ އިންސްޓިޓިއުޓް ފޯ ކަރެކްޝަނަލް ސްޓަޑީޒް އިން މިހާރު ވެސް ގައިދީންނަށް ތަފާތު ކޯސްތަކެއް ދަނީ ހިންގަމުންނެވެ. އެގޮތުން ޤިރާތުގެ ތިން ކޯހަކާއި ހިފްސް ކްލާހާއި އިސްލާމް ކްލާސްތަކުގެ އިތުރުން ބޭސިކް ގުރުއާން ކުލާހާއި ކޮމްޕިއުޓަރު ކޯސްތައް ހިންގަމުން ގެންދެއެވެ.