14 Jun 2016, 14:53
އުމުރުން އަށް އަހަރުގެ ކުޑަ ފިރިހެން ކުއްޖަކާ އެކު އެކި ދުވަސްމަތިން ޖިންސީއަމަލު ހިންގުމުގެ ކުށް ސާބިތުވި ދެ މީހަކު 10 އަހަރަށް ޖަލަށް ލުމަށް ވ. ފެލިދޫ މެޖިސްޓްރޭޓް ކޯޓުން ހުކުމްކޮށްފި އެވެ.
ކުޑަކުއްޖަކާ އެކު ޖިންސީއަމަލެއް ހިންގުމުގެ ކުށް ސާބިތުވެ ޖަލަށް ލުމަށް ހުކުމް ކޮށްފައި ވަނީ ފެލިދޫ، ބީޗްސައިޑް، މުހައްމަދު މުއާޒު (23އ) އާއި ހަމަ އެ ރަށު މޫންލައިޓް، އަލީ ވިޝާން (25އ)ގެ މައްޗަށެވެ.
އެ ދެ މީހުންގެ މައްޗަށް ކުޑަކުއްޖަކާ އެކު ޖިންސީ އަމަލެއް ހިންގުމުގެ ކުށުގެ ދައުވާ އުފުލާފައި ވަނީ، 2013 ވަނަ އަހަރު އެކި ދުވަސްމަތިން އަށް އަހަރުގެ ފިރިހެން ކުއްޖަކު ފެލިދޫ ވަލުތެރެއަށް ގެންގޮސްގެން އެ ކުއްޖާއާ މެދު ޖިންސީ އަމަލު ހިންގާފައިވާ މައްސަލައާ ގުޅިގެންނެވެ.
ދެމީހުން ވެސް ވަނީ ދައުލަތުގެ ދައުވާއަށް އިންކާރު ކޮށްފަ އެވެ.
ދައުލަތުން އުފުލި ދައުވާ ބެލުމަށް ފަހު ކޯޓުން ކުރި ހުކުމުގައި ބުނެފައި ވަނީ، އެ ދެމީހުން ދައުވާއަށް އިންކާރުކުރި ނަމަވެސް މައްސަލަ ސާބިތުކުރުމަށް ދައުލަތުން ހުށަހަޅާފައިވާ ހެއްކާއި ގަރީނާއިން، އެ ދެމީހުންގެ މައްޗަށް އުފުލާފައިވާ ދައުވާ އެއްވެސް ޝައްކެއް ނެތް މިންވަރަށް ޝަރީއަތަށް ސާބިތުވާކަމަށެވެ.
އެހެންކަމުން، ކުޑަކުދިންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ދަށުން މުހައްމަދު މުއާޒާއި އަލީ ވިޝާން ކުޑަކުއްޖަކާ އެކު ޖިންސީއަމަލެއް ހިންގުމުގެ ކުށުން ކުށްވެރިވެއްޖެކަމަށް ކަނޑައަޅައި އެ ކުށުގެ އުގޫބާތެއްގެ ގޮތުން ދެމީހުންކުރެ ކޮންމެ މީހަކު 10 އަހަރު ދުވަހުގެ މުއްދަތަށް ޖަލަށްލުމަށް ހުކުމްކުރާކަމަށް ވެސް ގަޒިއްޔާގައިވެ އެވެ.