13 Jun 2016, 11:24

އެމެރިކާގެ ފްލޮރިޑާ ސްޓޭޓުގެ އޯލެންޑޯ ސިޓީގެ ނައިޓް ކްލަބަކަށް މީހަކު ވަދެ، ބަޑި ޖަހައި އެތައް ބަޔަކު މަރާލި ހާދިސާ، ދިވެހި ސަރުކާރުން ކުށްވެރި ކޮށްފި އެވެ.

އޯލެންޑޯ ސިޓީގައި ހުންނަ "ޕަލްސް" ނަމަކަށް ކިޔާ ނައިޓު ކްލަބަށް ވަދެ، ބަޑި ޖަހައި ގިނަ ބަޔަކު މަރާލާފައި ވަނީ، އަފްގާނު ދަރިކޮޅުގެ އެމެރިކާ ރައްޔިތެއް ކަމުގައިވާ އުމަރު މަތީން އެވެ. އޭނާ އެތަނުގައި ދިން ހަމަލާތަކުގައި 50 މީހަކު މަރުވެ، އިތުރު 53 މީހުން ޒަޚަމް ވެފައިވެ އެވެ. މި ހަމަލާގެ ޒިންމާ އައިއެސް ޖަމާއަތުން ވެސް ނަގާފައިވެ އެވެ.

ރާއްޖޭގެ ޚާރިޖިއްޔާ އިން ރޭ ކުރި ޓުވީޓެއްގައި، ފޮރިން މިނިސްޓަރު ދުންޔާ މައުމޫނާ ހަވާލައިދީ ބުނެފައި ވަނީ، ފްލޮރިޑާގައި ހިނގައިދިޔަ ބަޑި ޖެހުމުގެ ހާދިސާ ދިވެހި ސަރުކާރުން ކުށްވެރި ކުރާ ކަމަށެވެ.

މި ހަމަލާ ދިން އުމަރު މަތީންއަކީ ސެކިއުރިޓީ ގާޑެއްގެ ގޮތުގައި މަސައްކަތް ކުރަމުން ދިޔަ މީހެކެވެ. ނައިޓް ކްލަބަށް ވަދެ ދިން ހަމަލާއަށް ފަހު މަތީން ވަނީ މަރާލެވިފަ އެވެ. މަތީންގެ ގަޔަށް ބަޑި ޖަހައި މަރާލީ، ނައިޓް ކްލަބުގެ ތެރެއަށް ވަން ސިފައިންނެވެ.

އޯލެންޑޯ ސިޓީގެ "ޕަލްސް" ނައިޓް ކްލަބަށް ވަދެ ހަމަލާ ދިން އުމަރު މަތީން --

އެމެރިކާގެ މީޑިއާ ރިޕޯޓުތައް ބުނާ ގޮތުގައި އުމަރު މަތީންއަކީ ބަޑިއާއި އެފަދަ ހަތިޔާރު ގެންގުޅުމުގެ ލައިސެންސް އޮންނަ މީހެކެވެ. އަދި އޭނާ ދާދި ފަހުން ގަނެފައިވާ ކަމަށް ވެސް ރިޕޯޓު ކޮށްފައިވެ އެވެ.

މީގެ އިތުރުން، މި ހަމަލާ ދިނުމުގެ ދެ ތިން ދުވަސް ކުރިން އެމެރިކާގެ 911 އެމަޖެންސީ ސާވިސްއަށް މަތީން ގުޅައި، އޭނާއާ އައިއެސް ޖަމާއަތާ ގުޅުން އޮންނަކަން ބުނެފައިވާ ކަމަށް ވެސް އެމެރިކާގެ މީޑިއާގައި ރިޕޯޓު ކުރެ އެވެ.

މަތީންގެ ކުރީގެ އަނބި މީހާކަމަށް ބުނާ މީހަކު ބުނި ގޮތުގައި، މަތީންއަކީ ސިކުނޑި ހަމަޖެހޭ މީހެއް ނޫނެވެ. އަދި މަތީން އޭނާއަށް އަނިޔާ ކުރާ ކަމަށް ވެސް އޭނާ ބުންޏެވެ.