12 Jun 2016, 20:55
ޔޫރޯ ފުޓްބޯޅަ މުބާރާތުގައި ތުރުކީ އާއި ކްރޮއޭޝިއާ ކުޅުނު މެޗުގައި ލުކާ މޮޑްރިޗް ކާމިޔާބު ކުރި ހަމައެކަނި ގޯލާ އެކު 1-0ގެ ނަތީޖާ އަކުން ކްރޮއޭޝިއާ މޮޅުވެއްޖެ އެވެ.
ފުރަތަމަ ހާފު ފެށިގެން ކްރޮއޭޝިއާ ޓީމުން ރަނގަޅަށް ކުޅެމުން ދިޔައިރު އެ ޓީމުން ވަނީ ގިނަ ހަމަލާތަކެއް އުފެއްދޭތޯ މަސްތަކަތް ވެސް ކޮށްފަ އެވެ. ތުރުކީ ޓީމުގެ ފަރާތުން މާ އެދެވޭ ކުޅުމެއް ނުފެނު އިރު އެ ޓީމަށް ވަނީ ރަނގަޅު އެޓޭކެއް ވެސް އުފެއްދޭ ގޮތް ނުވެފަ އެވެ.
ފުރަތަމަ ހާފުގައި ކްރޮއޭޝިއާ އަށް މެޗުގެ ލީޑު ލިބިގެންދިޔައީ 41 ވަނަ މިނެޓުގައި ރެއާލް މެޑްރިޑަށް ކުޅެމުންދާ މޮޑްރިޗް ކާމިޔާބު ކޮށްދިން ގޯލުންނެވެ. މޮޑްރިޗް އެ ގޯލު ކާމިޔާބު ކުރީ ކްރޮއޭޝިއާ ކުޅުންތެރިއަކު ނަގައިދިން ހުރަހެއް ތުރުކީ ކުޅުންތެރިއަކު ދިފާއު ކުރި ބޯޅަ ޕެންލްޓީ އޭރިއާ ބޭރުގައި ހުރެ ގޯލުގެ ތިރީ ކަނަށް ވައްދާލައިގެންނެވެ.
މޮޑްރިޗުގެ ގޯލާއެކު ފުރަތަމަ ހާފު ނިމިގެންދިޔަ އިރު ދެވަނަ ހާފުގައި ވެސް ކްރޮއޭޝިއާ ޓީމުން ވަނީ ތުރުކީގެ ގޯލާ އަމާޒުކޮށް ގިނަ ހަމަލާތަކެއް އުފައްދާފަ އެވެ. އެގޮތުން ދެވަނަ ހާފު ފެށިގެން ތުރުކީ ޕެނަލްޓީ އޭރިއާ ކުރިމަތިން ލިބުނު ހިލޭ ޖެހުމެއް ޑަރިޖޯ ސާނާ ފޮނުވާލިއިރު އެ ބޯޅަ އަމާޒުވީ ހުރަސް ދަނިޑައަށެވެ.
ދެ ވަނަ ހާފުގައި ކްރޮއޭސިއާ އަށް ލީޑު ފުޅާ ކޮށްލަން އެންމެ ރަނގަޅު ފުރުސަތުތަކެއް ލިބުނީ އިންޓަމިލާން އަށް ކުޅެމުންދާ ފޯވާޑް މާސިލޯ ބްރޮޒުވިކް އަށެވެ. ނަމަވެސް އޭނާ ފޮނުވާލި ފުރަތަމަ ހަމަލާ ގޯލުގެ ހުރަސް ދަނޑީގައި ޖެހެނު އިރު ކްރޮއޭސިއާގެ ކުޅުންތެރިއަކު ތުރުކީ ގޯލު ކުރިމައްޗަށް ހުރަސް ކޮށްލި ބޯޅަ ކީޕަރު ބީޓްވެގެން އައި ނަމަވެސް ބްރޮޒުވިކް ފައިގަ ޖެހި ދިޔައީ ބޭރަށެވެ.