12 Jun 2016, 00:16
މާލޭގައި މިރޭ ހިންގި މާރާމާރީއެއްގައި މީހަކު ޒަހަމްކޮށްލައިފި އެވެ.
ޒަހަމްވި މީހާ ވަނީ އޭޑީކޭ ހޮސްޕިޓަލަށް ގެންގޮސްފަ އެވެ.
އޭޑީކޭގެ މެނޭޖިން ޑިރެކްޓަރު އަހުމަދު އައްފާލް ވިދާޅުވީ އެ މާރާމާރީގައި ޒަހަމްވި މީހާއަށް ސީރިއަސް އަނިޔާތަކެއް ލިބިފައި ނުވާ ކަމަށެވެ. ޒަހަމްވި ފިރިހެން މީހާއަށް ފުރަގަހުން ހަމަލާދީފައިވުމުން ޒަހަމްތަކެއް ހުރި ކަމަށް އައްފާލް ވިދާޅުވި އެވެ.
ފުލުހުންގެ މީޑިއާ އޮފިޝަލް ވިދާޅުވީ އެ މާރާމާރީ ހިނގާފައި ވަނީ އާޓްފިޝަލް ބީޗާ ދިމާލު ބޮޑުތަކުރުފާނު މަގުގައި ކަމަށެވެ. އިތުރު ތަފްސީލެއް ފުލުހުން ނުދެ އެވެ.
މިދުވަސްވަރަކީ މާރާމާރީ އިތުރުވެފައިވާ ދުވަސްވަރެއްކަން ފާހަގަކޮށްލެވެ އެވެ. އެގޮތުން މީގެ ހަފްތާއެއްހައި ދުވަސްކުރިން މާރާމާރީއެއްގައި ވަނީ 14 އަހަރުގެ ދެކުއްޖަކު މަރުވެފަ އެވެ.
ފުލުހުންގެ ތަފާސް ހިސާބުތައް ދައްކާގޮތުން މިދިޔަ މަހު މާރާމާރީގެ މައްސަލަތައް 22 ޕަސެންޓަށް ވަނީ އިތުރުވެފަ އެވެ. ވޭދުވެދިޔަ އަހަރުގެ މެއި މަހު މާރާމާރީގެ 71 މައްސަލަ ފުލުހުންނަށް ހުށަހަޅާފައިވާއިރު، މިއަހަރުގެ މެއި މަހު އެ އަދަދު ވަނީ 87 އިތުރުވެފަ އެވެ.
މާރާމާރީތައް އިތުރުވުމާއި ގުޅިގެން ފުލުހުންދަނީ ހާއްސަ އޮޕަރޭޝަރެއްވެސް ފަށާފަ އެވެ.