11 Jun 2016, 02:15
ޔޫރޯ ފުޓްބޯޅަ މުބާރާތުގެ ފުރަތަމަ މެޗުގައި ޑިމިޓްރީ ޕަޔެޓްގެ މޮޅު ކުޅުމާއެކު ރުމޭނިއާ އަތުން މޮޅުވެ، ފްރާންސް އިން ގައުމު ހެއްވާލައިފި އެވެ.
ސެއިންޓް ޑެނިސްގެ ސްޓޭޑް ޑެ ފްރާންސްގައި މިރޭ ކުޅުނު "ގްރޫޕް އޭ"ގެ މެޗުގައި ރުމޭނިއާގެ މައްޗަށް އަމިއްލަ ގައުމުގައި ކުޅެމުންދިޔަ ފްރާންސް މޮޅުވީ 2-1 ލަނޑުންނެވެ.
މެޗު ފެށުމުގެ ކުރިން މުބާރާތް ފެށުމުގެ ގޮތުން ކުލަގަދަ ރަސްމިއްޔާތެއް ކުރިއަށްދިޔަ އެވެ. ނެށުމުގެ ހަރަކާތްތަކާއެކު ރަސްމިއްޔާތުގައި އެންމެ ފާހަގަކޮށްލެވުނީ ފްރާންސްގެ މަޝްހޫރު ޑީޖޭ އާޓިސްޓް، ޑޭވިޑް ގުއެޓާގެ މިއުޒިކެވެ.
ޔޫރޯ 2016: ރުމޭނިއާ ކޮޅަށް ލަނޑު ޖެހުމަށްފަހު އޮލިވަ ޖިރޫ އުފާފާޅުކުރަނީ. ރޫމެނިއާ އަތުން މިރޭ ފްރާންސް މޮޅުވީ 2-1 ލަނޑުން-- ފޮޓޯ: އޭޕީ
މެޗުގައި އެންމެ ހުސް ފުރުސަތެއް ފުރަތަމަ ލިބިގެންދިޔައީ ރުމޭނިއާ އަށެވެ. ބޮޑްގާން ސްޓެންކޫ އަށް ލިބުނު ފުރުސަތަކުން ފްރާންސްގެ ޕެނަލްޓީ އޭރިޔާ ތެރެއިން އުފެއްދި ހަމަލާ، ފްރާންސްގެ ގޯލްކީޕަރު ހޫގޯ ލޮރިސް ވަނީ މަތަކޮށްފައެވެ.
މެޗުގެ 14 ވަނަ މިނެޓުގައި ފްރާންސަށް ލަނޑުޖަހާނެ ރަނގަޅު ފުރުސަތެއް ލިބިގެންދިޔައެވެ. ޕައުލް ޕޮގްބާ ނަގައިދިން ހުރަސް، އެންޓޮއިން ގްރީޒްމަންގެ ބޮލުގައި ފުރަތަމަ ލައްވާ ލައިފައެއް ނުވެ އެވެ. ރޫމޭނިއާ ޑިފެންޑަރެއް ގައިގައި ޖެހިފައި ލިބުނު ބޯޅައިން، ޕެނަލްޓީ އޭރިޔާ ތެރޭގައި ހުރެފައި ގްރީޒްމަން ބޮލުން އުފެއްދި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.
ޔޫރޯ 2016: ފްރާންސް ކުޅުންތެރީން ރޫމޭނިއާ ކޮޅަށް ލަނޑު ޖެހުމަށް ފަހު އުފާފާޅުކުރަނީ. ރޫމެނިއާ އަތުން މިރޭ ފްރާންސް މޮޅުވީ 2-1 ލަނޑުން-- ފޮޓޯ: އޭޕީ
މެޗުގެ 36 ވަނަ މިނެޓުގައި ފްރާންސަށް އިތުރު ފުރުސަތެއް ލިބިގެންދިޔައެވެ. ޕަޔެޓް ދިން ބޯޅައަކުން ރުމޭނިއާ ޕެނަލްޓީ އޭރިޔާ ތެރެއިން ގްރީޒްމަން އުފެއްދި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.
މެޗުގެ ފުރަތަމަ ހާފުގެ އިތުރު ވަގުތުގައި ވެސް ފްރާންސަށް ލަނޑުޖަހާނެ ރަނގަޅު ފުރުސަތެއް ލިބިގެންދިޔައެވެ. ރުމޭނިއާގެ ޕެނަލްޓީ އޭރިޔާ ތެރޭގައި ހުރެފައި ޖިރޫ ބޮލުން އުފެއްދި ހަމަލާ ދިޔައީ ގޯލުގެ ހުރަސް ދަނޑި މަތިން ބޭރަށެވެ. މެޗުގެ ފުރަތަމަ ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއްނުޖެހި އެއްވަރުވެގެންނެވެ.
ޔޫރޯ 2016: ފްރާންސް ކޯޗު ޑިޑިއޭ ޑިޝޯމް އުފާފާޅުކުރަނީ. ރޫމެނިއާ އަތުން މިރޭ ފްރާންސް މޮޅުވީ 2-1 ލަނޑުން-- ފޮޓޯ: އޭޕީ
މެޗުގެ ދެވަނަ ހާފުގެ ކުރީކޮޅުގައި ރުމޭނިއާގެ ފަރާތުން ވަރުގަދަ ކުޅުމެއް ފެނިގެންދިޔައެވެ. އެގޮތުން މެޗުގެ 47 ވަނަ މިނެޓުގައި ރުމޭނިއާ އިން ލަނޑުޖަހާނެ ރަނގަޅު ފުރުސަތެއް ތަނަވަސްކުރި އެވެ. ނިކޮލައީ ސްޓެންޗޫ ދިން ބޯޅައަކުން ފްރާންސްގެ ޕެނަލްޓީ އޭރިޔާ ތެރޭގައި ހުސްކޮށް ހުރެ، ބޮގްޑާން ސްޓެންކޫ އުފެއްދި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.
މެޗުގެ 52 ވަނަ މިނެޓާއި 56 ވަނަ މިނެޓުގައި ފްރާންސަށް ލަނޑުޖަހާނެ ރަނގަޅު ފުރުސަތެއް ލިބިގެންދިޔައެވެ. އޮލިވާ ޖިރޫ އަށް ލިބުނު ފުރުސަތުން އުފެއްދި ހަމަލާ ކީޕަރު ޓަޓަރުސަނޫއާ ދިމާލަށް އަމާޒުވި އިރު، ޕޮގްބާ އުފެއްދި ހަމަލާގެ ހުރަހަކަށްވީ ވެސް ވެގެންދިޔައީ ކީޕަރު ޓަޓަރުސަނޫ އެވެ. އެ ދެ ފުރުސަތު ވެސް ތަނަވަސްކޮށްދިނީ ޕަޔެޓް އެވެ.
ޔޫރޯ 2016: ފްރާންސް ކުޅުންތެރީން ރޫމޭނިއާ ކޮޅަށް ލަނޑު ޖެހުމަށް ފަހު އުފާފާޅުކުރަނީ. ރޫމެނިއާ އަތުން މިރޭ ފްރާންސް މޮޅުވީ 2-1 ލަނޑުން-- ފޮޓޯ: އޭޕީ
މެޗުގެ 57 ވަނަ މިނެޓުގައި ފްރާންސުން ވަނީ ލަނޑެއްޖަހައި ލީޑު ހޯދައިފައެވެ. ފްރާންސަށް އެ ލަނޑު ކާމިޔާބުކޮށްދިނީ އޮލިވާ ޖިރޫ އެވެ. އޭނާ އެ ލަނޑު ކާމިޔާބުކުރީ ޕަޔެޓް ނަގައިދިން ހުރަހަކުން ރުމޭނިއާގެ ޕެނަލްޓީ އޭރިޔާ ތެރޭގައި ހުރެފައި ބޮލުން އުފެއްދި ހަމަލާއަކުންނެވެ.
ޔޫރޯ 2016: ފްރާންސް ކޮޅަށް ލަނޑު ޖެހުމަށްފަހު ރޫމެނިއާ ކުޅުންތެރީން އުފާފާޅުކުރަނީ. ރޫމެނިއާ އަތުން މިރޭ ފްރާންސް މޮޅުވީ 2-1 ލަނޑުން-- ފޮޓޯ: އޭޕީ
ފްރާންސުން ލީޑު ހޯދިތާ އަށް މިނެޓު ފަހުން ރުމޭނިއާ އިން ވަނީ ނަތީޖާ ހަމަހަމަކޮށްފައެވެ. ރުމޭނިއާ އަށް ލިބުނު ޕެނަލްޓީއަކުން އެ ޓީމަށް ނަތީޖާ ހަމަހަމަކޮށްދިނީ ސްޓެންކޫ އެވެ. ރުމޭނިއާއަށް އެ ޕެނަލްޓީ ލިބުނީ ފްރާންސްގެ ޕެނަލްޓީ އޭރިޔާ ތެރެއިން ސްޓެންޗޫ އަށް ޕެޓްރީޝް އެވްރާ ކުރި ފައުލަކާ ގުޅިގެންނެވެ.
ޔޫރޯ 2016: ފްރާންސް ކޮޅަށް ލަނޑު ޖެހުމަށްފަހު ސްޓެންކޫ އުފާފާޅުކުރަނީ. ރޫމެނިއާ އަތުން މިރޭ ފްރާންސް މޮޅުވީ 2-1 ލަނޑުން-- ފޮޓޯ: އޭޕީ
މެޗު ނިމެން ދެ މިނެޓަށް ވެފައި ވަނިކޮށް، ޕެޔެޓް ވަނީ ފްރާންސަށް އަލުން ލީޑު ހޯދައިދީފައެވެ. އޭނާ އެ ލަނޑު ކާމިޔާބުކުރީ ރުމޭނިއާގެ ޕެނަލްޓީ އޭރިޔާ ބޭރުގައި ހުރެފައި އުފެއްދި ބާރު ހަމަލާއަކުންނެވެ.
ޔޫރޯގައި މާދަމާ ތިން މެޗެއް ކުޅުމަށް ހަމަޖެހިފައިވާ އިރު، މާދަމާ ކުޅޭ ފުރަތަމަ މެޗުގައި ބައްދަލުކުރާނީ އަލްބޭނިއާ އާއި ސްވިޒަލެންޑް އެވެ. ގްރޫޕް އޭގެ އެ މެޗު ކުޅުމަށް ހަމަޖެހިފައިވަނީ ރާއްޖެގަޑިން މާދަމާ އިރުއޮއްސި 6:00 ގައެވެ.
މާދަމާ ކުޅޭ ދެވަނަ މެޗަކީ ގްރޫޕް ބީގެ މެޗެކެވެ. ވޭލްސް އާއި ސްލޮވާކިއާ ބައްދަލުކުރާ އެ މެޗު ކުޅުމަށް ހަމަޖެހިފައިވަނީ ރާއްޖެގަޑިން މާދަމާ ރޭ 9:00 ގައެވެ. މާދަމާ ކުޅޭ ފަހު މެޗަކީ ވެސް ގްރޫޕް ބީގެ މެޗެކެވެ. އިންގްލެންޑާއި ރަޝިއާ ކުޅޭ އެ މެޗު ކުޅުމަށް ހަމަޖެހިފައިވަނީ ރާއްޖެގަޑިން މާދަމާ ރޭ 12:00 ގައެވެ.