10 Jun 2016, 15:15
"ޔޫއެފާ ޔޫރަޕިއަން ޗެމްޕިއަންޝިޕް" ނުވަތަ ޔޫރޯ ފުޓްބޯޅަ މުބާރާތަކީ ވިލާތުގެ ގައުމުތަކަށް ކޮންމެ ހަތަރު އަހަރަކުން އެއްއަހަރު އަންނަ ފުޓްބޯޅައިގެ ބޮޑު އީދެކެވެ. ޚާއްސަކޮށް މިއީ ފްރާންސާ ވަރަށް ބޮޑަށް ގުޅި ލާމެހިފައިވާ މުބާރާތެކެވެ. އެއީ މިފަހަރު އެ ގައުމުގައި އެ މުބާރާތް ބާއްވާތީއެއް ނޫނެވެ. އެތަކެއް ސަބަބުތަކާ ހުރެއެވެ.
ޔޫރޯ ފުޓްބޯޅަ މުބާރާތް އުފަންވީ ފްރާންސް ބިމަށެވެ. މުބާރާތުގެ ޚިޔާލު އުފަންކުރުވި މޭސްތިރިއަކީ ފްރާންސް ރައްޔިތެކެވެ. އަދި އެނޫންވެސް އެތައް ސަބަބުތަކެއް ވެއެވެ. އެހެންކަމުން ވިލާތު ފުޓްބޯޅައިގެ އެންމެ ބޮޑު އީދާ ފްރާންސުން ކުރިމަތިލާނީ ވަރުގަދަ ތައްޔާރީތަކަކާ އެކުގައިކަން ޔަގީނެވެ.
ސްވިޓްޒަލޭންޑްގެ ބާސެލްގައި 1954 ވަނަ އަހަރުގެ ޖޫން މަހުގެ 15 ވަނަ ދުވަހު، ޔޫނިއަން އޮފް ޔޫރަޕިއަން ފުޓްބޯލް އެސޯސިއޭޝަންސް، "ޔޫއެފާ"ގެ ނަމުގައި އުފަންވި ވިލާތު ގައުމުތަކުގެ ފުޓްބޯޅަ ޖަމިއްޔާތަކުގެ ގުޅުމުގެ އެންމެ ފުރަތަމަ ޖެނެރަލް ސެކްރެޓަރީގެ މަގާމަށް ހަމަޖެހުނު ފްރާންސްގެ އޮންރީ ޑިލޫނޭއަކީ، ޔޫރޯ ފުޓްބޯޅަ މުބާރާތުގެ އެންމެ ޝަރަފްވެރި ނިޝާން ކަމަށްވާ "ޔޫރޯ ޓްރޮފީ" އެމީހެއްގެ ނަމަށް ނިސްބަތްކޮށްފައިވާ، އަދި ޔޫރޯ ފުޓްބޯޅަ މުބާރާތް އުފަންކުރުމުގެ ޚިޔާލާއި ފިކުރު ގެނެސްދިން ބައްޕައެވެ.
ވިލާތު ގައުމުތަކުގެ މެދުގައި ފުޓްބޯޅަ މުބާރާތެއް ބޭއްވުމަށް ޑިލޫނޭ ދެކެމުންދިޔަ ފޮނި ހުވަފެންތައް އޭނާގެ އަމިއްލަ ފަސްގަނޑުގައި 1960 ވަނަ އަހަރު ހަގީގަތަކަށް ވެގެންދިޔައެވެ. އެހެން ނަމަވެސް އޭރު އޭނާ މިދުނިޔެއަކު ނެތެވެ. އޮތީ އޭނާގެ ހަނދާންތަކެވެ. އޭނާގެ ޚިދުމަތާއި ވިސްނުމެވެ. އެހެންކަމުން މުބާރާތުގެ ޓްރޮފީ އޭނާއަށް ހާއްސަކުރެވުނެވެ. "އޮންރީ ޑިލޫނޭ ކަޕް" އަށެވެ.
ފްރާންސްގެ ލިލްގައި ޔޫރޯ މެޗެއް ކުޅޭ ސްޓޭޑިއަމެއްގައި ބެނާއެއް ހަރުކުރުމުގެ މަސައްކަތް ކުރިއަށް ދަނީ -- ފޮޓޯ: އޭޕީ
ޔޫރޯ ފުޓްބޯޅަ މުބާރާތުގެ ފުރަތަމަ އެޑިޝަން 1960 ވަނަ އަހަރު ފްރާންސްގައި ބޭއްވުނުއިރު، އެ މުބާރާތުގައި ވާދަކުރީ އެންމެ ހަތަރު ގައުމުވެ. އޭގެ ފަހުން 1980 ވަނައަހަރު 8 ޓީމު ވާދަކުރާ ގޮތަށް ހަމަޖެހި، އޭގެ ފަހުން 1996 ވަނަ އަހަރުގެ މުބާރާތުގައި ވާދަކުރާ ޓީމުތަކުގެ އަދަދު 16 އަށް އިތުރުކުރި އެވެ. އަދި ޔޫރޯގައި 2016އަށް ކުރިމަތިލީއިރު، މުބާރާތުގެ ހައިބަތާއި ފެންވަރު މަތިވެ، ފުޓްބޯޅައަށް އޮތް މަގުބޫލުކަމާއި އެއިން ލިބޭ މަންފާވެސް ބިލިއަން ޔޫރޯސްއިން ގުނާލެވުނު ހިނދު، އެ ކުޅިވަރުގައި ވީހާވެސް ގިނަ ބަޔަކު ޝާމިލްކުރުގެ ވިސްނުމާއެކު ޔޫއެފާއިން ނިންމީ މުބާރާތުގެ އަދަދު 24 ގައުމަށް އިތުރު ކުރުމަށެވެ. އެގޮތުން ޔޫރޯ އެންމެ ފުރަތަމަ ބޭއްވި ފްރާންސް އަނެއްކާވެސް މިދަނީ ތާރީޚުގެ ތެރެއަށް ވަނުމަށެވެ. އެންމެ ބޮޑު ޔޫރޯ މުބާރާތް އެ ފަސްގަނޑުގައި ބޭއްވުމުގެ ޝަރަފާދިމާއަށެވެ.
ފްރާންސްގައި ޔޫރޯ 2016 ބާއްވާނޭކަން އިއުލާނުކުރީ ސްވިޓްޒަލޭންޑްގެ ވެރިރަށް ޖެނީވާގައި 2010 ވަނަ އަހަރުގެ މޭ މަހުގެ 28 ވީ ހުކުރު ދުވަހު ބޭއްވި ޔޫއެފާ އެގެޒެކެޓިވް ކޮމިޓީގެ ބައްދަލުވުމުގައެވެ. އެހާތަނުން އެ ގައުމު ވެގެން ދިޔައީ ވިލާތުގެ އެންމެ ބޮޑު ފުޓްބޯޅަ މުބާރާތް ތިންފަހަރު ބޭއްވުމުގެ ޝަރަފް ލިބޭ ފުރަތަމަ ގައުމަށެވެ.
ޔޫރޯ 2016ގެ ތައްޔާރީތަކާއި މުބާރާތާ ގުޅޭ އެންމެހައި ކަންކަން ބެލެހެއްޓުމަށް، ޔޫއެފާއާއި ފްރާންސް ފުޓްބޯލް ފެޑެރޭޝަން ގުޅިގެން ވަނީ "ޔޫރޯ 2016 އެސްއޭއެސް" ގެ ނަމުގައި ފްރާންސްގައި ކުންފުންޏެއް ރަޖިސްޓްރީކޮށްފައެވެ. ފްރާންސް ފުޓްބޯލް ފެޑެރޭޝަންގެ 5 އިންސައްތަ ހިއްސާއާއި ޔޫއެފާގެ 95 އިންސައްތަ ހިއްސާ އޮންނަ މި ޖޮއިންޓްވެންޗަރ ކުންފުނީގެ ޗެއަރއަކަށް ހަމަޖައްސާފައި ވަނީ، ފްރާންސްގައި ބޭއްވި ފީފާ ވަރލްޑްކަޕް 1998ގެ އޯގަނައިޒިން ކޮމިޓީގެ ޗީފް އެގްޒެކެޓިވް ޖޭކް ލަމްބަރޓްއެވެ. ޔޫރޯއާ ގުޅޭގޮތުން ހިންގާ ހުރިހާ ހަރަކާތެއްވެސް އަދި މަޝްރޫއުތަކެއްވެސް ކުރިއަށް ގެންދާނީ މި ކުންފުނީގެ ސީދާ ބެލުމުގެ ދަށުން ކުންފުނިން ކަނޑައަޅާ ބައެކެވެ.
ޔޫރޯ ޝިޢާރު
ފުޓްބޯޅައިގައި ވިލާތުގެ އެންމެ މޮޅެތި ގައުމުތައް ވާދަކުރާ، މިފަހަރުގެ ޔޫރޯ ފުޓްބޯޅަ މުބާރާތުގެ ސްލޮގަން އަކީ، "ލޮ ރޮންދެ ވޫ" އެވެ. މިއީ، ފްރާންސް ބަހުންނަމަ އަލުން ބައްދަލުވުމެވެ. ޔުއެފާ ޔޫރޯ 2016އާ ދިމާކޮށް ފުޓްބޯޅައަށް ލޯބިކުރާ އެތަކެއް ހާސް ބަޔަކު ދުނިޔޭގެ އެކި ކަންކޮޅުތަކުން ފްރާންސަށް ޖަމާވާނެއެވެ. އެއްބަޔަކު އަނެއްބަޔަކާ ބައްދަލުވެ، ފުޓްބޯޅައިގެ އުފަލާއި ހިތްހަމަޖެހުން ހޯދާނެއެވެ. ހަމަ އެހެންމެ ފްރާންސްގެ މުއްސަނދި ތާރީޚާއި، އެބައި މީހުންގެ ދިރިއުޅުމާ ޘަގާފަތް މެހެމާނުންނަށް ދައްކާލުމަކީ ފްރާންގެ ވެސް ބޮޑު އަމާޒަކަށް ވަނީ ހަދައިފައެވެ.
މެޗުތައް ކުޅޭ ސަހަރުތައް
ފްރާންސްގެ 10 ސަހަރެއްގައި މިފަހަރުގެ ޔޫރޯގެ މެޗުތައް ކުޅުމަަށް ވަނީ ހަމަޖެހިފައެވެ. އެއިން ކޮންމެ ސަހަރަކުން މަޝްހޫރު ކުޅިވަރު ޝަހުސިއްޔަތެއް، ސަހަރުގެ އެމެބެސެޑަރުންގެ ގޮތުގައި ހަމަޖައްސާފައި ވެއެވެ. އެ ފަރާތްތަކުގެ ޒިންމާއަކަށް ވާނީ، މުބާރާތާ ގުޅުންހުރި އެކިއެކި ކަންތައްތަކާއި، އެ ސަހަރުތަކުގެ އާސާރީ، ސަަގާފީ އަދި އެނޫންވެސް ތާފާތު ހަރަކާތްތަކަށް އާންމުންގެ މެދުގައި ޕްރޮމޯޯޓް ކުރުމެވެ. ތިރީގައި މިވަނީ މިފަހަރުގެ ޔޫރޯ މެޗުތައް ކުޅޭ ސަހަރުތަކެވެ.
ސެއިންޓް-ޑެނިސްގެ ދަނޑުގައި ރޫމޭނިއާ ގައުމީ ފުޓްބޯޅަ ޓީމު ފަރިތަކުރުންތައް ކުރިއަށް ގެންދަނީ -- ފޮޓޯ: އޭޕީ
ބޯޑޯ
- ލެންސް އެގްލޯ
- ލިލް މެޓްރޮޕޯލް
- ލިޔޯން
- މާސޭ
- ނީސް
- ޕެރިސް
- ސޮން-ޑެނިސް
- ސޮން-އެޓިއެން
- ޓުލޫޒް
އެންމެންނަށް ހުރިހާ މެޗުތައް ބަލައިލާން ދަނޑަށް ވަނުމަކީ ފަސޭހަކަމެއް ނޫނެވެ. އަދި ކުޑަ ޚަރަދެއްވެސް ނޫނެވެ. އެހެންކަމުން މުބާރާތްކުޅޭ ދަނޑުތަކުގެ އިތުރުން ފްރާންސްގެ އެކި ކަންކޮޅުތަކުގައި ޔޫރޯ 2016ގެ މެޗުތަށް ބެލުމަށް ފޭން ޒޯންތަކެއްވެސް ވަނީ ތައްޔާރުކޮށްފައެވެ.
ސަލާމަތީ ކަންކަން
ހަރުކަށި ވިސްނުމާއި ފިކުރީ ތަޅާފޮޅުންތަކުގެ ހާއްޔަކަށް ދުނިޔެ ބަދަލުވެފައިވާ މިދަނޑިވަޅުގައި ފްރާންސަށް ވަނީ ޓެރަރިޒަމްގެ ބިރުވެރިކަމާވެސް އިންތިހާއަށް ކުރިމަތިލާންޖެހިފައެވެ. އެހެންކަމުން ޔޫރޯ 2016އަށް ފްރާންސް ވަނީ ވަރަށް ބޮޑަށް ތައްޔާރުވެފައެވެ. ހާއްސަކޮށް މިފަހަރުގެ މެޗުތައް ކުޅުމަށް ހަމަޖެހިފައިވާ ފްރާންސްގެ ސަހަރު ތަކުގެ ސަލާމަތީކަންކަން ވަނީ ވަރަށް ބޮޑަށް ވަރުގަދަކޮށްފައި ކަމަށްވެއެވެ.
ފްރާންސް ކަޕުގެ ފައިނަލްގައި ޕީއެސްޖީ އާއި މާސޭ ބައްދަލުކުރި މެޗުގެ ތެރޭގައި ދަނޑަށް ބަޑިބޭހުގެ ސާމާނުތަކެއް ވައްދައިގެން ސަޕޯޓަރުން ހިންގި ހަމަނުޖެހުންތަކާ ގުޅިގެން ޔޫރޯ 2016ގެ ސަލާމަތީ ކަންކަން އިތުރަށް ވަރުގަދަކުރުމަށް މަޝްވަރާތައް ކުރެވުނެވެ. އެގޮތުން ޔުއެފާއާއެކު ފްރާންސްގެ ކަމާގުޅޭ ދާއިރާތަކުން ބޭއްވި ބައްދަލުވުންތަކަށްފަހު ފްރާންސުން ވަނީ ޖޫން 10 ގައި މުބާރާތް ފެށުމުގެކުރިން ސަލާމަތީކަންކަން ވަރުގަދަކުރުމަށް ވައުދުވެފައެވެ.
ފްރާންސްގެ މާސޭގެ ޑައުންޓައުންގައި ފުޓްބޯޅަ ފޭނުން އެއްވެފައިވާ ސަރަހައްދަކަށް ފުލުހުން ޓިއަގޭސް ޖަހާފައި -- ފޮޓޯ: އޭޕީ
މިފަހަރުގެ ޔޫރޯ ފުޓްބޯޅަ މުބާރާތުގައި ކުޅުމަށް ހަމަޖެހިފައިވާ 51 މެޗު ބަލަން، 10 ދަނޑަށް ގާތްގަނޑަކަށް 2.5 މިލިއަން މީހުން ޖަމާވާނޭ ކަމަށް ބެލެވޭއިރު، އެމީހުންގެ ސަލާމަތާއި ރައްކާތެރިކަން ޔަގީންކުރުމަށް އެންމެ ފަހުގެ ޒަމާނީ ވަސީލަތްތައް ބޭނުންކޮށްގެން އެތަންތަން މޮނިޓާކުރާނެއެވެ. ހަމައެކަނި ދަނޑުންބޭރުގައި މެޗު ބަލާ ތަންތަން ނުވަތަ "ފޭންޒޯން" ތަކުގެ ސަލާމަތީކަންކަމަށް ވެސް ޖުމްލަ 8 މިލިއަން ޔޫރޯ ޚަރަދުކޮށްފައި ވާއިރު އޭގެ ތެރެއިން 1.9 މިލިއަން ޚަރަދުކޮށްފައިވަނީ މުބާރަތް ބާއްވާ ދިހަ ސިޓީގެ އެފަދަ ތަންތާގައި ސެކިއުރިޓީ ކެމެރާހަރުކުމަށެވެ.
މުބާރާތުގެ މެޗުތަށް ކުޅޭ ދަނޑުތަކާއި، ހޮޓާތަކާއި އެނޫންވެސް ޔޫރޯ ފުޓްބޯޅަ މުބާރާތާ ގުޅުންހުރި ތަފާތު 110 ސަރަހައްދެއްގައި ސަލާމަތީ ކަންކަން އެންމެ އެދެވޭގޮތެއްގައި ބެލެހެއްޓުމަށް ޔުއެފާއިން ވަނީ 10000 އާއި 15000 އާ ދެމެދުގެ އަދަދަކަށް ސަލާމަތީ އޮފިސަރުން ބޭނުންވާނޭ ކަމަށް ފްރާންސް ސަރުކާރުގައި އެދިފައެވެ.
ފްރާންސްގެ އިންޓީރިއާ މިނިސްޓަރު ބަރނަރޑް ކަޒުނެވު ވިދާޅުވިގޮތުގައި ޔޫރޯގެ ސަލާމަތީ ކަންކަން ބެލެހެށްޓުމަށް 90000 އޮފިސަރުންނާއި ވޮލަންޓިއަރުން ހަރަކައިތެރިވާނެއެވެ. އޭގެތެރޭގައި 42000 ފުލުހުންނާއި ފްރާންސްގެ އަސްކަރިއްޔާއިން 30000 އޮފިސަރުން ހިމެނެއެވެ. އަދި ޔޫރޯ ރާވައި ހިންގާ ފަރާތްތަކުން 10000 މީހުން ޕްރައިވެޓް ސެކިއުރިޓީ ކުންފުނިތަކުން ހޯދާނެއެވެ.
މީގެ އިތުރުން ސްޓޭޑިއަމް ތަކާއި އެއާޕޯޓު ފަދަ ގިނައަދަދެއްގެ މީހުން ޖަމާވާ ތަންތަނުގައި ސަލާމަތީ ކަންކަން ބެލެހެއްޓުމުގައި ފްރާންސްގެ އިތުރުން އެހެން ގައުމުތަކުން 200 ފުލުހުން ބައިވެރިވާގޮތަށްވަނީ ހަމަޖެހިފައެވެ.
މުބާރާތުގެ މެޗުތައް
މުބާރާތުގެ މެޗުތައް 10 ދަނޑެއްގައި ކުޅޭން ހަމަޖެހިފައިވާއިރު، ހަ ގްރޫޕަކަށް ބަހާލައިގެން ކުޅޭ ގްރޫޕް ސްޓޭޖް މެޗުތަކުގައި ކޮންމެ ޓީމެއްވެސް، މަދުވެގެން ތިން މެޗު ކުޅޭނީ ތަފާތު ތިން ދަނޑެއްގައެވެ. ކޮންމެ ގްރޫޕެއްގެ ވެސް ތިންވަނަ ބުރުގެ މެޗުތައް ކުޅޭނީ، އެއްދުވަހެއްގެ އެއް ވަގުތެއްގައެވެ. ކޮންމެ ގްރޫޕެއްގެ ވެސް އެއްވަނަ އާއި ދެވަނަ ޓީމު، މި މުބާރާތުގައި އަލުން ބައްދަލުވާނީ އެ ދެޓީމެއް ފައިނަލަށް ގޮސްފިނަމައެވެ. މުބާރާތުގެ މެޗުތައް ތިން ވަގުތެއް ގައި ފެށުމަށް ހަމަޖެހިފައިވާއިރު، ރާއްޖޭ ގަޑިއާ ދިމާވާނީ، މެންދުރު ފަހު، 6:00 އާއި ރޭގަނޑު 9:00 އާއި މެންދަމު 12:00 އަށެވެ.
ޔޫރޯގެ މެޗުތައް ވަގުތުން ދެއްކުމަށް ފްރާންސްގެ އައިފްލް ޓަވަރު ސަރަހައްދުގައި ހަދާފައިވާ ފޭން ޒޯނެއް -- ފޮޓޯ: އޭޕީ
ޔޫރޯ 2016ގެ މެޗުތައް ދަނޑުތަކަށް ބަހާލާފައިވަނީ، ދަނޑުގެ ޖާގައަށާއި، އެ ސަހަރެއްގެ އާބާދީއަށާއި، ޖިއޮގްރަފިކް ލޮކޭޝަނަށްވެސް ބެލުމަށްފަހުއެވެ. އެގޮތުން ކޮންމެ ސަހަރެއްގައި ވެސް މަދުވެގެން ހަތަރު މެޗު ކުޅޭނެއެވެ. އެގޮތުން އެންމެ ގިނަ މެޗު ކުޅޭނީ މުބާރާތް ހުޅުވާ މެޗާއި ފައިނަލް މެޗު ކުޅުމަށް ހަމަޖެހިފައިވާ ސޮން-ޑެނިސްގައި ހުންނަ ފްރާންސްގެ ރަސްމީ ދަނޑުގައެވެ. އެ ދަނޑުގައި ޖުމުލަ ހަތް މެޗު ކުޅޭނެއެވެ. މުބާރާތުގެ ސެމީ ފައިނަލް މެޗުތައް ކުޅޭނީ، މާސޭ އާއި ލިޔޯންގައެވެ. މާސޭ ލިޔޯން އަދި ލިލްގައި ކޮންމެ ސަހަރެއްގައި ހަ މެޗު ކުޅޭނެއެވެ. ކުއާޓާ ފައިނަލްގެ މެޗުތައް ކުޅޭނީ ސޮން-ޑެނިސްއާއި ލިލް، އަދި ބޯޑޯގައެވެ.
މުބާރާތުގެ ތަޞައްވުރު
ފްރާންސްގައި 2016 ވަނަ އަހަރު ބާއްވާ ޔޫރޯ ފުޓްބޯޅަ މުބާތަކީ، ސަރަހައްދީ އެންމެ ބޮޑު ފުޓްބޯޅަ މުބާރާތުގެ އިތިރުން ވިލާތުގައި ބޭއްވޭ އެންމެ ބިޔަ ހަރަކާތަށް ހެދުމަކީ ޔޫއެފާ އަދި ފްރާންސްގެ ވެސް ތަޞައްވުރެކެވެ. މުބާރާތް ބާއްވާ ގައުމު ޕްރޮމޯޓް ކުރުމާއި، އެންމެ ފުރިހަމަ ގޮތުގައި އިންތިޒާމްތައް ހަމަޖެހިފައިވާ މުބާރާތެއްގެ އިތުރުން މިއީ، އަމާން މާހައުލެއްގައި އެކުވެރިކަމާއި އެއްބައިވަންތަކަން ދައްކުވައިދޭ އީދަކަށް ހެދުމަކީ މުބާރާތް އިންތިޒާމްކުރާ ފަރާތުގެ އުންމީދެވެ.