09 Jun 2016, 12:31
އއ. ހިމަންދޫގައި ކޯޓު އަމުރެއްގެ ދަށުން މަންމައާ ހަވާލުކުރި ތުއްތު ކުއްޖާގެ ބައްޕަ ފަސް ދުވަހަށް ގޭގައި ބަންދުކޮށްފި އެވެ.
ފުލުހުންގެ މީޑިއާ އޮފިޝަލަކު "ސަން"އަށް މިއަދު ވިދާޅުވީ އެ ކުއްޖާގެ ބައްޕަ އިއްޔެ ހައްޔަރުކުރީ ކޯޓު އަމުރެއް ތަންފީޒު ކުރުމަށް ހުރަސްއެޅި މައްސަލައަކާ ގުޅިގެން ކަމަށާއި ބަންދުގެ މުއްދަތު ޖެހުމަށް ކޯޓަށް ގެންދިއުމުން ފަސް ދުވަހަށް ގޭ ބަންދުކޮށްފައިވާ ކަމަށެވެ.
ބައްޕަގެ ބެލުމުގެ ދަށުގައި ހުރި އެ ކުއްޖާ މަންމައާ ހަވާލުކުރީ ފެމެލީ ކޯޓުން ފުލުހުންގެ މައްޗަށް ކޮށްފައިވާ އަމުރެއް ތަންފީޒު ކުރުމުގެ ގޮތުންނެވެ.
މީޑިއާ އޮފިޝަލް ވިދާޅުވީ ފުލުހުންގެ ޓީމެއް އިއްޔެ ހިމަންދޫއަށް ގޮސް ކޯޓު އަމުރު ތަންފީޒު ކުރުމަށް ކުރި މަސައްކަތަށް އިތުރު ބަޔަކު ވެސް ހުރަސްއަޅާފައިވާ ކަމަށެވެ. އެހެންކަމުން އެކަމުގައި ޝާމިލްވި އެންމެންގެ މައްސަލަ ތަހުގީގު ކުރަމުން އަންނަ ކަމަށް އޮފިޝަލް ވިދާޅުވި އެވެ.
ހިމަންދޫއަށް އިއްޔެ ފުލުހުން އަރައި އެ ކުއްޖާ ގެންދިއުމަށް އުޅުމުގެ ތެރެއިން ބައެއް ރައްޔިތުންނާއި ފުލުހުންނާ ދެމެދު ވަނީ ކުރިމަތިލުންތަކެއް ހިނގާފަ އެވެ. އެ ހަމަނުޖެހުންތަކުގައި ބައެއް އާންމުންނަށް ވަނީ އެކިވަރުގެ އަނިޔާތައްވެފަ އެވެ.
ކޯޓު އަމުރުގައިވާ ގޮތުގެމަތިން ފުލުހުން މިހާރު ވަނީ އެ ކުއްޖާ މަންމައާ ހަވާލުކޮށްފަ އެވެ.