05 Jun 2016, 16:52
މިދިޔަ ހުކުރު ދުވަހުގެ ރޭ ދެވަނައަށް މަރާލާފައި ވަނީ އެދުވަހުގެ ހަވީރު 14 އަހަރުގެ ކުއްޖަކު މަރާލުމުގައި ބައިވެރިވި ކުއްޖެއް ކަމަށް ފުލުހުން ބުނެފި އެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމެއްގައި ކުރައިމް އިންވެސްޓިގޭޝަން ކޮމާންޑުގެ ޑެޕިއުޓީ ހެޑް މުހައްމަދު ރިޔާޒު ވިދާޅުވީ، އެދުވަހުގެ ދެވަނަ މާރާމާރީގައި މަރާލާފައިވާ މ. ސަރުމާގޭ ފާތިރު މުހައްމަދު އަލީ އަކީ ފުރަތަމަ މާރާމާރީގައި މަރާލި ކ. ކާށިދޫ، ރަންފަރު، އަހުމަދު އިރުޝާން ހިލްމީ މަރާލި މާރާމާރީގައި ހަރަކާތްތެރިވެފައިވާ ކުއްޖެއް ކަމަށެވެ.
"ދެވަނަ ހާދިސާގައި ނިޔާވި ކުއްޖަކީ އަޅުގަނޑުމެން މިހާތަނަށް ބެލިބެލުމުން ހަވީރުގެ ވަގުތު ހިނގި މާރާމާރީގައި އަމަލީގޮތުން ބައިވެރިވި ކުއްޖެއްކަންވެސް އަޅުގަނޑު މިފުރުސަތުގައި ފާހަގަކޮށްލަން." ރިޔާޒު ވިދާޅުވި އެވެ.
ކުއްޖާއަށް ހަމަލާދިންއިރު އޭނާ ހުރި ގޭގެ ސީސީޓީވީ ފުޓޭޖާއި ހަވާލާދީ ރިޔާޒު ވިދާޅުވީ، ފާތިހު މަރާލާފައިވަނީ ފާތިރު ގެއިން ނުކުންނަނިކޮށް ދެ ކުއްޖަކު އެގެއަށްވަދެ އެތަނުން އެކަކު ވަޅިން ހަމަލާދީގެން ކަމަށެވެ. އަދި ހަމަލާދިނުމުން އެކުއްޖާ ސިޑިން މައްޗަށް އަރަނިކޮށްވެސް ހަމަލާދީފައިވާ ކަމަށް ވިދާޅުވިއެވެ.
އޭނާ ވިދާޅުވީ ފާތިހު އަކީ މީގެ ކުރިންވެސް ކުށުގެ ވެށިން ފުލުހުން ހުއްޓުވާފައިވާ ކުއްޖެއް ކަމަށެވެ.
އެ ދެ މާރާމާރީގެ ތެރެއިން ފުރަތަމަ ހިނގި މާރާމާރީ އާއި ގުޅިގެން 18 އަހަރުން ދަށުގެ ދެ ކުއްޖަކު މިހާރު ހައްޔަރުކޮށްފައިވާއިރު އެ މާރާމާރީގައި ބޮޑަށް ހަރަކާތްތެރިވެފައިވަނީ ކުޑަކުދިންނެވެ. އެ އެންމެން މިހާރު ދެނެގަނެވިފައިވާއިރު އެމީހުން ހައްޔަރު ކުރުމުގެ މަސައްކަތް ކުރަމުން އަންނަ ކަމަށް ރިޔާޒް ވިދާޅުވިއެވެ.
ފުލުހުން ބުނާގޮތުގައި އެ ދެ މާރާމާރީ ހިންގަން މެދުވެރިވީ މާފަންނުގައި އޮންނަ ދެ ގުރޫޕު ކަމަށްވާ "ވައިކަންމަތި" އަދި "އީގަލްސް" ނަމަކަށް ކިޔާ ދެ ގްރޫޕެއްގެ ދެމެދުގައި އުފެދުނު ހަމަނުޖެހުމެއްގެ ތެރެއިން ކަމަށެވެ.