Last Updated: 9 year 6 month ago
އޭއެފްސީ އޭޝިއަން ކަޕް 2019 ކޮލިފިކޭޝަންގެ ޕްލޭ އޯފްގައި ރާއްޖެއާއި ޔަމަން ބައްދަލުކުރާ މެޗުގެ ލައިވް ކަވަރޭޖަށް ސަންގެ ކިޔުންތެރީނަށް މަރުހަބާ.
މިރޭ މި ދެޓީމު ބައްދަލުކުރާއިރު:
މީގެ ކުރީން މިދެޓީމު ވަނީ ދެފަހަރެއްގެ މަތީން ބައްދަލުކޮށްފައި. އެ ދެ މެޗަކީ ވެސް 2010 ވަނަ އަހަރުގެ ވޯލްޑް ކަޕަށް ކޮލިފައިވުމަށް ކުޅުނު ދެމެޗު.
- 8 އޮކްޓޫބަރު 2007ގައި ޔަމަނުގައި ކުޅުނު މެޗުން ޔަމަނު ވަނީ ރާއްޖެ އަތުން 3-0 ލަނޑުން މޮޅުވެފައި.
- 28 އޮކްޓޯބަރު 2007ގައި ގަލޮޅު ދަނޑުގައި ކުޅުނު މެޗުން ރާއްޖެ ވަނީ 2-0 ލަނޑުން ޔަމަނު އަތުން މޮޅުވެފައި.
މެޗުގެ ދެވަނަ ހާފުގެ ކުޅުން ނިންމާލައިފި. މެޗު ނިމިގެންދިޔައީ 2-0 ލަނޑުން ޔަމަން ކުރީގައި އޮވެގެން.
"+90 - ޔަމަނަށް ލަނޑުޖަހާނެ ހުސް ފުރުސަތެއް ލިބިއްޖެ. ރާއްޖޭގެ ޕެނަލްޓީ އޭރިޔާ ތެރެއިން ބަދަލު ކުޅުންތެރިޔާ މުހައްމަދު އަލް ދަހީ އުފެއްދި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށް.
ދެވަނަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.
"88 - ޔަމަނުން އެ ޓީމުގެ ފަހު ބަދަލު ގެނެސްފި. އަބްދުލް ވަސީގެ ބަދަލުގައި ކުޅެން ނުކުތީ މުހައްމަދު އަލް ދަހީ.
"86 - ރާއްޖޭގެ ޕެނަލްޓީ އޭރިޔާ ތެރެއިން އަކްރަމް އުފެއްދި ހަމަލާ ވެސް ކީޕަރު އިމްރާން މަތަކޮށްފި. މި މެޗުގައި އިމްރާނުގެ ފަރާތުން މޮޅު ކުޅުމެއް ފެންނަމުން އެބަދޭ.
"82 - ޔަމަނަށް ލަނޑުޖަހާނެ އިތުރު ފުރުސަތެއް. ރާއްޖޭގެ ޕެނަލްޓީ އޭރިޔާ ތެރެއިން އަބްދުލް ވަސީ ފޮނުވާލި ހަމަލާ، އިމްރާން ވަނީ މަތަކޮށްފަ. އޭނާ މަސައްކަތްކުރީ އިމްރާންގެ ބޯ މަތިން ގޯލުގެ ތެރެއަށް ބޯޅަ ފޮނުވާލަން.
"81 - ރާއްޖެއަށް ލަނޑުޖަހާނެ ރަނގަޅު ފުރުސަތެއް ލިބިއްޖެ. ޔަމަނުގެ ޕެނަލްޓީ އޭރިޔާ ތެރޭގައި ހުރެފައި، ފާސިރު އުފެއްދި ހަމަލާ، ޔަމަނުގެ ކީޕަރު ވަނީ މަތަކޮށްފަ.
އައިމަން ދިން ބޯޅައަކުން ޔަމަނަށް މި ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެ ވަނަ ހާފުގައި ކުޅެން ނުކުތް އަކްރަމް ހަމޫދު އަބްދޯ އަލް ރަފީ. ރާއްޖޭގެ ގޯލުގެ ތެރެއަށް އޭނާ ބޯޅަ ފޮނުވާލީ ރާއްޖޭގެ ޕެނަލްޓީ އޭރިޔާ ތެރޭގައި ހުސްކޮށް ހުރެ.
"79 - ޔަމަނުން އިތުރު ލަނޑެއްޖަހައި، ލީޑު ފުޅާކޮށްފި.
"75 - ރާއްޖެއިން ބަދަލެއް. އިމްރާން ނަޝީދުގެ ބަދަލުގައި ކުޅެން ނުކުތީ ހަމްޒާ މުހައްމަދު (ހަމްޕު).
"70 - ޔަމަނުން އިތުރު ބަދަލެއް ގެނެސްފި. އަލާ މުހައްމަދު އަބްދުﷲ އަލް ސަސީގެ ބަދަލުގައި ކުޅެން ނުކުތީ އަކްރަމް ހަމޫދު އަބްދޯ އަލް ރަފީ.
"69 - ޔަމަނުން ބަދަލެއް ގެނެސްފި. އަހްމަދު އަލީ އަލް ހިފީގެ ބަދަލުގައި ކުޅެން ނުކުތީ އަހްމަދު އަބްދުﷲ އަހްމަދު އަލޯސް.
68" - އަހްމަދު އަބްދުﷲ (ލިލީ) ނަގައިދިން ހުރަސް، ނުރައްކާވުމުގެ ކުރިން ޔަމަނުގެ ކީޕަރު އެ ބޯޅަ ހޯދައިފި.
"64 - ޔަމަނުން ކައިރި ކައިރީގައި އުފެއްދި ދެ ހަމަލާއެއް ކީޕަރު އިމްރާން ހުޝިޔާރުކަމާއެކު މަތަކޮށްފި. ފުރަތަމަ ހަމަލާ ރާއްޖޭގެ ޕެނަލްޓީ އޭރިޔާ ބޭރުން އުފެއްދީ ޔަމަނުގެ އަބްދުލް ވަސީ އަލް މަތާރީ. ރީބައުންސް ބޯޅައިން ދެވަނަ ހަމަލާ، ރާއްޖޭގެ ޕެނަލްޓީ އޭރިޔާ ތެރެއިން އުފެއްދީ އައިމަން އަލް ހަގްރީ.
ފުރަތަމަ ހާފުގައި ހޮކޭ އަށް ކުރިމަތިވެފައި ވަނީ ނޭވާ ހިތްލުމުގެ މައްސަލައެއް. މިހާރު އޭނާގެ ހާލު ރަނގަޅު.
"57 - ސަމްދޫހު ދުރުން އުފެއްދި ހަމަލާ ގޯލާ އަމާޒެއް ނުވި. އޭނާ އުފެއްދި ހަމަލާ ދިޔައީ ހުރަސް ދަނޑިމަތިން ބޭރަށް.
ދެވަނަ ހާފު ރާއްޖެއިން ފެށީ ބަދަލަކާއެކު. އަސްހަދުގެ ބަދަލުގައި ކުޅެން ނުކުމެފައިވަނީ މުހައްމަދު އުމައިރު.
"54 - ފާސިރަށް ރީނދޫ ކާޑެއް ދައްކައިފި.
"48- ރާއްޖޭ ޓީމުން ހަމަލާއެއް އުފަންދަން ކުރި މަސައްކަތް ކާމިޔާބެއް ނުވި. ޔަމަނުގެ ޕެނަލްޓީ އޭރިޔާ ބޭރުން އެޓީމުގެ ގޯލް ކުރިމައްޗަށް ސެންޓޭ ހުރަސްކޮށްލި ބޯޅަ ރާއްޖޭ ކުޅުންތެރިއަކަށް ނުލިބި ދިޔައީ ބޭރަށް.
ފުރަތަމަ ހާފުގެ ކުޅުން ނިންމާލައިފި. ފުރަތަމަ ހާފު ނިމިގެންދިޔައީ 1-0 ލަނޑުން ޔަމަނު ކުރީގައި އޮވެގެން.
"+45 - ރާއްޖެއަށް ލަނޑު ޖަހާނެ ރަނގަޅު ފުރުސަތެއް. ނާޝިދު ނަގައިދިން ހުރަހަކުން އަސްހަދު ބޮލުން އުފެއްދި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށް
"45- ފުރަތަމަ ހާފްގެ 45 މިނިޓްގެ ކުޅުން ހަމަވެ އިތުރު ވަގުތުގެ ގޮތުގައި 3 މިނިޓް ދީފި.
"44 - ޔަމަނަށް ލަނޑުޖަހާނެ ރަނގަޅު ފުރުސަތެއް ލިބިއްޖެ. މުހައްމަދު އަލް ބުގްޝަން ދިން ބޯޅައަކުން ރާއްޖޭގެ ޕެނަލްޓީ އޭރިޔާ ތެރެއިން އަބްދުލް ވަސީ އަލް މަތާރީ އުފެއްދި ހަމަލާ އަމާޒުވީ ގޯލުގެ އަރިމަތީ ދަނޑިއަށް.
މީގެ ކުރިން ރާއްޖޭގެ ގައުމީ ފުޓްބޯޅަ ޓީމު، ގަލޮޅު ދަނޑުގައި މެޗެއް ކުޅޭނަމަ، ސަޕޯޓަރުން ދަނޑަށް ވަދެ ދަނޑު ފުރާލާ މަންޒަރު ފެނިގެން ދިޔަ ނަމަވެސް މިހާރު އެމަންޒަރު ނުފެންނަކަން ހިތާމަޔާއެކު ފާހަގަކުރަން ޖެހޭ. އެގޮތުން މިރޭވެސް ދަނޑުގެ ސިޑިބަރީގެ ބޮޑުބައެއް އޮތީ ހުސްކޮށް، އަދި ގޮނޑިބަރިވެސް ނުފުރޭ. ގައުމީ ޓީމަށް ސަޕޯޓްކޮށް ދިނުމަށް ޓީމުގެ ކުޅުންތެރީންނާއި އޮފިޝަލުން ވަނީ އާދޭހާއެކު ސަޕޯޓަރުންގެ ކިބައިން އެދިފައި.
ހޮކޭގެ ބަދަލުގައި ކުޅެން ނުކުތީ ސަމްދޫހު މުހައްމަދު.
"36- ލިބުނު އަނިޔާއެއްގެ ސަބަބުން ދަނޑުން ބާލާފައި ވަނީ މުހައްމަދު ރަޝީދު (ހޮކޭ). އޭނާ ދަނޑުން ބޭލިގޮތަށް އެމްބިއުލެންސަށް އަރުވައިގެން ފަރުވާ ދިނުމަށް ގެންގޮސްފި.
"32 - ޔަމަނަށް ލަނޑުޖަހާނެ އިތުރު ފުރުސަތެއް ލިބިއްޖެ. ރާއްޖޭގެ ޕެނަލްޓީ އޭރިޔާ ތެރެއިން އައިމަން އަށް ލިބުނު ބޯޅައިން ހަމަލާ، ކީޕަރު އިމްރާން ވަނީ މަތަކޮށްފަ.
"30 - ޔަމަނުން ލީޑު ނަގައިފި.
މެޗުގެ ފުރަތަމަ 15 މިނެޓުގެ ކުޅުން ނިމުނު އިރު، ދެ ޓީމަށް ވެސް ލަނޑުޖަހާނެ ވަރަށް ރަނގަޅު ފުރުސަތެއް ވަނީ ލިބިފައި.
"13 - ޔަމަނުން ނުރައްކާތެރި ހަމަލާއެއް އުފައްދައިފި. ޔަމަނުގެ އަބްދުލް ވަސީ އަލް މަތާރީ ނަގައިދިން ހުރަހަކުން، ރާއްޖޭގެ ޕެނަލްޓީ އޭރިޔާ ތެރޭގައި ހުރެފައި އައިމަން އަލް ހަގްރީ ބޮލުން އުފެއްދި ހަމަލާ ދިޔައީ ގޯލުގެ އަރިމަތީ ދަނޑިކައިރިން ބޭރަށް.
"10 - ރާއްޖެއަށް ލަނޑުޖަހާނެ ރަނގަޅު ފުރުސަތެއް ލިބިއްޖެ. ޔަމަނުގެ ޕެނަލްޓީ އޭރިޔާ ތެރޭގައި ހުސްކޮށް ހުރެފައި، ސެންޓޭ އުފެއްދި ހަމަލާ، ޔަމަނުގެ ގޯލްކީޕަރު އައްޔާޝް ވަނީ މަތަކޮށްފަ.
"3 - ޔަމަން ޓީމުން ހަމަލާއެއް. ރާއްޖޭ ޕެނަލްޓީ އޭރިޔާ ތެރޭން ޔަމަން ޓީމުގެ އަހްމަދު އަލީ ނަގައިދިން ހުރަހަކުން އެޓީމުގެ އަލާ މުހައްމަދު ބޮލުން ޖަހައި ގޯލަށް ފޮނުވާލި ބޯޅަ ކީޕަރު އިމްރާން އަތުން ޖަހައި އޭރިޔާޢިން ބޭރަށް ފޮނުވާލީ.
މެޗު ފަށައިފި.
މެޗު ފަށަނީ ޔަމަން ޓީމުން.
ރާއްޖޭ ޓީމުގެ ފުރަތަމަ 11:
- އަބްދުﷲ އަހްމަދު
- އަލީ ފާސިރު
- އަސަދުﷲ އަބްދުﷲ
- އިސްމާއީލް އީސާ
- އަސްހަދު އަލީ
- އަހްމަދު ނާޝިދު
- އަމްދާން އަލީ
- ޝާފިއު އަހްމަދު
- މުހައްމަދު ރަޝީދު
- އިމްރާން ނަޝީދު
- އިމްރާން މުހައްމަދު (ގޯލްކީޕަރު) -ކެޕްޓަން