01 Jun 2016, 23:38
ދަރިން ބެލުމުގައި އިހުމާލުވި ބައްޕައަކު ކ. ގާފަރުން ހައްޔަރުކޮށް އޭނާގެ ހަތަރު ދަރިން ދައުލަތުގެ ބެލުމުގެ ދަށަށް ގެންގޮސްފި އެވެ.
ކ. ގާފަރު ކައުންސިލުން ވަނީ "ސަން" އަށް އެކަން ކަށަވަރުކޮށްދެއްވާފަ އެވެ.
ނަން ހާމަ ނުކުރުމަށް އެދި ކ. ގާފަރުން "ސަން" އަށް މައުލޫމާތުދިން މީހަކު ބުނީ، ދަރިން ބެލުމުގައި އިހުމާލުވި ފިރިހެން މީހާ ހައްޔަރުކޮށްފައި ވަނީ މިއަދު ކަމަށެވެ.
އެމީހާގެ ހަތަރު ކުދިން ތިބޭއިރު އެ ކުދިންނަކީ 18 އަހަރުން ދަށުގެ ކުދިން ކަމަށާއި އެއީ އަންހެން ދެކުދިންނާއި ފިރިހެން ދެކުދިން ކަމަށެވެ. އެކުދިންގެ މަންމަ ދިރިއުޅެމުން އަންނަނީ ކުދިންނާ ވަކިން ކަމަށާއި ހަތަރު ކުދިންވެސް މިހާރު ބަލަނީ އެކުދިންގެ ބައްޕަ ކަމަށް އޭނާ ބުންޏެވެ.
ސަން އަށް މައުލޫމާތު ދެމުން އެމީހާ ބުނީ އިއްޔެ ފުރަތަމަ ދައުލަތުގެ ބެލުމުގެ ދަށަށް ގެންދިޔައީ ތިން ކުދިން ކަމަށެވެ. އެއަށްފަހު މިއަދު އެކުދިންގެ ބައްޕައާއި އެންމެ ހަގަށް ހުރި ކުއްޖާ ފުލުހުން ގެންގޮސްފައިވާ ކަމަށެވެ.
އެ ކުދިންނާ އެކުދިންގެ ބައްޕަ ވާހަކަ ދައްކާއިރު ކުޑަކުދިންނާ ނުގުޅޭ "ހުތުރު ބަހުރުވައިން" ވާހަކަ ދައްކާ ކަމަށާއި ނަމަވެސް އެއްވެސް އަނިޔާއެއް ކުރާކަމެއް އެނގިފައިނުވާ ކަމަށް އެމީހާ ބުންޏެވެ.
އޭގެ އިތުރުން ބައެއް ގަޑިގަޑީ ކުދިންނަށް ކާނެ އެއްޗެއް ނުލިބި ތިބެންޖެހޭތަން އައިސްފައިވާ ކަމަށް އެމީހާ ބުންޏެވެ.